Македонија
(Видео) Ковачевски: Гледаме политички пазар, без јавна дебата, за зголемување на државната управа
![](https://makfax.com.mk/wp-content/uploads/2024/06/Screenshot-2024-06-08-112327.jpg)
Првото прашање кое се наметнува кога ќе се разгледа законското решение коешто е предложено, за измени на Законот за државна управа е практично дека се работи за измени кои се мотивирани од желбата да се олесни политичкиот пазар за полесно креирање на владина коалиција и за носење на други закони со двотретинско мнозинство. Политички мотиви за политички пазар, рече претседателот на СДСМ и пратеник, Димитар Ковачевски во македонското Собрание во рамки на синоќешната дебата во врска со предложениот закон за зголемување на бројот на министерства, односно реорганизација на државната управа.
Предизборното ветување на ВМРО-ДПМНЕ и коалицијата беше намалување на бројот на министерствата, а сега имаме предлог за нивно зголемување, додаде Ковачевски.
-Се прави површно и паушално. Ваков сложен, системски закон кој треба да се носи во редовна постапка, со анализи, со проценка на ефектите, од финансиски и кадровски аспект, сега се носи по скратена постапка, без соодветните анализи за што реагираа и невладини организации и без буџетски импликации, рече Ковачевски.
Законот не допира неколку важни прашања кои се однесуваат на оваа сфера. Организацискиот систем, што овој закон не ги третира институциите формирани со посебни закони, не го олеснува буџетирањето туку напротив, го прави посложено со нови 4 министерства. Не се унапредуваат линиите на отчетност, нема критериуми, а наместо да се намали се зголемува бројот на државната управа. Не се опфатени функциите на вклучените министерствата и нивна рационализација. Воопшто не се водело ниту сметка за поставеноста на Европска унија, затоа што вака нема да ја олесни работата со европските институции. Значи нема да се постигнат основните цели со еден ваков закон, рече Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Таравари почна со разрешување на клиниките: „Очекувам за два месецa повеќе да нема економски директори“
![](https://makfax.com.mk/wp-content/uploads/2023/02/taravari-1.jpg)
Новиот министер за здравство Арбен Таравари, најави дека започнува со разрешување на економските директори на Клиничкиот центар „Мајка Тереза“ на кои им е истечен мандатот и дека постапката ќе продолжи и за другите кои вршат ваква функција, но откако ќе се направат потребните законски измени.
Таравари очекува за два месеци повеќе да нема економски директори.
„Денеска ќе бидат разрешени 7-8 директори од вкупно 14, односно оние на кои им е истечен мандатот за в.д. директор. Како ќе им истекува мандатот в.д. и останатите ќе бидат разрешни. Имаме и директори кои се со решение и за нив ќе треба да се направат законски измени. Но, јас очекувам за два месецa повеќе да нема економски директори“, рече Таравари при ги посетата на хируршките сали на Kлиниката за ТОАРИЛУЦ кои беа затворени поради непознат мирис.
Таравари најави дека како министер ќе се зафати прво со овој проблем.
„При денешната посета ми беше кажано дека во одредени хируршки сали нема мирис, а во одредени има. Јас очекувам да добијам извештај од досегашните испитувања и да видиме како најбрзо да го решиме овој проблем. Ми требаат неколку дена за да донесам одлука, дали ќе одиме со решавање на проблемот со отварање на нова набавка и инсталирање на комплетно нов систем или ќе може овој да се поправи. Се надевам дека до петок ќе имаме одлука“, изјави Таравари.
Тој потврди дека на Клиниката за кардиохирургија на директорското место е вратен доктор Марјан Шокаровски, кој беше разрешен од претходниот министер Илир Демири.
Македонија
Силјановска-Давкова го прими словачкиот амбасадор, Хенрик Маркуш: од особен интерес е интензивирањето на билатералниот политички дијалог
![](https://makfax.com.mk/wp-content/uploads/2024/06/Foto-1-1-1.jpeg)
Претседателката Гордана Силјановска-Давкова денеска го прими амбасадорот на Република Словачка, Хенрик Маркуш.
На средбата се разговараше за севкупните билатерални односи и можностите за унапредување на соработката во разни области од заемен интерес.
Претседателката истакна дека билатералните односи се карактеризираат со пријателство и разбирање оценувајќи дека меѓу двете земји постојат силни културни врски поради наследството на светите браќа Кирил и Методиј.
Нагласувајќи дека годинава се одбележуваат 30 години од воспоставувањето на дипломатските односи со Словачка, претседателката Силјановска-Давкова се заблагодари за принципиелната поддршка од Словачка и од вишеградската група како традиционален поддржувач на македонските евроинтеграции и посветен партнер во НАТО.
Во насока на продлабочување на соработката во области од заемен интерес, претседателката истакна дека е видлив растот на трговската размена за која постои можност во наредниот период да постигне поголеми резултати со заеднички ангажман од двете страни.
Таа нагласи дека од особен интерес е и интензивирањето на билатералниот политички дијалог.
Македонија
Новиот министер Андоновски на средба со младите од ИТ-секторот
![](https://makfax.com.mk/wp-content/uploads/2024/06/image00008.jpeg)
Новиот министер за дигитална трансформација, Стефан Андоновски, на првиот работен ден се сретна со млади луѓе од ИТ-секторот.
„Првата официјална средба како министер за дигитална трансформација ја почнувам заедно со младите. Сите напори и решенија треба да бидат во насока на обезбедување добри услови младите да се развиваат и да ја гледаат и својата иднина во Македонија“.
Тој додава и дека реформите се во фокусот на новата Влада.
,,Реформите во општеството и дигиталната трансформација се и главен акцент на новата Влада, со што ќе им се овозможи и подобар стандард за живеење на младите и намалување на корупцијата“.