Македонија
(Видео) Костадинов: ВМРО-ДПМНЕ кочи закони и преку собраниските комисии

ВМРО-ДПМНЕ, освен законите што се наоѓаат на пленарни седници, ги кочи и законите што се распределени во комисиите, онаму каде што оваа партија има претседатели, тоа покажува дека единствена задача на пратениците на ВМРО-ДПМНЕ е да кочат сѐ што е во интерес на граѓаните, истакна пратеникот и портпарол на СДСМ, Костадин Костадинов, во одговор на новинарски прашања.
„ВМРО-ДПМНЕ апсолутно кочи сѐ во Собранието. Зошто е важно да не се дојде и да се гласа на дневниот ред, каде што има точки кои тие барале да бидат на дневен ред, меѓу кои се и двете нивни барања за интерпелации? Тука не се само тие точки на дневен ред, тука се и автентичните толкувања, исто така поднесени од пратеници на ВМРО-ДПМНЕ, и не е проблем функционирањето само во рамките на пленарните седници. Што правиме во комисиите што во согласност со методологијата ги водат пратеници од ВМРО-ДПМНЕ и како претседатели, но и како заменици на комисиите? Токму таква е Комисијата за финансирање и буџет. Зошто се кочат закони, како, на пример, законот за заем за модернизација на земјоделството, како тие пратеници од ВМРО-ДПМНЕ што доаѓаат од Ресен, Струмица или од тие региони ќе се оправдаат пред граѓаните дека кочат закон каде што се предвидува изградба на регионални откупни пунктови, кои се важни за луѓето што се занимаваат со земјоделство од овие региони“, порача Костадинов.
Костадинов истакна дека сите опозициски партии во Собранието се посветени на блокада на работата на парламентот дејствувајќи директно на штета на граѓаните што ги избрале повикувајќи ги да се откажат од намерите за деструкција.
„Да, и јас ќе ја искористам оваа пригода, ја искористи и претседателот на Собранието да повикаме на разум затоа што и при креирање на Уставот и на Деловникот ниту еден пратеник не можел да претпостави дека ќе имаме опозиција таква каква што ја имаме сега, која ќе кочи закони за поддршка на законите затоа што ова никогаш не се случувало во државата и не би требало да се случува доколку имавме разумна опозиција. Што се случува сега? ВМРО-ДПМНЕ и Левицата поднесуваат амандмани за законот за државјанство и за таа цел Алијансата и Алтернативата се договараат да кочат сѐ што во Собранието е важно за граѓаните. Ова не алудира на ништо, освен договор помеѓу опозициските партии, мислејќи и на ВМРО-ДПМНЕ, Левицата, Алијансата и на Алтернативата, за кочење на важните процеси во Собранието, што е срамно, жално и погубно за нив.
Костадинов оцени дека сето ова што опозицијата, а првенствено ВМРО-ДПМНЕ, го прави во Собранието, ќе се одрази и на следните локални избори.
„И, политички, многу е лесно да кажам – да, со сигурност тоа ќе се одрази на наредните локални избори, но што правиме сега. Сметам дека редно време е да се издигнеме над партиските интереси, да се ставиме во функција на граѓаните, во функција на оние што седиме овде и земаме плата или нека излезат и нека дадат одговор. Доаѓаат во сала, се потпишуваат на листата за присутни и си одат. Сме немале кворум затоа што сме имале позитивни и болни пратеници, имаме и веројатно дека ќе продолжиме да имаме, тоа не можеме да го предвидиме“, порача Костадинов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ реагира на изјавите на Мицкоски: Единствениот „програм“ што му останал е омразата, потценувањето и исклучувањето на Албанците

„Додека Христијан Мицкоски продолжува со викотници, навреди и провокации во отсуство на каков било конкретен успех на неговата влада, граѓаните јасно гледаат дека единствениот „програм“ што му останал, пред неуспесите на владата што ја предводи, е омразата, потценувањето и исклучувањето на Албанците, клеветите и поттикнувањето на меѓуетничка поделба“, велат од ДУИ.
„Тој вели дека ДУИ имала 23 години да го покаже својот капацитет? Токму во тие години земјата стана членка на НАТО, се доближи до ЕУ, го изгради најфункционалниот модел на мултиетнички соживот во регионот и придонесе за регионалната стабилност преку дијалог и мудрост.
Земјата стана пример за регионот.
Мицкоски и неговата партија, од друга страна, отсекогаш се идентификувале со меѓуетничка омраза, блокади, изолација и масовна корупција.
Тие секогаш биле против секој стратешки напредок на државата, од Охридскиот договор, преку НАТО, до ЕУ. Денес, освен стратешкиот, го изгубија и моралниот компас.
Штитејќи ги своите луѓе вмешани во трагедијата во Кочани, подготвени се да ги следат и заплашуваат родителите на жртвите за да ги спасат виновниците.
Потценувањето и исклучувањето на Албанците можеби ќе му донесе неколку радикални гласови во неговата партија, но на среден и долг рок тој сее семе на поделба што ќе тежи врз идните генерации.
А тоа е историска одговорност што ниту Мицкоски, ниту кој било друг, не може да ја испере со демагогија. Во меѓувреме, неговите албански портпароли го вратија времето на вазалството меѓу Албанците.
Но, со тоа само ја зацврстија убеденоста на секој Албанец дека честа и достоинството на нашиот народ не можат да бидат згазени од задоцнети националисти, дискредитирани клептократи, а уште помалку од вазали кои станаа срам за народот.
ДУИ останува партија на достоинството, обединувањето и прогресот. Нема да дозволиме омразата да ја замени надежта, ниту поделбата да го замени начелото на еднаквост.
Албанците со гордост се соочувале со историјата и ќе се соочат и со овој срамен обид за исклучување, потценување и угнетување. Наредните избори стануваат референдум против изолирана, поделена и корумпирана Северна Македонија“, соопштуваат од ДУИ.
Македонија
„Влен“: Носиме промени со имиња што го прават секој граѓанин горд

„Во време кога на земјата ѝ се потребни професионализам, посветеност и вистинскo претставување повеќе од кога било, „Влен“ го презема следниот храбар и визионерски чекор: назначување на двајца од најподготвените и најпочитуваните кадри на нашето општество на клучни позиции, проф. д-р Азир Алиу, министер за здравство, и Албрим Хоџа, заменик-министер за земјоделство. Професорот Азир Алиу, неоспорна личност во областа на технологијата, иновациите и високото образование, ќе го води Министерството за здравство со јасен приоритет: дигитализација на здравствениот систем за модерна и ефикасна услуга за граѓаните“, велат од „Влен“.
„Во исто време, Албрим Хоџа, моќен глас на терен, со длабоко искуство во новинарството, руралната политика и проектите за развој на земјоделството, ја презема улогата на заменик-министер за земјоделство со непоколеблива мисија: безрезервна поддршка на земјоделците и селото.
Назначувањето на овие двајца кадри јасно покажува дека „Влен“ не прави компромис кога станува збор за квалитет и претставување. Знаеме дека граѓаните заслужуваат повеќе, а со овие луѓе во институциите, ќе имаат повеќе!“, се додава во соопштението на „Влен“.
Македонија
Без вода дел од Центар

Од ЈП Водовод и канализација Скопје известуваат дека денеска поради уличен водоводен дефект од ф 150мм на улицата Самоилова бр.50 во Центар, со прекинато водоснабдување ќе бидат корисниците од улицата Самоилова, улицата Јоаким Крчовски и улицата Банатска.
Водоснабдувањето ќе биде прекинато од 08:40 часот до завршување со санирање на дефектот.