Македонија
(Видео) Кузевска: Скопје е пред банкрот

Главниот град Скопје е пред банкрот, локалната власт на ВМРО-ДПМНЕ создаде хаос, изјави на прес-конференција портпаролката на СДСМ, Богданка Кузеска.
Таа рече дека во јавноста веќе има информации дека Град Скопје е со блокирана сметка поради заостанати долгови.
„Мицкоски, Арсовска, ВМРО-ДПМНЕ, најголемата единица на локалната самоуправа, со убедливо најголем буџет од 100 милиони евра, Скопје, го доведоа до банкрот. Досега вакво нешто се нема случено. Но, секогаш кога оваа партија ќе дојде до власт и во допир со парите на граѓаните, на Скопје му се случува катастрофа. Празната каса на Град Скопје значи и помалку пари за јавните претпријатија, кои и сега не функционираа како што треба. Јавниот превоз е во колапс, вработените во ЈСП веќе еднаш штрајкуваа, протест имаше и во ЈП ‘Комунална хигиена’, а катастрофална е ситуацијата и во ‘Водовод и канализација’, во ‘Градски паркинг’ и во другите претпријатија и установи под надлежност на Град Скопје“, рече Кузеска.
Како што додаде, при доаѓањето на власт, ВМРО-ДПМНЕ и Данела Арсовска наследија полна каса, со активни 13 милиони евра на сметка, со годишен буџет од над 100 милиони евра. Вели дека парите се потрошени, а не е изградено ништо.
Таа праша каде завршија парите на скопјани, парите на граѓаните? Сума од над 100 милиони евра.
„Како може да нема ниту еден, повторувам, ниту еден реализиран проект, а Градот да биде без пари? Сè брцале раце во медот? Расипнички се трошело? Скопје, скопјани, очекуваат одговори“, рече Кузеска.
Најави дека советничката група на СДСМ и коалицијата ќе побара свикување итна седница на Советот со единствена точка на дневен ред – расправа за актуелната финансиска состојба во Градот.
Од Арсовска, Мицкоски и ВМРО-ДПМНЕ ќе побараат одговори и образложенија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Силниот ветер ја влоши состојбата со пожарот во „Јасен“

Состојбата со пожарот во ловиштето „Јасен“ попладнево значително се влоши поради силниот ветер, информира директорот на Дирекцијата за заштита и спасување (ДЗС), Стојанче Ангелов.
„Јачината на ветрот постепено се зголемуваше и ни предизвика голема непријатност затоа што пожарот се движеше со исклучително голема брзина горејќи ги боровите стебла, создавајќи висока температура и многу густ и црн чад што удираше на гребенот. Нашата цел беше да го одбраниме гребенот и да не му дозволиме на овој пожар да прескокне преку гребенот од страната на селото Брезница, односно од скопска страна. Во тоа успеавме по неколку жестоки битки бидејќи огнот на неколку моменти префрли од другата страна, но благодарение на храброста на вработените во ‘Јасен’, лично овде е и директорот, еден од раководителите, со поддршка од екипа пожарникари од Македонски Брод, успеавме да го запреме по самиот гребен, ги изгаснавме местата на кои огнот префрли од другата страна и ја стабилизиравме ситуацијата“, рече Ангелов.
Пожарот сè уште се движи и создава густ чад што им предизвикува проблеми со дишењето на луѓето на теренот. На помош пристигнуваат пожарникари од Скопје, Велес и Куманово што ќе ги распоредат. Истовремено поддршка стигна и од вработените од Општината Сопиште кои цело време вршат дотур на вода, покрај другите активности. Тука се и припадници на Единицата за брзо распоредување (ЕБР) на МВР.
Македонија
Министерството за здравство формира независна меѓународна комисија по изјавата на Кедев за непотребни кардиолошки интервенции

Министерот за здравство, Азир Алиу, најави формирање комисија со експерти од три различни земји за проверка на работењето во приватните здравствени институции, но и продолжување на контролите во јавните здравствени установи кои се занимаваат со истата проблематика. Одлуката следи по изјавата на кардиохирургот, Сашко Кедев, дека во некои приватни болници се вршат непотребни интервенции со цел профит, вклучувајќи и стентирања и операции.
Алиу рече дека комисијата ќе биде независна и дека извештајот ќе служи како патоказ за понатамошни мерки. Од наредниот месец, приватните здравствени установи ќе мора да ги отворат базите со информации за кардиолошки интервенции, со цел Министерството да ги агрегира податоците и да има увид во здравствените патеки на граѓаните.
Министерот потврди дека има база со информации од 2019 до 2025 година за кардиолошки интервенции во јавните и приватните установи и дека ќе се сретне со д-р Кедев за понатамошна соработка. Фондот за здравствено осигурување, пак, ги следи сите прашања за квалитетот и законитоста на услугите, но оценката на медицинската оправданост останува надлежност на Државниот здравствен и санитарен инспекторат и специјалните комисии формирани од министерот.
Македонија
Никоски: Новата градинка во Потстаница, Драчево, значи подобра грижа за децата и поголема поддршка за семејствата

Како напредуваат градежните работи за новата градинка во Потстаница, Драчево, на лице место излезе да провери и директорот на Управата за заштита на животната средина и потпретседател на ВМРО-ДПМНЕ, Игор Никоски, заедно со премиерот Христијан Мицкоски, заменик-министерот за труд и социјала Ѓоко Велковски и градоначалникот на Општина Кисела Вода,Орце Ѓорѓиевски.
„Oвој објект e со вкупна површина од 300 квадратни метри и дополнително дворно уредување од 700 квадратни метри. Тој ќе обезбеди подобра грижа за децата и поголема поддршка за семејствата во овој дел од општината. Овој проект е доказ за нашата посветеност кон социјалниот развој и унапредување на квалитетот на животот во Кисела Вода“, рече директорот Никоски.
Градоначалникот на Кисела Вода, Орце Ѓорѓиевски, најави дека новата детска градинка ќе биде целосно завршена за само 20 дена и дека во неа ќе бидат згрижени 75 деца.