Македонија
(Видео) Мицкоски во Струмица: Заев се користи со ниски страсти и ги злоупотребува децата
Теренските активности на претседателот на ВМРО-ДПМНЕ, Христијан Мицкоски денеска продолжија со посета на Струмица и струмичко. Тој имаше средба со младите од општина Босилово, каде како што изјави, „разговарале за актуелната политичко економска состојба, за беспреспективноста на младите, урнатите институции и надежи, за урнатите очекувања, безидејноста од страна на владата, немањето на проекти, сето она што беше ветувано за време на предизборието останува само едно голо слово пишано на хартија, а реализацијата изостанува“. „Немаме практично никаква реализација и она што мене ме загрижува е тоа дека се поголема е разочараноста кај младите и се поголема е барањето алтернатива за напуштање на нашата држава“, изјави Мицкоски.
Според него, „сето она што беше ветувано во предизборието дека голем дел од младите кои што претходно се иселиле ќе се вратат, напротив гледаме само акцелиризиран процес на дополнително иселување и желба за заминување од Република Македонија поради бесперспективност и немањето можност кои што во овој момент се резултат на тотално погрешните политики на Владата“.
„Исто така сакам да порачам две работи денеска. Првата е бескрупулозната изјава на претседателот на Владата, господинот Зоран Заев каде што користи ниски страсти, ги злоупотребува децата за дневно политички цели. Тоа не е мое ниво, но нема да останам индиферентен и да не го искоментирам тоа. Навистина непримерно од страна на претседателот на Владата и се надевам дека тоа нема да му се повтори во иднина да користи ниски страсти и да ги злоупотребува децата за дневно политички цели.
И втората работа што исто така ме загрижува е информацијата која што ја добивам од полициски извори дека имаме мобилизираност на припадниците на МВР за дополнително задушување на можноста на граѓаните да го изразат својот демократски револт, демократски пркос преку протест. На тој начин апелирам не само што не се помага во процесот на заедничко надминување и подобрување на реформските процеси. туку уште дополнително се загрозува на овој начин. Затоа ја користам оваа прилика да апелирам и до МВР, но и до господинот Зоран Заев, да не ги злоупотребува чувствата, да не ги злоупотребува институциите и на тој начин да го ограничува демократското право на секој граѓанин да го изрази сопствениот револт. Се разбира, не насилно. Ние уште во текот на вчерашниот ден тоа го кажавме дека насилство не е оправдано и ние никако не можеме да подржиме насилство. Но, секој оној мирен израз на револт е основно загарантирано демократско право на секоја граѓанин во Република Македонија“, апелираше Мицкоски.
Рој додаде дека доколку се сведоци повторно на приведувања, закани, притисоци од страна на МВР – тоа не е само што не му помага на процесот со реформи, туку напротив му одмага и го отежнува дополнително. Запрашан како ја коментира изјавата на премиерот Заев дека на протестите се користи говор на омраза и дека биле подготвени веќе првите кривични пријави, Мицкоски рече: „ Јас уште од тука од Струмица апелирав до господинот Зоран Заев за разум. Да не презема акција како што презема и да ги прекрши процедурите во Собранието, Деловникот, законите, Уставот, да не се однесува насилнички поддржан од Талат Џафери, да ги испочитуваат процедурите и Деловникот во Собранието кога ќе дојде на дневен ред предлогот на законот за јазиците. Но, сведоци бевме на едно девијантно однесување од страна на претседателот на Собранието, господинот Џафери но и поддржан од пратениците на СДСМ и господинот Зоран Заев. Како реакција на таа неделовничка и незаконска акција се случуваат очигледно низ Македонија протести, бидејќи тоа предизвика чувства кај граѓаните. И сите тие кои што демократски без насилство го изразуваат својот револт апсолутно имаме разбирање за нив. Насилство не е дозволиво, ние како политичка партија не поддржуваме насилни протести. Но, протести каде што граѓаните на мирен начин го изразуваат револтот тогаш можеме да кажеме дека се апсолутно во согласност на онаа акција која што беше спротивно на Деловникот и законите во Република Македонија“, вели лидерот на ВМРО-ДПМНЕ.
Околу говорот на омраза, Мицкоски додаде: „Ќе ве потсетам на една изјава на премиерот кога пред своите сопартијци јавно кажуваше дека ќе јаде живи луѓе кога ќе дојде на власт, очигледно дека почна тоа сценарио да го практикува. Не само што јаде живи луѓе и не само што не практикува политики, туку основна водилка во неговото однесување претставува заканата, уцената притисокот и тоа е недозволиво за држава каква што е Македонија која што планира да биде дел од европските вредности во европското семејство. Јас само би му препорачал да се контролираат во изјавите, да внимава што зборува, бидејќи навистина денот кога ќе треба да поднесе полна одговорност за овие изјави доаѓа многу брзо, побрзо од што и тој самиот е свесен“, порача Мицкоски од просториите на ОК Струмица на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ: Мицкоски побегна од резолуцијата, дури во Брисел
Денес, кога Собранието треба да одлучува и кога опозицијата требаше да му поставува прашања на премиерот Христијан Мицкоски, тој наеднаш избега во Брисел, обвинија од СДСМ.
„Ја остави Резолуцијата на СДСМ непотпишана а контра Резолуцијата остави да ја туркаат неговите послушници од ДПМНЕ и ЗНАМ. Оние што верно го следат предавството на својот претседател и оние што ЗНААТ дека ја предале Македонија за пари. Толку за „храбриот“ Христијан Мицкоски. Не смее да одговара на прашањата на опозицијата, затоа што вистината не може да ја погледне во очи“, велат од опозицијата.
Македонија
Стојаноски: Лагите на СДС се разоткриени, резолуцијата на ВМРО-ДПМНЕ и коалицијата ја гарантира безбедноста во државата
Во изминатиот период бевме сведоци на тоа како СДС сака да внесе несигурност и вознемиреност во јавноста преку ширење на лажни информации, свесни манипулации и дезинформации, кои беа интензивно и гласно пласирани во јавниот простор, изјави Бојан Стојаноски, пратеник на ВМРО-ДПМНЕ.
„СДС и Венко Филипче, продолжуваат по стапките на нивниот ментор Зоран Заев. Секојдневно, гледаме иста реторика, исти методи и исти манипулативни наративи. Ова СДС не го прави случајно, туку е свесна стратегија, поради тоа што нема што ново да понуди. Ваквата кампања на опозициската СДС, која инаку повеќе се одликува со квантитет директно го нарушува мирот на граѓаните, а е и во спротивност со Кривичниот законик, Законот за прекршоци против јавниот ред и мир, како и со Законот за спречување и заштита од дискриминација“, рече тој.
Токму затоа, додава Стојаноски, преку Резолуцијата поднесена од пратеничката група на ВМРО-ДПМНЕ и коалицијата во Собранието, јасно се отфрлуваат и се поништуваат сите аранжмани, одлуки и политики на поранешната влада предводена од Зоран Заев поврзани со кампови за мигранти.
„Јасно ја потврдуваме определбата за принципиелна, одговорна и предвидлива надворешна политика, заснована на заштита на националните интереси и почитување на меѓународното право. Со оваа Резолуција се става крај на сите шпекулации, дезинформации и лажни сценарија кои СДС се обиде да ги наметне во јавниот дискурс, а се поврзани со наводно прифаќање мигранти или изградба на кампови. За секое следно ширење на паника, лажни вести и манипулација на народот, кривично ќе се одговара“, рече тој.
Македонија
Јавниот обвинител Љупчо Коцевски поднесе оставка
Републичкиот обвинител Љупчо Коцевски денеска поднесе неотповиклива оставка од функцијата. Тој кажа дека од почетокот тврдел дека евентуалната постапка за негово разрешување е политичка одлука.
Тој предмалку ја соопшти одлуката на прес-конференција во Обвинителството. Коцевски рече дека си заминува од функцијата гордо и со крената глава.
„Функцијата што ја вршев нешто помалку од две години ја извршував чесно и достоинствено, заминувам со гордо крената глава, но и со разочараност поради непочитување на принципите врз кои почива правната држава. Доказ за тоа е дека дури денес во 10 часот, на само еден час пред закажаниот почеток, ми беше доставена покана од Собранието да присуствувам на седницата за која ќе се раправа за мое разрешување. Предлогот за мое разрешување не ми е доставен и немам на што да се произнесам“, рече Коцевски.
Тој вели дека е јасно оти предлогот за негово разрешување не е заснован ниту на закон ниту на факти, туку претставува преседан со далекосежни последици врз независноста на Јавното обвинителство.
„Овој предлог како основи за разрешување содржи само три реда, а ниту еден од нив нема образложение или аргументирана поткрепа. Законот е јасен: државниот јавен обвинител може да биде разрешен само доколку се утврди дека сторил тешка дисциплинска повреда. Тоа е така не заради заштита на Љупчо Коцевски или на кој било друг што ќе дојде на оваа функција, туку заради заштита на самостојноста на јавното обвинителство и начелото на поделба на власта. Принципи кои денеска се длабоко нарушени, бидејќи со ниту една постапка не е утврдено дека сум сторил ниту лесна, ниту тешка дисциплинска повреда, а тоа го потврди и Советот на јавните обвинители кој даде негативно мислење по предлогот на Владата, како уставно и законски надлежен орган задолжен да ја штити независноста на јавното обвинителство. Оттука, самата постапка за мое разрешување е правно неиздржана“, вели Коцевски.
Според него, предлогот за негово разрешување е дојден затоа што јавно и отворено зборувал за проблемите во обвинителството.
„Јас знам зошто денес стојам тука пред вас. Тоа не е заради мое непрофесионално работење. Тоа не е заради недостаток на резултати. Туку затоа што, како државен јавен обвинител, отворено и јавно зборував за проблемите и за недостигот на ресурси, затоа што не се мешав во законското право на јавните обвинители на самостојно и независно одлучување. Убеден сум дека стојам тука пред вас и затоа што се зафатив со еден навистина значаен и тежок процес – прочистување на редовите на обвинителството. Јас сум првиот државен јавен обвинител кој, по донесувањето на Законот за јавно обвинителство во 2021 година, изврши контрола на работењето на вишите јавни обвинителства и на Основното јавно обвинителство за гонење на организиран криминал и корупција“, рече Коцевски.

