Македонија
(Видео) Маркоска: ДПМНЕ да не бега, веднаш да закаже седница на комисијата за Онкологија

„Трет ден ДПМНЕ и пратеничката Рашела Мизрахи бегаат откако направија срамна злоупотребата на анкетната комисија. Бараме веднаш да се закаже седницата на собраниската анкетна комисија за случајот на Онкологија. ДПМНЕ не може да побегне од вистината. ДПМНЕ не може да побегне од јавноста“, рече Даниела Маркоска, пратеничка на СДСМ.
„Ваков скандалозен однос не заслужуваат граѓаните, македонското Собрание, пациентите од Онкологија. Јавноста гледа дека на ДПМНЕ воопшто не ѝ била важна вистината, не биле важни пациентите, тие немале намера воопшто нешто да преземат.
Замислете, откако ги фативме како сакаат да ја злоупотребат анкетната комисија, три дена ДПМНЕ бега од комисијата што ја води претседателка од нивната партија.
Се потврдува она во што се сомневавме уште од почетокот, дека намерата на ДПМНЕ е да ја опструира истрагата на надлежните институции и да ја залоупотребува во политички цели.
Наместо да бегаат, ДПМНЕ веднаш да ја свика седницата на собраниската анкетна комисија за случајот на Онкологија.
Како пратеници и членови на комисијата имаме обврска пред граѓаните, пред пациентите, да донесеме соодветни заклучоци и да ја информираме јавноста“, соопшти Даниела Маркоска, пратеничка на СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево време со изолирана појава на нестабилност попладне

Времето денес ќе биде сончево со мала до умерена локална облачност. Попладне во југоисточните делови ќе има услови за изолирана појава на нестабилност со краткотраен пороен дожд и ретки грмежи. Ќе дува слаб до умерен ветер претежно од западен правец. Минималната температура ќе биде во интервал од 10 до 18, а максималната ќе достигне од 28 до 35 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 16, а максималната ќе достигне до 34 степени.
Во четврток ќе дува умерен до засилен, а во петок повремено силен јужен ветер. Во сабота ќе има услови за повремен локален дожд и појава на ретки грмежи. Ќе дува умерен, долж Повардарието повремено засилен северен ветер, кој ќе продолжи и во недела, а дневната температура ќе биде во опаѓање.
Македонија
Битиќи: Ја добивме битката, концесијата дадена од ВМРО-ДПМНЕ, падна на арбитража

Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата ја доби битката, нема да плати штета од 115 милиони евра, реагира пратеникот на СДСМ, Фатмир Битиќи и поранешен вицепремиер.
„Да се потсетиме: Случајот односно судските рочишта се затворени во 2023 година. Арбитражниот суд носи конечна пресуда во рок од две (2) години по завршните зборови. Тимот што ги застапуваше правата на нашата држава во целиот тој процес се водеше со јасни определби и насоки од страна на мојот кабинет во претходната Влада“, наведува Битиќи.
И затоа, додаде тој, искрена благодарност до White & Case, нашите главни застапници во арбитражата, државните службеници и експерти кои вложија знаење и енергија, како и до локалните адвокатски друштва за нивната посветеност и професионалност.
„Благодарност до сите што ги застапуваa интересите на државата. Вака се почитува татковината, со искрен настап и без калкулации – а за оние кои имаа други интереси, иднината ќе покаже“, стои во објавата на Битиќи.
Македонија
Поради пожарот кај Јасен, затворен за сообраќај патот Македонски Брод – Скопје

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, информира АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП Табановце времето на чекање за излез е околу 30 минути, додека на останатите гранични премини од македонска страна нема подолги задржувања при влез или излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.