„Ниската доверба во институциите е аларм за власта. Поразителни бројки, најниска доверба досега покажува последното истражување на јавното мислење во анкетата на ‘Евротинк’. Граѓаните покажале дека најмалку веруваат во судството и во институциите што се на првата линија за справување со корупцијата и криминалот. Во Обвинителството само 7 %, а во судството 6 %. И ваквите бројки не се само перцепција, зад овие резултати се кријат конкретни индикатори и состојби за кои директно е виновна власта на СДС и ДУИ“, рече денеска на прес-конференција портпаролката на ВМРО-ДПМНЕ, Марија Митева.

Таа потсети на „скандалозниот избор за првиот човек на Јавното обвинителство за гонење организиран криминал и корупција, предлагање политички кадри за членови на Уставниот суд, именување несоодветни кадри и партиски членови за претседатели на Судскиот совет, изјави за постоење политички притисоци врз членови на Судскиот совет, безброј нерешени судски случаи, уште илјада други конструирани и политички мотивирани процеси и најстрашно – криминал и корупција во првите редови на оние што треба да обезбедат владеење на правото“.

„Ова се конкретни примери, кои се резултат на политичките интереси на власта комплетно да ги партизира судството и Обвинителството. На прашањето ‘Што мислите, како институциите ја водат борбата со корупцијата?’ – 71 % сметаат дека институциите потполно лошо ја водат борбата. Фрапира фактот што испитаниците имаат негативно мислење и за Државната комисија за спречување и борба против корупцијата, каде што 70 % велат дека воопшто немаат доверба во оваа институција. Со само 1 % пониска недоверба од ДКСК е Владата, со 69 % од испитаниците, кои велат дека воопшто не ѝ веруваат на оваа Влада“, рече Митева.