Претседателот на ВМРО-ДПМНЕ, Христијан Мицкоски, оствари средба со граѓаните и членовите на Општинскиот комитет на ВМРО-ДПМНЕ Центар. Тој пред присутните истакна дека економската ситуација е катастрофална и на Македонија ѝ се случува цунами „Заев, Тевдовски, Анѓушев“, а денес на тоа цунами му се придружи и Сугарески.

„Видоа дека ги критикуваме дека немаат капитални инвестиции па на прес-конференција најавија дека  ќе инвестираат 270 милиони евра во реализација на патишта во Република Македонија. Ама заборавија да кажат дека тие проекти беа направени пред 10 месеци и дека парите за реализација на тие проекти беа предвидени уште пред 10 месеци. Па се поставува прашањето што правеле тие овие 10 месеци, ги преспале?“ рече Мицкоски

Тој посочи дека планот 3-6-9 не е реализиран.

„Сами го направија планот и сега им бараме отчет колку реализираа бидејќи поминаа 9 месеци, а резултатот е само 42 отсто реализација. Сега наеднаш планот 3-6-9 стана 3-6-9 плус, што значи ќе се развлече до недоглед, во математиката тоа го нарекуваме полутосечка“, истакна Мицкоски.

Мицкоски се наврати и на пензиите и посочи дека било ветено 10% поголеми пензии, но дека ни тоа не се остварило, а зголемувањето е укинато.

„Ниту прават реформи ниту, пак, имаат намера да ги прават, а ниту  имаат план како да ги направат тие реформи. Единствено имаат план како ова цунами побрзо да се збогати и да ја уништи државата. Сè на сè, катастрофална ситуација“, вели Мицкоски.

Мицкоски потенцираше дека Македонија има економскиот раст од 0%, кој е најслаб во Европа, не се креираат нови работни места, а директните инвестиции споредено со минатата година се помалку за 100 милиони евра. Потенцираше и дека девизните резерви во овие 10 месеци се намалени на 218,2 милиони евра, додека монетарното злато изгуби вредност од 12,5 милиони евра.

„Намалено индустриско производство, градежништвото стагнира со најмалку 30%, но она што е пострашно е што договорените работи за во иднина се помали за 12% од тие што беа во 2017 година. Значи оваа 2018 ќе биде катастрофална“, рече Мицкоски

Мицкоски  посочи дека за да се затскрие сведочењето на бизнисменот од Струмица почнале да вадат фотографии дека бил на 27 во Собранието.

Претседателот Мицкоски потенцира дека не крие за неговото присуство пред Собранието, дека нема од што да се срами или да лаже зашто таму бил со сопствениот народ. Му порача на СДСМ дека и следниот пат ќе биде со народот и дека на следните избори ќе биде поразен.