Владата на СДСМ ја уништи економијата. Поскапи цени за парно и струја се нивната прва владина мерка, истакна на прес-конференција портпаролката на ВМРО-ДПМНЕ, Марија Митева.

„Актуелната ситуација со БЕГ отвори многу прашања за СДСМ и навидум независната Регулаторна комисија за енергетика. Во согласност со варирањето на цената на гасот на светскиот пазар, СДСМ И РКЕ не успеаја да предвидат или предвидоа, но премолчеа дека БЕГ нема да има услов за функционирање во грејната сезона. Второ, врз основа на кои математички пресметки РКЕ и Владата донесоа одлука за поскапување на парното 14 отсто? Бислимовски убедуваше дека нема да има проблеми со компаниите, дека компаниите се обезбедени за грејната сезона и ги држеа граѓаните во неизвесност до последниот ден. Трето, дали овие средства со кои се врши субвенционирање на БЕГ се средства што претходно се обезбедени и планирани за оваа намена?“, рече Митева.

Дополнително, како што велат од ВМРО-ДПМНЕ, оваа криза прерасна во политичка можност за обвинување на Град Скопје и општините што немаат никаква улога ниту во регулирањето на цената ниту во договарањето на набавките за гас.

„Битиќи и Бектеши се пофалија дека е решен проблемот со парното, но одбегнаа да кажат колку пари ќе ги чини граѓаните“, рече Митева и посочи дека уште еден поразителен факт е дека ТЕ-ТО сега го дава гасот на одложено плаќање, без наплата, до обезбедување на ликвидноста и до потпишување деловно-техничка соработка, што укажува на фактот дека ТЕ-ТО работи со загуба.

Од опозициската партија оценија дека ценовниот шок, кризната состојба во енергетиката, која е проследена со економска и здравствена криза, е дело на Владата предводена од  СДСМ.