Македонија
(Видео) Милошоски: Лога во координација со Ахмети и Ковачевски на шверцерски начин го измени Законот за Академијата за судии и јавни обвинители

„Значи би сакал кратко денес прес конференцијата да ја посветам на Академијата за судии и јавни обвинители. Имено, веќе ви е познато дека министерството за правда на Кренар Лога во координација со Ахмети и со Ковачевски на шверцерски начин во Собранието со злоупотреба на европското знаменце го измени Законот за Академија за судии и јавни обвинители. И оној главен испит за влез на слушатели во Академијата кој што треба да се полага само електронски и е европско правило, го сменија и по исклучок ставија дека може истиот да се полага и по писмен пат, затоа што ДУИ, СДС и Кренар Лога имаат веќе однапред подготвен список за следните 130 слушатели на оваа Академија, кои што треба да бидат идни судии и обвинители“, рече Антонијо Милошоски, член на ИК на ВМРО-ДПМНЕ и пратеник.
„Имаме информација од Академијата за судии и обвинители дека овие денови треба да се одржи Управен Одбор на Академијата за судии, на која што ќе се разгледува и прашањето за тоа кога да се полага овој според нас штелуван писмен главен испит за прием на слушатели на академијата.
Она што тие го предвиделе во самата Академија се членовите во одредени закони, Имено во Законот за Академија за судии и јавни обвинители член 50 е запишано дека слушателот во академијата заснова работен однос на определено време.
Тоа значи дека постапката за полагање на електронски или писмен испит е постапка за вработување во Академијата за судии и јавни обвинители.
Истовремено напоменуваме дека во Изборниот законик во член 8 А е јасно запишано дека од денот на распишување до денот на завршување на изборите не може да започне, ниту смее да продолжи било која постапка за вработување. Тоа е наведено во членот 8 А од Изборниот законик.
Ова како начелен став го потврди и Државната комисија за спречување на корупцијата два дена по распишувањето на изборите.
Затоа укажуваме најсериозно до сите членови на Управниот одбор на Академијата за судии дека секој кој што ќе гласа за полагање на писмениот главен испит за прием на слушатели во оваа академија ќе го прекрши Член 8 од Изборниот законик и со самото тоа ќе се изложи на кривична пријава за несовесно работење во службата.
Се надеваме дека директорката Габер Дамјановска знае дека почитувањето на Изборниот законик е поважно од желбата на внуката на Рамиз Мерко г-ѓа Ерканда Баута незаконито да стане судија.
Сакам да верувам дека и претседателот на Управниот одбор на Академијата Беким Мехмеди, знае дека владеењето на правото е побитно од желбата на Мики Крстев, заменик министер од СДС да стане обвинител со наместено полагање на писмен тест во време на распишани избори.
И сигурен сум дека државниот обвинител Коцевски знае дека желбата на Мурат Асанов Шабани од Струга да се пикне во обвинителството со полагање на писмен испит во забранет изборен период е законски казниво и за двајцата.
Затоа, почитувани членови на Управниот одбор на Академијата за судии и јавни обвинители, ви укажуваме дека ќе сносите кривична одговорност доколку гласате за полагање на писмениот испит во време на распишани избори, затоа што истиот е дел од постапка за вработување кое е законски забрането. Размислете затоа што владеењето на правото е многу побитно од кариерата на некои блиски луѓе на Рамиз Мерко. Вие сте судии, вие сте обвинители, вие сте членови на Управниот одбор и вашата кариера и денес и во иднина ќе зависи многу од оваа одлука.
Затоа што и вие сносите одговорност за одлуките кои ги носите особено ако тие одлуки се спротивни на законот. Не се надевајте дека изборната кампања и вниманието на медиумите за тоа кој и каде ќе биде на изборните листи ќе го заборави овој случај или дека ќе го остави настрана незабележано вашето дејствување како одговорни членови во Академијата за судии“, изјави Антонијо Милошоски, член на ИК на ВМРО-ДПМНЕ и пратеник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Сиљановска-Давкова во црквата на македонската заедница во Стерлинг Хајтс, Мичиген: Татковината не може да се менува

Со посетата на македонската православна црква „Раѓањето на Пресвета Богородица“ во Стерлинг Хајтс, Мичиген и средбата со македонската заедница, претседателката Гордана Сиљановска-Давкова ја заокружи работната посета на САД.
Таа присуствуваше на утринската литургија што ја одржа отецот Синиша Ристовски и оствари куса средба со Митрополитот на Американско-канадската епархија на МПЦ – ОА, Владиката Методиј.
Во име на свештенството, отецот Синиша истакна дека им претставува огромна чест присуството на претседателката Сиљановска-Давкова. „Вие носите одговорност којашто инспирира доверба, почит и надеж, со секоја ваша одлука, иницијатива и моќ, да ги преобрази животите, да ги осветли патеките на вистината и да создаде мостови на соработка и разбирање меѓу народите“, порача по литургијата отецот Синиша.
Претседателката го изрази своето задоволство од топлиот прием од претставниците на македонската заедница за време на нејзината посета во Њујорк и Детроит и посочи дека нивните постапки и посветеност се доказ дека каде и да сме, не го губиме македонскиот идентитет.
„И кога сум во САД, само заради вас јас се чувствувам како да сум дома. Тоа е она што ме прави горда на вас. Ние мора да си ја повратиме дијаспората“, порача претседателката.
Таа укажа на важноста од одржување и засилување на врските со македонските иселеници и ги реафирмираше заложбите за формирање на Совет за дијаспора и регистер на дијаспората.
Оддавајќи им признание на нашинците за нивната успешност на професионален план дури и во најкомпетитивните држави како САД, претседателката им посака уште многу успех.
Цитирајќи го Бернард Шо кој рекол дека „се може да смените во животот, но татковината не може“, Сиљановска-Давкова порача: „Мораме тоа што сме го наследиле да им го пренесеме на своите деца, ако сакаме да опстоиме“.
Претседателката го посети и Неделното црковно училиште што функционира во рамки на црквата, а каде што околу 120 македонски деца имаат можност да се запознаат со православната религија, со македонската традиција и да го изучуваат македонскиот јазик.
Македонија
Виз ер отвори уште една нова авиолинија од скопскиот аеродром – Штутгарт

Со првиот лет што полета денеска, понеделник, 29 септември, во 6:25 часот наутро, од Меѓународниот Аеродром Скопјe до Штутгарт, Виз ер отвори уште една нова авиолинија и дестинација од главниот град на Македонија до Германија, соопшти ТАВ Македонија, подружница на ТАВ Аеродроми, членка на Групацијата ADP.
„Во соработка со Виз Ер и Владата, како ТАВ Аеродроми горди сме што ќе можеме да ги опслужуваме патниците на оваа нова редовна авионска линија од Скопјe до Штутгарт. Редовните летови меѓу двата града ќе ги задоволат потребите на нашите граѓани, бизнисмени и дијаспората. Ќе продолжиме да инвестираме во модернизација и подобрување на аеродромските услуги, нудејќи висококвалитетно корисничко искуство на сите патници и промовирајќи ја земјата како атрактивна дестинација и транзитен центар во регионот“, изјави Неџат Курт, Генерален директор на ТАВ Македонија.
Авиокомпанијата ќе лета од Скопјe до Штутгарт 3 пати неделно, секој понеделник, среда и петок. Во текот на летниот распоред на летови на аеродромот во Скопјe, односно до 24 октомври, времето на полетување од Меѓународниот Аеродром Скопјe во понеделник и петок е 06:25 часот, додека времето на пристигнување во Штутгарт е 11:10 часот по локално време. Во среда, патниците ќе полетуваат во 06:30 часот, а ќе слетуваат во 11:10 часот по локално време.
Во зимската сезона, патувањата ќе се одвиваат во понеделник, среда и петок, но сите летови со исти времиња на полетување и следување, односно 06:30 часот со 11:30 часот по локално време.
Со додавањето на Штутгарт на мапата на рути на Меѓународниот Аеродром Скопјe, Виз ер има вкупно 9 рути до 9 градови во Германија: Штутгарт, Берлин, Дортмунд, Баден-Баден, Фридрихсхафен, Хамбург, Франкфурт-Хан, Минхен-Меминген и Нирнберг.
Македонија
Собраниска делегација во Меѓународна мисија за набљудување на парламентарните избори во Молдавија

Делегацијата во Парламентарното собрание на ОБСЕ (ПС на ОБСЕ) во состав: Моника Зајкова, шеф на Делегацијата; Никола Мицевски и Мимоза Муса, членови; како и Марија Петрушевска, шеф на Делегацијата во Парламентарното собрание на Советот на Европа (ПС на СЕ), учествуваат во Меѓународната мисија за набљудување на парламентарните избори во Молдавија, што се одржуваат на 28 септември 2025 година.
Мисијата на ПС на ОБСЕ се состои од повеќе 100 парламентарци од 34 земји на ОБСЕ, кои се распоредени за набљудување на изборите во Кишињев и околината, Анени Нои, Балци, Басарабеаска, Комрат, Каушени, Леова, Орхеј, Сорока, Резина и др. Специјален координатор на краткорочната мисија на ОБСЕ за набљудување на изборите во Молдавија е Паула Кардозо, пратеничка од Португалија, а шеф на набљудувачката мисија на ПС на ОБСЕ е Линеа Викман, пратеничка од Шведска. Мисијата на ПС на СЕ, предводена од Крис Саид, пратеник од Малта, брои 25 пратеници.
Набљудувачите на ПС на ОБСЕ и ПС на СЕ тесно соработуваат со експертите и набљудувачите од Канцеларијата за демократски институции и човекови права на ОБСЕ (ОБСЕ/ОДИХР), на чело со шефицата на Мисијата Џилијан Стирк (Канада) и со Мисијата на Европскиот парламент, предводена од европратеникот Михаел Галер (Германија).
Во пресрет на изборите, набљудувачите учествуваа на дводевни сеопфатни брифинзи со високи претставници на политичките партии и коалиции што учествуваат на изборите, со независни кандидати за пратеници, со шефот и долгорочните набљудувачи на Мисијата на ОБСЕ/ОДИХР, како и со претставници на изборната администрација, на граѓанските организации, на медиумите, аналитичари и експерти.
Меѓународната мисија за набљудување на парламентарните избори во Молдавија треба да процени дали изборите се спроведуваат согласно демократските заложби содржани во Копенхашкиот документ на ОБСЕ од 1990 година, кои вклучуваат, меѓу другото, слободно гласање, фер и слободна атмосфера на кампањата, еднаков пристап до медиумите и точно известување за резултатите. Наодите на набљудувачите ќе бидат анализирани и вклучени во Изјавата со првични наоди и заклучоци, која ќе биде претставена на Заедничката прес-конференција на Меѓународната мисија за набљудување на изборите во Молдавија, што ќе се одржи на 29 септември 2025 година во Кишињев и ќе се пренесува во живо на веб-страницата на ПС на ОБСЕ (www.oscepa.org).