Наградата „Евалд фон Клајст“, што Минхенската конференција за безбедност ја доделува како признание за особен придонес за мирот и стабилност во светот и за афирмација на принципите на трансатлантската алијанса, на двајцата премиери, Зоран Заев и Алексис Ципрас, им ја врачи министерот за надворешни работи на Германија, Хајко Мас.

„Конфликтот за име никогаш не е само борба меѓу зборови, а конфликтот меѓу Скопје и Атина никогаш не беше само за името. Тој допираше подлабоки прашања, тој допираше до идентитетот“, рече Мас.

Додаде дека последиците од конфликтот биле сериозни и се попречувала економската интеграција на целиот регион, забавени биле евро-атлантските интеграции и конфликтот бил постојан извор на спорови меѓу двете земји, и тоа не само меѓу нив, туку и во меѓународните односи, меѓутоа Заев и Ципрас покажале храброст да се согласат на болни компромиси и да се борат за договорот од Преспа и покрај силната спротивставеност во двете земји.

„Не можам да се сетам на многу шефови на влади, господине премиер Ципрас, кои останале на своето и покрај опасноста тоа да стави крај на нивната коалициска влада. Двајцата ѝ пркосевте на ситуацијата. Решавањето на прашањето за името никогаш не беше едноставна задача. Стотици дипломати од вашите земји, од ООН, од Европската Унија, од НАТО, бараа решение и под дрво и под камен. Во изминатите години специјалниот пратеник на ООН, Метју Нимиц, предложи десетина имиња. Всушност, кога тој почна да работи на ова прашање, вие двајца сè уште студиравте. А вашите министри за надворешни работи, моите колеги Никола и Никос, минаа денови и мошне долги ноќи преговарајќи меѓу себе. На сите ним им должиме почит и благодарност“, рече Мас.

Додаде дека по потпишувањето, шансите за спроведување на договорот биле многу мали, се водела и огромна кампања против договорот, но надежта им го вратила оптимизмот на лидерите.

„Кога го прашав премиерот Заев како да го насочиме договорот низ фазата на ратификација, тој се насмевна и рече: ‘Да беше лесно, немаше да мора ние да го правиме’. Таков беше духот на преговорите, тој беше гаранцијата за успех. Успеавте да ја свртите страницата на конфликтот од минатото, отворивте ново поглавје на добрососедски односи. Ѝ го поплочивте патот на Северна Македонија да стане најновиот сојузник на НАТО и бргу да се придвижи кон Европската Унија“, додаде Мас.

Премиерите Зоран Заев и Алексис Ципрас на потпишувањето на преспанскиот договор

Тој истакна дека Евалд фон Клајст се одликувал со многу од особините што ги покажале Заев и Ципрас. Ги одбил сите форми на национализам, покажал огромна храброст кога се приклучил на силите на отпорот за да стави крај на нацистичкиот режим. И никогаш, како што рече Мас, не престанал да верува во способноста на луѓето заеднички да работат во полза на мирот.

„Не можам да се сетам на други двајца подостојни приматели на наградата ‘Евалд fон Клајст’ од вас двајца, Алексис Ципрас и Зоран Заев. Ви честитам за наградата и ви благодарам што сте вистински европски лидери“, додаде министерот во обраќањето.