Македонија
Видеообраќање на Мицкоски за почеток на кампањата „Разговори за обнова на Македонија”

„Трета година Македонија живее во кошмар. Заевизмот го јаде ткивото на Македонија. Секој ден тапкаме во место, а во многу области одиме назад. Неправдата е знак на оваа власт, неработата е нивна одлика, неспособноста е нивен карактер. Нема правда, нема проекти, нема пари за народот, нема систем, нема грижа, нема идеја. Тие ја рушат државата, ја рушат среќата на луѓето, ја рушат иднината. Наместо да градат – тие крадат. Ветувањата станаа лаги, системот не функционира, криминалот царува, државата е украдена, луѓето се измамени. Едно е јасно – тие паѓаат. Врхушката сочинета од арамии губи тло. Заевизмот колабира!“ се вели во видеообраќање на претседателот на ВМРО-ДПМНЕ, Христијан Мицкоски, за почеток на кампањата „Разговори за обнова на Македонија – Проблеми, решенија и програма“.
Според Мицкоски, потонаа во своите предавства, изгубија образ затоа што излажаа, загубија сила затоа што се силеа.
„Секој ден сè повеќе губат моќ, тоа е процес кој е неповратен и ќе заврши со нивен голем трескот. Тие се свесни за тоа, затоа се нервозни, затоа кршат закони, затоа уште повеќе рушат, и затоа уште повеќе земаат рушвет. Очајни се, слабоста ја гледаме во нивните очи, немоќта во изразите на нивните лица. Сакајќи да ја срушат Македонија, се срушија себеси! Готови се! Тоа на секому му е јасно! Изгубија! Македонија го преживеа и ова зло! Таа е посилна од сè! Заевизмот се руши и доаѓа време да се сведат сметките, доаѓа време за одговорност, доаѓа време за правда и правда ќе има! Гарантирано!
Но, заевизмот остави длабоки траги. Ја оставаат Македонија со лузни, во рушевини, во пепел. Ја оставаат Македонија послаба, помала, поранлива, во проблеми. Ние не бегаме од предизвиците, напротив ги поздравуваме и смело се впуштаме во битка да ги надминеме. Обновата на Македонија има знаење и мудрост. Има карактер и систем на вредности. Има чест и сила кои ги црпи од идеалите за Македонија.
Правда, правдини, слобода, почит, еднаквост, соживот, благосостојба и прогрес. Заевизмот паѓа, но остава проблеми!Ние не бегаме од проблемите, ние имаме решенија и одговори за нив. Ние ги знаеме проблемите и градиме програма за нивно надминување. Ние сакаме да го дознаеме и секој твој проблем почитуван граѓанину. Да знаеме што те притиска, мачи и измачува тебе како човек, кој е твојот проблем, кој е проблемот со кој се соочува твоето семејство, твојата улица, село, град, твојата фела, твоите блиски, твојата Македонија.
Затоа разговараме со вас почитувани граѓани, имаме образ да ве погледнеме во очи, да ни кажете што ве мачи и како тоа да го решиме, да ви ветиме дека заедно ќе се бориме за проблемите да исчезнат или да се намалат, и тоа ветување да го исполниме. Време е! Да разговараме, да си подадеме рака, и потоа рамо до рамо, срце до срце, да се зафатиме со работа која толку многу отсуствува во овој период.
Да забрчат машините, да згрмат работниците, да се чујат интелектуалците, да се вратат луѓето и да се вратат насмевките на луѓето, осетно и реално да се зголеми стандардот на граѓаните и стандардите во сите области. Почнуваме ‘Разговори за обнова на Македонија’! Ние стартуваме со финишот на нашиот маратон кој ќе заврши со успех!Стани Македонија! Секој еден од нас да стане Македонија, и на тој начин да помогне Македонија да стане, и Македонија да расте и да се развива, да добие во нов квалитет!Приклучи се на ‘Разговорите за обнова на Македонија’, бидејќи обновата доаѓа!”, се вели во видеообраќањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Студено време со врнежи од дожд, а на повисоките места снег

Времето денес е претежно облачно и студено со врнежи од дожд, а на повисоките места од дожд и снег. На планините врнежите ќе бидат од снег. Ќе дува умерен до засилен северен ветер (наместа над 70 km/h).
Дневната температура ќе биде во интервал од 5 до 13 степени.
Во Скопје, облачно и студено со врнежи од дожд.
Попладне и во вечерните часови на повисоките делови од котлината врнежите ќе бидат од дожд и снег. Ќе дува умерен до засилен северен ветер. Дневната температура ќе достигне до 9 степени, јавува УХМР.
Македонија
Ледено невреме доаѓа кон Македонија: се очекува силен ветер, дожд, снег и минусни температури

Денешниот ден донесе вистинска пролет во Македонија и сончево време во најголемиот дел од земјата, но во наредните часови следува бурна промена на времето.
Моќен циклон во овој момент носи обилен снег и силен ветер во источна и североисточна Европа.
Снегот и бурните ветрови како дел од студениот фронт стигнаа до северот на Романија и Словачка.
Во исто време, во Македонија се уште е топло, температурата во Скопје е 14 степени, а за само неколку часа студениот фронт ќе ја намали температурата за повеќе од 10 степени за многу краток временски интервал.
Според информациите од Управата за хидрометеоролошки работи (УХМР) ќе има продор на студена воздушна маса од север, кој ќе предизвика значителна промена на времето.
Ќе преовладува претежно облачно време со врнежи од дожд, а на повисоките места од дожд и снег.
На планините врнежите ќе бидат од снег и ќе се формира снежна покривка од 10 до 15 сантиметри.
Ќе дува засилен северен ветер со брзина од над 70 километри на час и температурите значително ќе опаднат.
Во понеделник со засилен северен ветер наместа повремено ќе провејува слаб снег.
Потоа времето ќе биде стабилно и ветровито со утринските температури кои насекаде ќе бидат негативни и ќе се спуштат до минус 7 степени.
Кон крајот на следната недела се очекува постепен пораст на температурите.
Македонија
(Видео) Директорката на клиниката за пластична хирургија низ солзи им се заблагодари на странските доктори за помошта по трагедијата во Кочани

Д-р Јасмина Ѓоргиевска Павловска, директорката на Универзитетска клиника за пластична и реконструктивна хирургија низ солзи се заблагодари на докторите од Израел, Чешка и Србија кои дојдоа во земјава за да им помогнат на нашите доктори по големата трагедија во Кочани.
„Сакам да ви се заблагодарам на сите што сте тука и ни помагате во оваа ситуација. Завршивте одлична работа. Ни го дадовте патот по кој треба да одиме, за да го направиме најдоброто за овие млади души и да им дадеме шанса да го видат светот“, вели Ѓоргиевска Павловска.
Емотивното видео го објави Sheba Medical Center Global Impact, еден од водечките светски медицински центри, со седиште во Израел. Нивниот тим изведе 35 процедури на пациенти во четири различни болници во Македонија.