Претседателот Стево Пендаровски за време на официјалната посета на Грција, денеска во Атина одржа прес-конференција за претставниците на македонските медиуми.

По средбите со претседателката Катерина Сакеларопулу и со премиерот Киријакос Мицотакис, Пендаровски истакна дека најважно е што двете највисоки политички инстанци во Грција потврдиле дека преспанскиот договор важи, ќе се почитуваа и дека има политичка волја за негова целосна имплементација.

Во тој контекст претседателот го повтори ставот дека договорите мора да се чуваат, заштитуваат и имплементираат и дека тоа е главниот индикатор за сериозноста на страните што ги потпишуваат и се обврзуваат на нив.

„Ние сме апсолутно сериозни во тој дел, имаме јасна политичка намера да го имплементираме сето она што е внатре напишано и во таа смисла замолив од грчка страна поголема ажурност во однос на неколку елементи, компоненти на преспанскиот договор, кои, пред сѐ, поради Ковид-19 се најдоа во своевиден стенд-бај“, изјави Пендаровски.

Претседателот потврди дека по извесна стагнација, Комисијата за трговски брендови и Комисијата за образовни, историски и археолошки прашања ќе продолжат да работат и дека постои најава за нивна следна средба независно од предизборниот период кај нас.

Во таа насока Пендаровски додаде дека Комисијата за археолошки, историски и образовни прашања уште пред почетокот на пандемијата има постигнато значаен напредок и дека усвоила и усогласила четири записници.

Во однос на средбата со премиерот Мицотакис, Пендаровски изјави дека побарал помош и поддршка за деблокада на македонските евроинтеграции на престојниот самит Европска Унија – Западен Балкан посочувајќи дека преспанскиот договор претставува и договор за воспоставување стратешко партнерство меѓу Република Северна Македонија и Република Грција.

„Очекуваме од него поддршка и помош во однос на оние претставници од земјите членки кои уште се скептични, во прв ред Бугарија, а се разбира и со другите што евентуално би можеле да имаат некакви забелешки за втората држава,. која знаете дека досега неформално е третирана во пакет со нас, тоа е Република Албанија“, изјави Пендаровски.

Претседателот додаде дека на средбите со грчкиот државен врв изразил благодарност за донацијата на 20.000 вакцини, како и за помошта во справување со пожарите на територијата на општина Гевгелија.

„Практично, покажавме како функционира европската солидарност и како треба да функционира и понатаму независно каде постојат проблеми и од таков тип“, изјави Пендаровски.