Македонија
(Видео) Мицкоски во Кичево: Треба да бидеме мудри и обединети, одлуката народот ќе ја донесе
,,Ако не извлечеме поука од историјата која веќе еднаш се случува како трагедија, тогаш нејзината реприза е фарса, а ќе се согласите дека македонскиот народ поминал низ многу историски премрежја од кои ние како народ и држава треба да излеземе посилни, помудри, но и поискусни. Денес, овде стојам пред вас од преубавото Кичево и можам да заклучам дека Македонија е на голем крстопат, а повеќето патишта за жал се погрешни, некои водат кон слепа улица, а некои за жал во провалија. Од нас зависи каков пат ќе избереме и немаме многу можности во нашиот избор, само еден и единствен е вистинскиот пат, патот кој што води до нашата легитимна цел, а тоа е Република Македонија,порача лидерот на ВМРО-ДПМНЕ,Христијан Мицкоски на протестниот марш кој се одржа во Кичево.
Најголемата опозициска партија ВМРО- ДПМНЕ денеска го одржа својот четврти протестен марш, против референдумот што ќе се одржи на 30. септември. Протестниот марш започна од пред железничката станица и заврши на градскиот плоштад, каде имаше обраќање лидерот на партијата.
Мицкоски рече дека пред да одлучи секој од нас кој пат ќе го избере, пред да ја донесе таа одлука, потребно е да знае дека пред нас претстои исклучително тежок период. ,,Би рекол период на специјална војна каде невистината ќе се прикажува за вистина, каде црното ќе ни го продаваат како бело, период на оцрнување на личности и нивно компромитирање, време кога ќе се ветува се и сешто, со една замислена цел, да им помине замисленото. Време кога ќе се омаловажува, ќе се сака да се влее зајадлив црв на сомнеж во секоја нова искра надеж. Ќе се занимаваат со нас, со теми кои се бледи, кои се само отргнување од реалноста. Ќе се силат, ќе се удираат во гради, ќе велат дека водат на анкетите не 3, туку 30 проценти разлика, но реалноста еве ја гледате, каде е Зоран Заев, каде е ВМРО-ДПМНЕ и Македонија. Фатени се до гуша во криминал, ќе велат дека се за НАТО и ЕУ, ќе се колнат во иднината, како што се колнеа во дедовината, а реалноста ја претворија во пекол. Тоа направија.
Но и тоа ќе помине и ќе дојде време кога ќе треба да се положат сметките и да се погледнеме во очи. Некои од нас ќе чекорат со гордо крената и исправена глава, но некои ќе се разминуваат со нас, ќе се веднат, ќе не знаат што да ни одговорат поради неправдите што ги прават на својот народ и на својата татковина, ќе се срамат еден ден, а ве уверувам дека тој ден доаѓа набрзо.Сите вие добро знаете дека Македонија е се што имаме, нашиот последен остров, нашата љубов, нашите корени и нашата иднина. Македонија е нашето се”, порача Мицкоски.
,,Она што тие сакаат сега да го направат е да искреираат една лажна надеж, поставена на погрешни основи. Тие сакаат да верувате дека сега нешто треба да „подголтнеме“, за да утре одиме напред, за да се реализира сето она што како природен порив толку многу и недостасува на нашата земја, за да ни тргне во економијата, за да здравството се подобри, да се реформира образованието, земјоделието да се потпомогне. Тоа е исто како некој да ви даде грст жолтици и да ви рече направете куќа, но изберете погрешни мајстори градбата ќе биде трула, ни куќа ќе имате ниту грст жолтици во раце ќе ви останат”, додаде тој.
Мицкоски порача дека треба да бидеме мудри и да бидеме обединети. ,,Леви и десни оние во центарот, определени и неопределени треба да знаете дека нашата земја Република Македонија е во прашање и треба да се размислува рационално. Нема време, ниту можност за грешки. Има многу луѓе што и од СДСМ не се согласуваат со ова што се случува денес со нашата татковина. И ќе кажам и ќе ги повикам и вие сте добредојдени и дојдете придружете ни се во овој историски момент. Има место за сите вас покрај нас. Ваша е оваа татковина.
Има една дилема и секогаш ме прашуваат каде да одам. Дали сте за ЕУ и НАТО. Да еве ви давам одговор. И за ЕУ и за НАТО сме ама сме жестоко против овој капитулански договор Ципрас-Заев и тоа е наше право и обврска. Зашто сме против? Затоа што го подрива нашиот идентитет и е против нашите принципи. Заборавете тоа, никогаш нема да се сложиме, овој договор е против нашиот идентитет и против нашите принципи, истакна тој.
Според лидерот на опозициската партија, имаме две можности: да продолжиме да го игнорираме фактот дека Македонија е тешко ранета или да се фатиме храбро и бескомпромисно во костец со причините за таквата состојба и еднаш за секогаш да ги поразиме, и да тргнеме силно напред бидејќи ние го бараме нашето заслужено место под чадорот на обединета Европа, на обединети европски нации и држави! Тоа го заслужува овој народ и ова парче под небото.
,,Немаме друга опција, Што треба да правиме? Да седиме и слушаме како оваа клептоманска власт со сесрдна помош на премиерот Зоран Заев и неговата дворска свита криминогени пробисвети мисли дека не лаже со празни фрази со празни бирократски фрази за наводно поголеми плати и не знам какви успеси, кога со свои очи гледаме и на своја кожа чувствуваме дека најбезобразно уништуваат се што ни е нам драго и комплетно ги здробија сите демократски институции макотрпно со години создавани…
Ние сме тие кои треба да одлучиме дали сакаме да бидеме вовлечени во ова сценарио, дали сакаме да им дозволиме да газат преку нас, нашите предци и нашите деца и внуци, дали ќе им дозволиме да не убедат дека политиката не е ништо друго освен пазар, дека само парите се важни, дека договорот всушност нема значење.Зарем ќе им дозволиме на наш грб и во наше присуство да ги спроведат своите погрешни идеи? Одговорот е НЕ! Нема да им дозволиме и затоа е потребен отпор. Сенароден отпор, институционален демократски пркос со филозофска мисла, со нови тези. Тоа е она што ни е потребно. Ќе бидеме мудри и трпеливи, но ќе бидеме тактични, кога ќе биде потребно да се тактизира, ќе бидеме гласни кога ќе оцениме дека така треба, ќе бидеме неуморни, вредни и полни со љубов за Македонија, и кога ќе дојде моментот ќе бидеме незапирлив оган кој се бори за иднината на нашата земја”, истакна Мицкоски и додаде:
,,Јас, Христијан Мицкоски, мојата сила и трпение го црпам од вистинските, нашите вредности, пренесувани од колено на колено, од љубовта кон моето семејство, нација и држава. Се борам за вистината и правдата зашто мирот и спокојството на мојата душа немаат цена.Стојам овде и Ве повикувам да ме следете ме во борбата во која што веќе длабоко сме загазени, не затоа што ние така сакавме, не затоа што ние одбравме така одбравме – туку затоа што едноставно не ни оставија друга можност, само оваа можност ја имаме, нашата борба. Таа борба не е лесна, ниту ќе биде лесна, ниту некогаш била лесна. Но, ви ветувам дека кога се ќе заврши, не толку далеку од сега, нашето знаме највисоко ќе се вее, иако поткинато и ако исцрнето од виорот на борбата, но ќе биде највисоко закачено на јарболот, затоа што од секој од нас зависи крајот на таа борба. Тоа, знаме е знамето на народот и новата надеж на овој народ и оваа нација, тоа е тоа знаме по малку искинато и пеплосано од виорот на борбата што го зафатила.

Направивме досега невидена новина, тргнавме на терен со преку 2000 волонтери, наместо да трошиме пари на скапи кампањи, и на крај не обвинуваат сме молчеле!? Е како молчиме!? Како ние молчиме, не има насекаде низ цела Македонија, во секое мало, во секоја улица, како молчиме!? Па не сме ние тие кои се затвораат по канцеларии и хотелски сали, далеку од очите на јавноста и договараат најсуштествени и најскапоцени национални интереси. Тоа сте вие, господине Заев и господине Димитров. Тоа сте Вие. Не сме ние тие.
Ние сме ВМРО, ние сме Македонија, ние не се осмелуваме да бидеме господари на судбината на илјадници генерации, ние не се осмелуваме да газиме на коските на паднатите херои, ние не плукаме на гробовите на нашите дедовци. Вие го правите тоа. Затоа замолкнете. Извадете го ВМРО од устите. Не заслужувате да го спомнувате тоа име и тие свети 4 букви.
Кој е Христијан Мицкоски да му каже на народот што треба да прави, да се обидува да го замајува со скапи маркетиншки трикови и странски ПР советници. Кој ми го дал мене тоа право? Моментот кога одбрав да влезам во политиката, свесно одбрав да бидам слуга на тој мој народ и тоа ќе продолжам да бидам”.
Според него, не може за национално прашање политички елити да одлучуваат. ,,Ова не се партиски надитрувања, иако знам дека на СДСМ позициите во партијата им се над се, на нас Македонците и нацијата ни е се и над се . Нема партиите да одлучат, за национално прашање ќе одлучи нацијата и на нејзината одлука ќе биде конечна за сите партии и за сите политичари. И сите заедно ќе излеземе дента после тоа пред нацијата и ќе се поклониме каква и да биде таа одлука. Народот ќе одлучи”, истакна лидерот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

