Идната влада на ВМРО-ДПМНЕ ќе испорача реформи и бескомпромисна борба против криминалот, изјави претседателот на ВМРО-ДПМНЕ, Христијан Мицкоски, кој заедно со потпретседателот Александар Николоски и членот на ИК, Игор Николов, во Париз оствари средба со пратеникот во францускиот парламент и потпретседател на комитетот за надворешни работи, Жак Мари, и со францускиот сенатор и поранешен француски министер за одбрана, Алан Ричард.

„Ја пренесовме нашата порака дека по следните предвремени парламентарни избори, кои ќе се одржат во април следната година, владата на ВМРО-ДПМНЕ ќе се фокусира на исклучително квалитетни реформи од областа на владеењето на правото, обезбедување независно обвинителство, независно судство, нешто што недостига во овој период. Односно, сето она што денеска добро изгледа на хартија, ќе биде можеби подобрено, но сето она што денеска во пракса практично не е применливо, ќе биде испорачано во реформите што следната влада на ВМРО-ДПМНЕ ќе ги донесе во Македонија веднаш по предвремените парламентарни избори“, рече Мицкоски.

Додаде дека на средбите станало збор и за можната економска соработка, зголемување и продлабочување на дипломатските односи помеѓу двете земји бидејќи Франција била и останува стратегиски партнер на нашата држава и главен промотор во рамките на НАТО и во рамките на Европската Унија.

„Ја пренесовме пораката дека идната влада на ВМРО-ДПМНЕ нема само да ветува, туку тоа што ќе го вети, практично и ќе го испорача. Во рамките на владеењето на правото, бескомпромисна борба со криминалот, бескомпромисна борба со корупцијата и она што денеска, повторно ќе кажам, изгледа добро на хартија, но, за жал, недостига имплементацијата, следната влада на ВМРО-ДПМНЕ ќе го имплементира и ќе биде дел од политиките на идната влада“, изјави Мицкоски по средбите во Париз.