Македонија
(Видео) Николоски: Време е за оставка на Заев и за формирање влада за национален спас

Политичката кариера на Зоран Заев се темели на две клучни ветувања – првото е живот за сите, a второто е интеграцијата на Република Македонија во ЕУ, рече денеска на прес-конференција потпретседателот на ВМРО-ДПМНЕ, Александар Николоски.
Во однос на првото тој рече дека Македонија во изминатите четири години се задолжила над две милијарди евра и дека во земјата, како што рече, владее тотална сиромаштија и беспарица. Исто така, Николоски нагласи дека по четири години, јасно е оти проектот на Заев за ЕУ завршува со целосно фијаско.
„Четири години лажни ветувања дека Македонија ќе добие датум за почеток на преговорите со ЕУ. Четири години Зоран Заев и неговиот тим ветуваат дека ќе почнат преговори, ама никако да кажат на кој датум ќе почнат преговорите за членство во ЕУ. Четири години немаме одговор на едноставното прашање што го поставува ВМРО-ДПМНЕ: Кој е датумот на кој ќе почнат преговорите со ЕУ?“, посочи потпретседателот на опозициската партија.
Според него, кога Бугарија видела дека Македонија не напредува во делот на реформите и борбата со организираниот криминал и корупцијата, решила да ги постави и своите позиции.
„Претседателот на ВМРО-ДПМНЕ, Христијан Мицкоски, понуди да се направи средба помеѓу клучните политички фактори во Македонија за декларација со македонските позиции, да се усвои тоа во македонското Собрание, како би можело Македонија со консензус да ги постави своите позиции. За жал, тоа беше одбиено. Потоа следуваше март 2020 година кога Бугарија успеа своите позиции како објаснувачки меморандум да ги направи составен дел на одлуката на ЕУ во однос на почетокот на преговорите на Македонија. Тогаш беше атмосфера на предизборие и власта се обиде да го скрие овој документ. Две недели го криеја документот за потоа да биде презентиран од медиумите, да биде презентиран и од ВМРО-ДПМНЕ. Тогаш јавно повикавме на лидерска средба, на која заеднички ќе заземеме став. За жал, тоа наше барање се одби, се одби барањето за лидерска средба, власта продолжи самата да ги води процесите верувајќи дека ќе може на тој начин да се претставува како единствен фактор што ја движи државата напред, а сите други се, нели, ретроградни сили“, посочи Николоски во своето излагање.
Според него, сета оваа хронологија покажува дека Владата предводена од Заев нема нити волја нити капацитет да направи реформи, да се бори со организираниот криминал и корупцијата, а уште помалку знае да ги решава отворените прашања.
„Затоа, што побргу, што побргу треба да си заминат! Зоран Заев и оваа Влада да поднесат оставка и да се формира влада на национален спас, која ќе даде одговори на оваа голема криза во која се наоѓа Македонија. Криза во однос на блокадата на евроинтегративниот пат, но исто така и здравствената и економската криза предизвикана од коронавирусот“, порача потпретседателот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Четворица од повредените лица во пожарот во Кочани денеска се враќаат од странство

Министерството за здравство информира дека денеска се враќаат четворица од повредените лица во пожарот во Кочани кои се лекуваа во медицински центри во Хрватска (двајца пациенти), Шведска (1 пациент) и Италија (1 пациент).
Во странство се хоспитализирани 60 пациенти. Непроменета останува состојбата на пациентите кои се третираат во странство, вклучително и состојбата на критичните пациенти.
Во болниците во земјава во моментот се лекуваат 7 пациенти, од кои четворица во Хируршката клиника „Св.Наум Охридски“, двајца пациенти во приватната болница Систина и еден пациент на Клиниката за пулмологија.
Министерството за здравство континуирано ја следи состојбата со повредените пациенти, со цел обезбедување најдобар можен третман, како и понатамошна рехабилитација.
Македонија
„Трошки за работниците наместо вистинско зголемување на платите, Владата ги извиси граѓаните“, велат од СДСМ

„Наместо вистинско и реално зголемување на платите, владата ги извиси работниците. Власта им фрла трошки на работниците со покачување од срамни 1.800 денари наместо зголемување на минималната плата на 500 евра како што бараат и заслужуваат“, соопшти СДСМ.
„Додека граѓаните се борат со сметки и мизерни плати, тие продолжуваат да штитат интереси на богатите, оставајќи ги работниците на работ на егзистенција.
Власта не го почитува ниту општиот Колективен договор и не ги зголемува платите во јавниот сектор за предвидените 12,5%.
Најавата за зголемување од само 5% на платите за вработените во здравството е историски најмало во споредба со досегашниот раст на платите.
Вкупните примања на лекарите специјалисти од 2017 до 2024 година, заедно со дежурства се зголемени меѓу 100-160%, по корекцијата на коефициентите од страна на СДСМ.
Основната плата на лекарите специјалисти СДСМ ја зголеми за 40 проценти, на медицинските сестри ја зголемивме помеѓу 20 и 23 проценти, на општите лекари за 25 проценти.
Се потпиша и Спогодбата со здравствениот синдикат за ново зголемување на платите на здравствените работници кое требаше да биде над 20% и тоа сега веднаш а не ДПМНЕ да прави лоша математика.
Истот така, платите на наставниците требаше да бидат зголемени за 12,15% ама во септември 2024 година. И тоа не се случи.
Реалноста е понижувачка – зголемувањето од едвај 5% ги остави наставниците без заслуженото за нивниот труд. Со ова наставниците и просветните работниците се оштетени. Дополнително, најавените зголемувања од 7% се далеку од тоа што им следува и што треба да го добијат просветните работници.
Ваква измама и понижување на граѓаните, кои чесно работат и со право бараат поголеми плати, никој никогаш не направил.
Оваа влада е влада против граѓаните и работниците, против сите кои бараат подобар живот. Пари има за папаја, манго, аспарагус и приватни летови, но нема за оние кои едвај врзуваат крај со крај“, се наведува во соопштението на СДСМ.
Македонија
„Десетици нови дестинации од двата домашни аеродроми и преговори за десетина нови авиолинии“, велат од ВМРО-ДПМНЕ

„Владата предводена од ВМРО-ДПМНЕ работи на привлекување на нови авиокомпании и нови авиолинии. Во фокусот е развој на авиосообраќајот и зголемување на конкуренцијата на домашните аеродроми. Политиките што се спроведуваат во авиосообраќајот даваат конкретни резултати“, велат од ВМРО-ДПМНЕ.
„За само неколку месеци владата предводена од ВМРО-ДПМНЕ успеа да овозможи десетици дестинации од двата домашни аеродроми, се вложува во воздушниот сообраќај и се создаваат поконкурентни услови за патување и нови дестинации за граѓаните.
Исто така, се преговара и за уште десетина нови авиолинии.
Скопје директно се поврза со Париз, со нова авионска линија Скопје-Париз (аеродром Орли). Се воведе нова авио линија Охрид-Истанбул. После 12 години повторно се врати линијата Скопје-Амстердам.
Нов чартер лет од Германија со кој најмалку 200 туристи секојдневно ќе ја посетуваат Македонија. Најмалку еден лет дневно и меѓу 180 и 200 туристи секојдневно ќе доаѓаат надвор од главната туристичка сезона.
Две нови авиолинии од Меѓународниот аеродром Скопје и тоа:
Скопје -Женева која ќе започне да оперира од 3 ноември 2025 и Скопје-Париз (аеродром Орли) од 2 април 2025.
Претходно се потпишаа и договори за воведување на линиите: Охрид – Истанбул; Охрид – Базел Мулхаус; Скопје – Дубаи; Скопје – Штутгарт; Скопје – Лион и Скопје – Барселона.
Се преговара и за воспоставување на нова линија Скопје – Прага, како и можноста за нова линија Охрид – Карлови Вари.
Освен новите авиолинии кои се воведоа и тие за кои се преговара, за прв пат по изградбата на аеродромот во Охрид се прошируваат капацитетите, и ќе се гради нова терминална зграда. Реконструкција и нова административна зграда на Охридскиот аеродром „Св. Апостол Павле“.
Целта е подобрување на квалитетот на животот на македонските граѓани, подобар проток на добра и услуги, како и инвестиции и пораст на економскиот развој“, се наведува во соопштението на ВМРО-ДПМНЕ.