Предвремените избори нема да ги решат проблемите на граѓаните туку ќе ги продлабочат затоа го затвораме ова прашање, изјави премиерот Димитар Ковачевски на прес-конференција по средбата со коалициските партнери.

Владејачката коалиција со декларација го реафирмираше ставот дека следните парламентарни избори ќе се одржат во редовниот термин, односно во 2024 година.

„Во наредниот период продолжуваме со одговорот на кризата, преку испорачување нов пакет антикризни мерки, системски реформи, неселективна борба против високата корупција и усогласување на изборното законодавство со препораките на ОБСЕ и ОДИХР“, рече Ковачевски.

Во однос на најавите од ВМРО-ДПМНЕ дека ако нема договор за предвремени избори до крајот на летото ќе го блокираат системот, Ковачевски одговарајќи на новинарски прашања рече дека уцени не прифаќа.

„Тие ги блокира општините откако станаа градоначалници. Во сите градови по првичното фотографирање каде беа промовирани претходни проекти на СДСМ веќе нема ни фотографирање, бидејќи не постојат нови проекти“, рече Ковачевски.

За најавите за блокадатите во Собранието, како што рече, секој може да блокира, но тоа не е одговорно. Апелираше до пратениците на опозицијата да бидат на ниво на задачата бидејќи законите се од интерес на граѓаните.

„ВМРО-ДПМНЕ е единствена неодговорна опозиција во цела Европа која што наместо да низ дијалог во Собранието и во собраниските комисии каде што и е местото за носење и унапредување на законските решенија, единствено што прави е блокирање на законите кои што се од интерес на граѓаните и компаниите.“ рече Ковачевски.

Прашан како ќе функционира државата во време на криза со оглед на несогласувањата со опозицијата, Ковачевски одговори: „Државата ќе функционира како до сега“ и обраложи дека и досега се носат антикризни мерки кои даваат резултати.

„Владата во време на корона кризата донесе мерки во износ од 1,2 милијарди евра, пакети антикризни мерки. Јас бев тој кој тие антикризни мерки ги предлагаше како заменик-министер за финансии во Собранието. Овде има претседатели на партии кои се пратеници на Собранието и тие добро знаат дека јас таму бев деноноќно . И тогаш имаше блокади и тогаш кога се носеше пакетот антикризни мерки пратениците на опозицијата излегуваа надвор, гледаа дали има доволно пратеници од власта без да мислат на граѓаните. Уште минатата година донесовме мерки кои се однесуваа на намалување на ДДВ-то на електрична енергија и тие ги донесовме“, изјави Ковачевски.

Премиерот истакна дека и оваа година во март Владата донесе 26 антикризни мерки за справување со енергетската криза и кризата со зголемување на цените на енергенсите.