Затворот Идризово со години наназад е мета на критики за нехуманиот однос кон затворениците. Во затворот, голем дел од опремата на полиција како радио станици, опрема за ноќно набљудување и застареното оружје, не се во функција. Затворениците до амбулантите или судовите се пренесуваат во импровизирани возила, а многумина и не стигнаа до лекарска помош.

Новиот директор на Казнено поправниот дом „Идризово“, Боби Мојсоски, вели дека затворот го затекнал во катастрофална состојба, како за затворениците така и за вработените во затворската полиција.

„Во моментот кога дојдов, наидов на неисправна опрема, мал е бројот на радио станици за добра врска, сега имаме соработка со МВР од каде ќе ни донираат исправни радио станици. Возилата во моментов се такви какви што се, отворена е процедура со која ќе добиеме две нови возила со кои сигурно ќе биде спроведувањето на затворениците во здравствените установи или судовите“, вели Мојсоски.

Идризово до неодамна беше затворот каде се спиеше и по ходници, но простор се ослободи со амнестијата. Капацитетот на најголемиот затвор во Република Македонија изнесува 1200 затвореници, но до пред амнестијата во него престојувале повеќе од 1900, односно во келија наменета за 4 лица, беа сместувани по 8 луѓе.

Во моментов во КПУ „Идризово“ има помалку од 1000 затвореници, па како што вели директорот Мојсоски има дури и слободни кревети. Според директорот на „Идризово“, бројот на вработени во затворот е премал дури и за овие 1000 затвореници, а не пак за оние 1900 кои престојувале претходно.

„Пред амнестијата немаше доволно простор за сите во затворот чиј капацитет е до 1200 затвореници, а имаше околу 1900. После амнестијата се ослободени околу 600 затвореници и во моментов затворот брои под 1000 затвореници што значи дека имаме и слободни кревети. Во таа смисла вработените работеле во многу тешки услови, со истиот број на вработени се услужувале 1900 затвореници. Бројот на вработени во затворската полиција во КПУ „Идризово“ и сега е мал, меѓутоа се снаоѓаме подобро отколку пред амнестијата“, вели Мојсоски.

Познато е дека голем дел од затворениците поседуваат мобилни телефони, а постојано има обвинувања дека се врши секаков вид трговија во затворот, храна, облека па дури се внесуваат и наркотични средства. Директорот Мојсоски потврдува дека во минатото имало такво нешто, но сега се врши целосен претрес на сите пакети кои што ги добиваат затворениците, а се врши претрес и на вработените кои влегуваат.

„Имаме скенер каде вршиме тотален претрес на сите пакети кои што ги добиваат затворениците и на сите вработени кои влегуваат. Во агенцијата за санкции имаме и отворен телефон каде што може да се пријават сите неправилности во тој поглед. Правиме рации, наоѓаме телефони и други работи и ние како управа ригорозно ги казнуваме оние кај кој ќе најдеме било што забрането. Порано имало такви работи, ние гледаме тоа да го сведеме на минимум, на таа тема разговараме и со затворениците“, вели Мојсоски.

Во извештајот на Народниот правобранител наменет за затворите во Република Македонија, една од главните замерки е недоволниот број на медицински лица во казнено поправните установи. Како што вели Мојсоски, затворот „Идризово“ во моментов има 3 лекари и 3 медицински сестри што според него е недоволен број со оглед на бројот на затвореници.

„Со моето доаѓање, медицинскиот персонал го презеде Министерството за здравство, во моментов Јавно здравство Скопје раководи со тоа, имаме тројца лекари и три медициски сестри што е недоволен број“, рече Мојсоски.

Голем дел од вработените во затворот се жалат дека уште од порано се обесправени во поглед на исплаќањето на платите, директорот Мојсоски вели дека веднаш по доаѓањето на оваа позиција се сретнал со претседателот на синдикатот и заеднички ја констатирале лошата состојба.

„Затекнав страшно лоша ситуација, премногу тужби кон затворот и исплати каде се потрошени 100.000 евра за извршители и адвокати и плус платата за самите вработени. Во новиот закон за санкции кој е во завршна фаза беше вклучен и самиот синдикат со чија помош се прават измени со цел да се поправат грешките од минатото каде се правени одредени неправилност кон самите вработени“, рече Мојсоски.

Реновирањето на затворот трае веќе подолг период, голем дел од зградите се веќе реновирани, а во 2019 година ќе започне и изградба на нова зграда за затворениот дел каде престојуваат затворениците со најтешки кривични дела и кој важи за најлош оддел во поглед на условите.

„Ситуацијата која ја затекнав не беше најдобра, меѓутоа одиме во подобрување на условите за работа и престој со тоа што сме во завршна фаза со реновирањето, чекаме одобрение од Министерството за транспорт и врски за отварање два нови објекти полуотворено и отворено крило каде од едни лоши услови ќе дојдеме до подобри услови за работа како за управата така и за самите затвореници“, истакна Мојсоски.

Како што вели директорот на „Идризово“, негова главна цел е да се оди кон ресоцијализација на заторениците за да не бидат повратници во затворот. Според него, ресоцијализацијата во последните 6-7 години бил замрена од повеќе причини меѓу кои и преголемата бројка на затвореници.

„Мислам дека со добар начин на ресоцијализирање, што е главна цел на сите казнено поправни установи, ќе одиме до подобрување на психолошката состојба на самите затвореници“, вели Мојсоски.

Виктор Јованов