ВМРО-ДПМНЕ продолжува јавно да бара одговори од власта, која за автобуската несреќа, во која 45 наши сограѓани ги загубија своите животи, сѐ уште нема никаква одговорност.

„Власта треба да одговори дали е вистина оти автобусот фабрички е наменет за превоз на 49 патници и како таков е увезен и возилото првично е регистрирано на прилепски таблички за по неколку дена, автобусот да е препродаден и пререгистриран на скопски регистарски таблички? Дали само по неколку месеци, во сообраќајната дозвола намената, односно носивоста, му пораснала на 54 патници, односно на повеќе од 10 % над фабрички утврденото? Кој имал направено хомологација – атест и го одобрил тоа? Дали поради оваа сомнителна промена автобусот не можел да добие соодветна лиценца за меѓународен транспорт?“, изјави Митева на денешната прес-конференција.

Митева додаде дека јавноста заслужува да го добие одговорот на прашањето колку пати досега МВР пријавило недостатоци преку службени белешки до Инспекторатот за автобусите на „Беса транс“ и зошто Инспекторатот не направил вонреден инспекциски надзор во оваа компанија?

Власта треба да одговори, а потоа неопходно е да понесе одговорност за сите неправилности, за сите пропусти што се резултат на неспособноста да се справат со сите предизвици и да ги ослободат институциите да функционираат во согласност со нормите и прописите и тие да се почитуваат во целост, изјави Митева.