Воздухот во Скопје станува сè позагаден, светските медиуми известуваат за Скопје и Македонија како подрачје каде што загаденоста на воздухот е најголема во Европа. Петре Шилегов, кој година дена е градоначалник, нема преземено ништо во насока на подобрување на квалитетот на воздухот, изјави денеска Ирена Попова од ВМРО-ДПМНЕ, од пред просториите на Град Скопје.

„Подолг период не функционираат мерните станици во Гази Баба и Лисиче, а мерната станица во Ѓорче беше изгасена откако покажа енормно ниво на загаденост. Власта наоѓа пари за луксузирање, скапи цвеќиња, кафе и лубриканти, но нема пари кога станува збор за поправка на мерните станици. Шилегов и Министерството за животна средина да не наоѓаат изговори и во најбрз можен рок да извршат сервисирање и поправка на расипаните мерни станици. Обврска на власта, а право на граѓаните е да знаат за квалитетот на воздухот кој го дишаат“, рече Попова.

Таа додаде дека граѓаните не смеат да бидат држени во незнаење и мрак во однос на животната средина и воздухот кој го вдишуваат, а СДСМ не смее да си поигрува со здравјето на граѓаните.

„Шилегов и СДСМ ги изманипулираа граѓаните, едно од главните предизборни ветувања на градоначалникот беше чист воздух и чиста животна средина. На страница 7 од програмата на Петре Шилегов за локалните избори која ја нарекоа ‘живот за сите’, напишаа: ‘Наш приоритет е подобрувањето на квалитетот на воздухот, а со самото тоа и квалитетот на животот за сите. Во градот ги носиме најреволуционерните патенти за прочистување на воздухот на денешнината, применети во најзагадените градови во светот, каков што е, на пример, градот Пекинг.’ Една година подоцна ништо од почистиот воздух и ништо од револуционерните решенија“, рече Попова.

Таа додаде СДСМ и Шилегов ги излажале скопјани за најчувствителното прашање, па затоа градоначалникот треба да си замине од функцијата.