На денешната координативна средба на пратеничката група на ВМРО-ДПМНЕ и коалицијата „За обнова на Македонија“ се разговараше по единствена точка – активна блокада на Собранието на Република Македонија, соопшти на денешната прес-конференција Никола Мицевски.

„Едногласно беше прифатена одлуката, која претходно ја донесе Извршниот комитет на партијата, од утре да се пристапи во Собранието со активна блокада на сите штетни закони и политики застапувани од неодговорната и неспособна власт.

Активната блокада е последица, реакција на акцијата на Владата на Ковачевски, предводена од СДСМ и ДУИ, кои не покажаа чувство за државност и одбија секаква можност за дијалог по најважните прашања во оваа држава“, посочи коодринаторот на пратеничката група на ВМРО-ДПМНЕ.

Како што рече Мицевски, епилогот активна блокада следува кога претходно Ковачевски и Владата одбиле дијалог во четири клучни области за граѓаните и разговор за датум за предвремени избори.

„Тоа што Ковачевски од целата оваа понуда за нормален дијалог се фокусира само на предвремени избори покажува дека, всушност, и тој е свесен оти е премиер на Влада што нема поддршка од народот и во тоа е болката, се плашат од соочување со граѓаните. А понудата на ВМРО-ДПМНЕ, која опфаќа и решенија во економијата, здравството, образованието, надворешната политика и разговор за предвремени избори, не е шведска маса со која премиерот може да се служи во сегментите во кои само нему му одговараат“, посочи претставникот на опозициската партија.