Македонија
(Видео) Манчевски: ВМРО-ДПМНЕ во својата програма ветува проекти што СДСМ веќе ги спроведе

„Безидејноста на ВМРО-ДПМНЕ и отсуството на допир со реалноста се чита на секоја страна од нивната програма. За мене беше големо изненадување, но и разочарување кога согледавме дека нивната програма е всушност збир на веќе реализирани проекти само ставени во идно време. Просто е и неверојатно да се поверува. И додека ние се надевавме на противник со кого ќе можеме да дебатираме за кој нуди подобри политики за подобар живот на граѓаните се соочивме со програма која како да е пишувана пред неколку години“, изјави Дамјан Манчевски, потпретседател на СДСМ и кандидат за пратеник од ИЕ 1.
„Направиве анализа на нивната програма во делот на дигитализацијата. Еве што велат:
1. НАМАЛУВАЊЕ НА ЦЕНИ ВО РОАМИНГ ВО ЗАПАДЕН БАЛКАН 2020 И 2021 ГОДИНА И УКИНУВАЊЕ ВО 2022 ГОДИНА
– Реалноста е дека веќе една година во земјите од Западен Балкан, нашите граѓани користат услуги во роаминг по цени до 99% поевтини. Од 1-ви јули 2021 година цените во роаминг целосно ќе се укинат. Во координација со Европската Комисија веќе се изработува план со рокови за „роаминг како дома“ во земјите од ЕУ.
2. ЦЕНТРИ ЗА ЕДНА ТОЧКА ЗА УСЛУГИ
– Реалноста е дека веќе се отворени 2 центри, во Скопје и Тетово, а во завршна фаза се во Охрид и Куманово.
3. ПОРТАЛИ ЗА Е-УСЛУГИ И АПЛИКАЦИИ ЗА МОБИЛНИ УСЛУГИ
– Реалноста е дека националниот портал за е-услуги uslugi.gov.mk беше пуштен во употреба на 16.12.2019 година преку кој веќе се нудат 136 електронски услуги. Бројот секојдневно расте.
4. ИСПОРАКА НА УСЛУГИ И ИКТ ПОДДРШКА НА АДМИНИСТРАЦИЈАТА. Достапност 24/7 на услугите кои ги нуди јавната администрација.
– Услугите се веќе достапни 24/7 од електронските уреди на граѓаните преку порталот uslugi.gov.mk
5. Е-ИНСПЕКТОРАТИ
– Реалноста е дека во август 2017 година започна процесот на модернизација на инспекциските служби. Веќе е развиен софтвер за инспекциските служби со поддршка на USAID. Чек листите за инспекциски надзор се веќе воведени во 2019 година со новиот Закон за инспекциски надзор.
6. НОВ ЗАКОН ЗА ЕЛЕКТРОНСКИ КОМУНИКАЦИИ СОГЛАСНО ЕВРОПСКАТА РЕГУЛАТИВА
– Реалноста е дека во 2019та година оваа активност е пријавена во Националната програма за усогласување со европското законодавство и веќе се работи на транспозиција со европското законодавство.
7. ДИГИТАЛЕН ФОРУМ ЗА ИНФОРМАЦИСКО-КОМУНИКАЦИСКИ ТЕХНОЛОГИИ/ Буџет: 10 милиони денари годишно.
– Реалноста е дека Дигиталниот форум е веќе е формиран и има активна улога. Во моментот ДФ е задолжен за определување на Листа на даватели на дигитални вештини кои ќе можат да ги користат младите помеѓу 18 и 29 години. Дигиталниот форум функционира веќе како советодавно тело и работи без надоместок.
8. ДОЛГОРОЧНА СТРАТЕГИЈА ЗА ИКТ
– Националната ИКТ стратегија веќе е во завршна фаза. Ја работиме со финансиска поддршка на ЕУ. Ангажирани се странски експерти и стратегијата треба да е готова до 30 септември.
9. ДИГИТАЛНА АГЕНЦИЈА
– Реалноста е дека процесот за основање на Дигиталната агенција е веќе започнат. Законот е веќе изготвен и објавен на ЕНЕР за консултации.
10. ИТ СОВЕТ
– ИКТ совет за прв пат e формиран во 2018 година.
11. УНИВЕРЗАЛНА ЕЛЕКТРОНСКА ИДЕНТИФИКАЦИСКА КАРТА И ВОВЕДУВАЊЕ НА ИНФРАСТРУКТУРА НА ЈАВЕН КЛУЧ
– Реалноста е дека е веќе воведена со Законот за електронски документи, електронска идентификација и доверливи услуги од 29.05.2020 година. Електронската идентификација веќе се употребува од 16.12.2019 година, како услов за функционирање на порталот uslugi.gov.mk.
12. СЕКТОРСКА ПЛАТФОРМА/ ПРОЕКТ и ONLINE ЈАВНИ ДЕБАТИ ЗА ПРЕДЛОГ-ЗАКОНИ
– Се ова веќе постои на ЕНЕР. Сега на ЕНЕР ова е возможно, дотолку повеќе што оваа година воведовме отворен модул за „Форум“ со сите засегнати страни.
13. МАПИРАЊЕ НА БЕЛИТЕ ЗОНИ И ОБЕЗБЕДУВАЊЕ НА БРЗ ИНТЕРНЕТ
Белите зони се веќе мапирани и ова се јавно достапни податоци. Ја формиравме и Националната канцеларија за бродбенд компетентност. Државата го донесе Националниот оперативен бродбенд план со кој се планира изградба на национална оптичка транспортна мрежа до 2025 година која треба да обезбеди брз интернет пристап од 100 Мбпс во сите делови од земјата. За ова добивме грант од Инвестицискиот фонд за Западен Балкан и сме во завршна фаза на преговорите за кредит од Светска банка во вредност од 35 милиони евра“, вели Манчевски.
Според него, за жал има уште многу вакви примери.
„Искрено сум разочаран. Навистина очекував после толку критики, многу повеќе. Очекував и можеби некоја добра идеја. Но нема. Се работи за неверојатна безидејност и непознавање, дури на граница на опасно.Но, ние покажавме дека можеме. Еве и програмата на ВМРО-ДПМНЕ како да е список на работи кои веќе сме ги направиле во областа на дигитализацијата. Можеме уште повеќе и уште подобро и тоа ќе го покажеме после 15 јули“, додава тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нови противпожарни апарати поставени во сите училишта и градинки во Општина Карпош

Општина Карпош издвои 1.440.000 денари за набавка на нови противпожарни апарати, наменети за сите основни училишта и детски градинки на територија на Карпош.
По тој повод, градоначалникот Стевчо Јакимовски, денеска беше во обиколка на ООУ „Христијан Тодоровски Карпош“, каде непосредно ја констатираше фактичката состојба со оваа училишна установа од аспект на безбедноста.
„Шест месеци пред трагедијата во Кочани, Дирекцијата за заштита и спасување ја алармираше нашата институција дека фирмата којашто ги одржува противпожарните апарати во Карпош, односно во училиштата и градинките, практично прави груба злоупотреба со тоа што истите противпожарни апарати не ги проверува туку ги зема и ги враќа назад, при што само ги менува контролните картончињата на уредите. Оттаму Дирекцијата не потсети дека законска обврска е да немаме противпожарен апарат во објектите, којшто е постар од пет години. Кога направивме една комплетна анализа, за жал констатиравме дека овде имаме противпожарни апарати од 1955-та година“, објасни Јакимовски.
Првиот човек на Општината предупреди на потенцијалниот ризик и несаканите последици кои можеа да настанат од оваа ситуација.
„Не дај Боже да се случеше некој немил настан. Тој дел од противпожарната заштита бил целосно незаконски а згора на сè, неодговорноста на фирмата којашто ние секоја година ја избираме и која е должна да ни ги воочи недостатоците што ги имаме во противпожарниот систем во градинките и училиштата го прави токму спротивното. Затоа општина Карпош издвои околу 55 илјади евра за набавка на нови 453 противпожарни апарати S-9 и CO2, кои служат за гаснење на пожар, доколку истиот е предизвикан од спој со електричната мрежа“ – образложи Јакимовски.
Во оваа пригода тој изрази голема благодарност до Кинеската амбасада, која донираше 98 противпожарни апарати во градинките и училиштата на територија на Карпош.
Во исто време, додаде Јакимовски, издвоивме уште 1.700.000 денари за проверка и реконструкција на хидрантската мрежа во сите училишта и градинки, затоа што во некои од нив не е соодветна инсталацијата од цевководи.
„Од тие причини летоска ќе ги извршиме потребните реконструкции и некаде во септември, сите училишта и градинки ќе бидат комплетно опремени со соодветна опрема за заштита од пожар“, истакна Јакимовски.
Македонија
Предупредување за земјоделците од АД МЕПСО

АД МЕПСО ги предупредува земјоделците во екот на сезоната за наводнување и жетва, да бидат особено внимателни додека ракуваат со опремата за наводнување, со земјоделската механизација и со дополнителната земјоделска опрема во близина на далекуводите од преносната мрежа. Од исклучително значење е земјоделците да се придржуваат кон следните напаствија:
– Не поминувајте со комбајни или друга робусна земјоделска механизација под проводниците
– Не поставувајте цевководни системи за наводнување под проводните јажиња во далекуводните траси
– Не ги кревајте во височина металните цевки од системите за наводнување под проводните јажиња на далекуводите бидејќи металот е проводник на електрична енергија
– Не ги поставувајте прскалките за наводнување под проводните јажиња и во безбедносните коридори на далекуводите од преносната мрежа. Допирот на водениот млаз со проводните јажиња може да биде кобен по животот на луѓето кои се наоѓаат под трасата на далекуводот
– Не палете стрништа во близина на далекувод бидејќи се загрозува доверливоста на електроенергетскиот систем
„Дополнително апелираме спортските риболовци да бидат особено внимателни при манипулација со риболовните стапови во близина на далекуводи, а граѓаните да не вршат градежни работи на трасите на далекуводите, под јажињата за пренос на електрична енергија“, велат од МЕПСО.
Македонија
Полицајците во „Пулс“ не презеле мерки да спречат активирање на пиротехниката, чие палење не било пријавено во полиција

Истрагата за пожарот во Кочани вчера беше проширена за уште 13 полицајци од СВР Штип. Според информациите на МВР, тие одобриле план за акциска контрола без да проверат дали ги има опфатено сите проверки во надлежност на МВР и, исто така, не презеле мерки да спречат активирање на пиротехниката, чие палење не било пријавено во полиција.
Против нив е поднесена кривична пријава за „тешки дела против општата сигурност“.
„Тие како соизвршители не постапиле според прописите за мерките за заштита – одобриле План за акциска контрола на угостителски објекти на подрачјето на Полициската станица Кочани без да проверат дали истиот ги има опфатено сите проверки во надлежност на МВР и дали се запазени одредбите од Стандардните оперативни процедури за проценка и управување со ризик при вршење на полициски работи“, соопшти МВР.
По овој план, кој бил изготвен врз основа на претходно изготвени планови, без какви било измени, било постапено и на 16.03.2025 на место каде што биле собрани поголем број на луѓе до дискотеката „Пулс“.
Исто така, не преземале мерки да спречат активирање на пиротехничка опрема на сцената каде настапувала музичката група ДНК во моментот кога ја вршеле контролата, а чие палење не било пријавено во Полициската станица Кочани и како последица на палење на пиротехниката настанал пожар во дискотеката.
„На овој начин, со не преземање мерки за заштита на присутните лица и поради несоодветните услови за работа, во текот на акциската контрола настанал пожар во кој починале 62 лица, а 157 лица се здобиле со потешки телесни повреди, a 54 телесни повреди“, соопшти МВР.
Јавниот обвинител на Судот предложи спрема осомничените да се определат следните мерки на претпазливост, и тоа: забрана за напуштање на живеалиштето, односно престојувалиштето, обврска на обвинетиот да се јавува повремено на определено службено лице или кај надлежен државен орган кој ќе го определи Судијата на претходна постапка, привремено одземање на патна или друга исправа за преминување на државната граница односно забрана за нејзино издавање, Забрана за приближување или воспоставување, односно одржување контакти или врски со определени лица – осомничените во оваа постапка, како и Забрана за преземање на определени работни активности –полициски службеник.