Македонија
(Видео) Ковачевски им ја отстапи владината сала на младите: Заедно креираме политики за развој

Премиерот Димитар Ковачевски денеска ја отстапи Владата на младите со учество на завршна активност „Младите ја преземаат Владата“, дел од регионалната младинска конференција #ThinkForward: YOUth Action NOW!, организирана од Делегацијата на ЕУ како дел од програмата Европска година на младите.
Настанот на кој младите известувачи ги презентираа нивните согледувања на неколку клучни теми со поздравен говор ја отвори амбасадорот на ЕУ во Република Северна Македонија, Дејвид Гир.
Пред премиерот Ковачевски и членовите на Владата на темата за регионална соработка и помирување говореше Бленди Ходаи, за менталното здравје на младите говореше Мимоза Серафимовска, а за климатските промени и зелениот одговор на ЕУ, Марија Бургиева. Тие укажаа на неопходноста да се чуе нивниот глас и потребата да бидат поинтегрирани во донесувањето одлуки во институциите.
Во своето обраќање премиерот Димитар Ковачевски ги повика и охрабри младите луѓе да преземаат акции и да ги реализираат своите идеи, а Владата ќе настојува да создаде најповолна клима за остварување на нивните амбиции вклучувајќи го и брзото реализирање на процесите за интеграција во ЕУ каде што припаѓа нивната иднина.
„Задоволство ми е и што можам да ги чујам сите мислења на исклучително важни теми, кои ги засегаат не само младите, туку и возрасните, како и идните генерации. Драго ми е што се согласуваме околу тезата дека вистинските лидери не носат одлуки што го засегаат нивниот резултат на следните избори, туку одлуки коишто ја засегаат и подобрата иднина на идните генерации“, истакна Ковачевски.
Тој ја изрази својата почит кон придонесот на сите млади луѓе, споменувајќи ја нивната храброст, иновативност, свежи претприемнички идеи, преку кои успеаја да ги воведат новите индустрии во нашата држава коишто влијаеjа на економскиот раст.
Премиерот Ковачевски укажа и на позитивните аспекти на соработката на младите со нивните врсници од регионот укажувајќи на извонредните можности што произлегуваат од активностите на Регионалниот совет за соработка во рамките на Берлинскиот процес, како и од можностите што ги нуди иницијативата Отворен Балкан за регионална интеграција која ни е потребна за зголемување на трговијата, за размена на знаења и на образование.
Во дискусијата, во која учествуваа и Бојан Маричиќ, заменик-претседател на Владата за европски прашања, Јованка Тренчевска, министерка за труд и социјална политика, Насер Нуредини министер за животна средина и просторно планирање, Владимир Рендевски, заменик-министер за здравство, Љуљзим Алиу, заменик-министер за образование и наука, Марјан Забрчанец, национален координатор за Отворен Балкан и регионални иницијативи и Роберт Алаѓозовски национален координатор за интеркултурализам, едно општество, беше заеднички оценето дека оваа активност има за цел да ја олесни директната дискусија меѓу младите луѓе и владините претставници и дека вратите на институциите секогаш ќе им бидат отворени за нивните иницијативи за креирање на добри, квалитетни политики за млади.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зајакнување на партнерството со Вермонт – македонска делегација се сретна со гувернерот на сојузната држава

Делегацијата на Армијата и Министерството за одбрана која престојува во Вермонт, САД, предводена од началникот на Генералштабот, генерал-мајор Сашко Лафичиски придружуван од државниот секретар во министерството, Елизабета Чуповска Ристова, во текот на вчерашниот ден оствари средба со гувернерот на оваа сојузна држава, Фил Скот на која присуствуваше и командантот на Националната гарда на Вермонт, генерал-мајор Грегори Најт.
За време на средбата се разговараше за придобивките од Програмата за партнерство во овие изминати повеќе од три децении која се реализира преку широк спектар на активности, како што се: изведување на заеднички обуки и вежби, конференции, посети на воени бази, школски центри и институции во САД, семинари, и сл. Дополнително беше нагласен огромниот придонес на командантот на Националната гарда на Вермонт, генерал-мајор Најт кој за време на својот мандат има клучна улога за развојот и успешноста на ова програма.
Во рамки на активностите македонската делегација оствари средба со командантот на Универзитетот „Норвич“, бригадниот генерал Вилијам МекКола при посетата на оваа воено високо образовна институција. Обнова на програмата за размена на студенти помеѓу Армијата и Универзитетот беше во фокусот на разговорот. Оваа програма одигра значајна улога во зајакнување на партнерство меѓу двете земји и во поддршка на професионалниот и академскиот развој на идните воени лидери. Таа останува клучен механизам во напорите за продлабочување на институционалните врски и унапредувањето на интероперативноста.
Во текот на денот, делегацијата го посети и Регионалниот центар за подготвеност и регионална технологија „Нортфилд“, каде беше презентиран ангажманот на овој центар во доменот на информациски операции и сајбер безбедноста во нашата држава.
Во таа прилика, генералот Лафчиски истакна дека „искуството и експертизата на центарот претставуваат уникатна можност за градење капацитети во оваа област“, имајќи предвид дека зајакнувањето на сајбер отпорноста е национален одбранбен приоритет кој е усогласен со принципите на колективна одбрана на НАТО и заложбата за сајбер одбрана на Алијансата.
Во следните неколку денови делегацијата ќе присуствува на повеќе презентации и посети на институции и капацитети од взаемен интерес.
Македонија
(Видео) Митрески: СДСМ нема да учествува во гласањето за интерпелацијата на обвинителот Коцевски

Интерпелацијата за јавниот обвинител, Љупчо Коцевски, нема правни последици и СДСМ нема да учествува во гласањето, одлуката е на обвинителот, изјави пратеникот од СДСМ, Јован Митрески.
„Иако нашиот став претходно беше дека ставот во однос на интерпелацијата за работата на Јавниот обвинител ќе го соопштиме од собраниската говорница сепак поради неразумните и нелогични одложувања на седницата со неразумни и нелогични барања на паузи а и поради вашиот голем интерес решивме тоа да го направиме на оваа прес конференција. Интерпелацијата во принцип значи барање политичка одговорност а овде зборуваме за човек од третата власт. Третата власт или судската власт која по Устав треба да биде независна. Тоа од една страна. Од втора страна тоа може но и не мора да има правни последици. Дали ќе има правни последици зависи од самиот обвинител, од самиот функционер. Во овој случај од самиот обвинител, дали ќе поднесе оставка или не“, рече тој.
Митрески додаде дека ако точката на дневен ред била одлука за разрешување тогаш можело да се отвори дебата дали се задоволни или незадоволни од работата на обвинителот, секако низ соодветно пропишана процедура.
„Како пратеничка група на СДСМ и Коалицијата остануваме на принципиелниот став дека јавното обвинителство мора да биде независно, ослободено од политичко влијание и притисок и сите одлуки мора да се послобото на законот и никако поинакви“, рече пратеникот.
Во врска со истрагата за Кочани, Митрески рече дека Мицкоски кажал е задоволен од тоа како се води истрагата.
„Знаете дека премиерот Мицкоски зборуваше дека треба да се смени Јавниот обвинител и дека, цитирам, таа процедура е тргната и нема сопирање. После трагичниот настан во Кочани знаете дека има промена на изјавата односно дека нема да има разрешување се додека не заврши истрагата. Со тоа што премиерот Мицковски отиде и чекор понатака кажа дека е задоволен од тоа како се води истрагата. Затоа со ова нивна одлука која што денес ја слушнавме на прес-конференција се отвораат прашања кои се легитими, меѓутоа јавноста за тоа ќе добие одговор во следниот период. Се поставува прашањето дали премиерот Мицковски е задоволен од истрагата, бидејќи нема одговор до денес, од тогаш кога во истрагата не се опфатени началниците на Тошковски“,рече Митрески.
Македонија
Хеликоптер од Чешка и 61 пожарникар од Словенија ќе помагаат во гаснење на пожарите

Меѓународна помош ќе пристигне во земјава да помогне во справување со пожарите. Помошта ќе дојде од Чешка и од Словенија.
Чешка испраќа хеликоптер Блек Хок со седумчлен екипаж. Се очекува да пристигнат попладнево.
Утре, пак, во Берово ќе пристигне тим од Словенија составен од 61 пожарникар со 18 возила.
Во текот на измнинатото деноноќие на територијата на државата евидентирани се вкупно 27 пожари на отворен простор. Од нив, седум се активни, три се под контрола, а седумнаесет се изгаснати.