Македонија
(Видео) Прес-конференција на Заев и Брнабиќ: Односите меѓу двете земји нема да се нарушат поради лажните вести
Лажните вести нема да застанат на патот на добрососедските односи меѓу Македонија и Србија, изјави премиерот Зоран Заев на прес-конференцијата со српската колешка Ана Брнабиќ. Тој одговара на прашањето како пишувањата на српските медиуми за неговата вмешаност во случајот „Рекет“ може да влијаат на односите меѓу двете земји.
„Нам политичарите, знам јас по себе, должност ни е да работиме на градење на пријателството и секогаш да помогнеме сите да разграничиме што е тоа критичко новинарство, што се лажни вести. Треба да има критичко новинарство, тоа е многу здраво за демократијата, но истовремено лажните вести и невистините се штетни и ја уништуваат демократијата“, рече Заев.
Брнабиќ смета дека лажните вести на сите ни одземаат многу време и енергија и дека секогаш постои дилемата дали да се справите со лажните вести или да работите нешто во интерес на граѓаните. „Сè додека има повеќе конкретни иницијативи, заеднички проекти, директна комуникација, меѓусебни посети, тоа дава многу појасна слика за меѓусебните односи отколку сите други лажни вести. Но, лажните вести се нешто со кое ние политичарите во светот ќе мора да се пресметаме“, рече премиерката.
Запрашани за тоа дали разговарале за тоа што Македонија не ѝ го екстрадира на Србија поранешниот борец на Косовската ослободителна армија, Томор Морина, и двајцата премиери се согласија дека тоа е прашање на судството.
На прес-конференцијата премиерот Заев истакна дека заедно со топлото и срдечно добредојде за српската делегација, ја оцени оваа посета како уште еден придонес во негувањето традиционално добрососедски односи меѓу двете пријателски земји, кои се заеднички посветени на унапредување на регионалната соработка и на интеграцијата во ЕУ на нашиот регион, врз основа на индивидуални заслуги и резултати на секоја земја посебно.
„На средбата меѓу двете делегации и на тет-а-тет средбата со премиерката Брнабиќ, ја истакнав нашата заложба за одржување континуиран политички дијалог на највисоко ниво. Го искажав нашиот жив и силен интерес за одржување трета заедничка седница меѓу двете влади со цел поттикнување на понатамошната севкупна соработка. Тоа ќе помогне да му дадеме поттик и на денешниот значаен настан кога на граничниот премин Табановце – Прешево свечено го отворивме заедничкиот премин по принципот One Stop Shop и кој претставува реализација на една од целите на повеќегодишниот акциски план за создавање регионална економска област на Западен Балкан“, потенцира премиерот Заев и додаде дека овој проект е уште една круна на пријателството и добрососедството помеѓу двете држави.
На прес-конференцијата Заев информира и за трите спогодби што денеска беа потпишани: спогодбата за заедничко признавање доверливи услуги, кои се користат во земјите во соработка со Министерството за информатичко општество и администрација од наша страна и ИОА и Министерството за трговија, туризам и телекомуникации од страна на Република Србија, што во пракса значи дека електронските документи издадени од институциите во Северна Македонија ќе бидат еднакво признаени и во Србија и обратно и на овој начин – за граѓаните од двете земји ќе се намалат административните процедури и времето потребно за издавање овие документи.
Вториот документ е спогодбата меѓу министерствата за финансии и царинските управи на Северна Македонија и Србија за заемно признавање на издадените одобрувања за овластен економски оператор и третиот е спогодбата за соработка во фитосанитарната област и областа на безбедноста на храната и ветеринарство помеѓу министерствата за земјоделсрво на двете земји.
„Нашите намери за продлабочување на инфраструктурното поврзување продолжуваат и во делот на идентификување заеднички интереси и настапи за добивање поддршка за транспортни, инфраструктурни и енергетски проекти од обостран интерес во согласност со насоките од берлинскиот процес, од кои се очекува економската компонента на односите меѓу двете земји да продолжи да се унапредува преку континуираните B2B (Би-ти-би) средби на секторско ниво, на бизнис-форуми, како и со заедничко вмрежување за настап на трети пазари“, нагласи премиерот Заев и додаде дека заедно со соработката во туризмот со заедничка промоција на туристичката понуда на двете земји на трети пазари од посебен интерес и со големи очекувања се работи на иницијатива за заемно отворање културно-информативни центри во Белград и Скопје како уште еден вреден сегмент што ќе го зајакне традиционалното пријателство меѓу Северна Македонија и Србија.
„Наша трајна и непоколеблива заложба е да ги решаваме сите отворени прашања во регионот преку инклузивен дијалог во интерес на сите граѓани со цел одржување на трајниот мир, развој на демократијата, економијата и животниот стандард на граѓаните“, истакна Заев во завршницата на своето обраќање на заедничката прес-конференција со премиерката Брнабиќ.
Претседателката на владата на Република Србија, Ана Брнабиќ, во своето обраќање се задржа на значењето на спогодбите што денеска ги потпишаа претставниците на двете влади, што ќе ѝ дадат конкретна поддршка на работата на концептот One-stop-shop, заедничко управување на граничните и царински контроли со едно застанување на граничниот премин Табановце – Прешево.
Брнабиќ го оцени настанот на граничниот премин како историски и како инспирација за сите други земји од Западен Балкан за ваков тип соработка, кој ги приближува земјите до моделот на земјите на ЕУ кон кои се стремат сите земји од регионот. Брнабиќ се согласи со премиерот Заев дека надминувањето на вредноста на трговската размена на двете земји од 1 милијарда евра во 2018 година е силен мотив соработката да продолжи насочена кон иднината, а иднината на двете земји е членството во ЕУ. Во таа насока претседателката на владата на Србија, Брнабиќ, изрази надеж дека Северна Македонија набргу ќе ги почне преговорите со ЕУ и дека Србија е подготвена да ја даде максималната поддршка за Република Северна Македонија за остварување на оваа цел. Премиерите на двете земји потоа одговараа на прашања од интерес на новинарите од двете земји.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска: Како никој не се сети да им каже во ЕУ дека самите во член 4 гарантираат немешање во внатрешните работи и почитување на уставните структури
Како може некому да ветите дека ќе го смените Уставот, кога Уставот може да го сменат само пратениците во Уставот. Како знаете, дека вие можете однапред да ветите нешто што не е ваша надлежност?, му порача кандидатката за претседателка од ВМРО-ДПМНЕ, Гордана Силјановска-Давкова на нејзиниот опонент Стево Пендаровски во телевизиско соочување вечерва.
„Деновиве Макрон даде изјава дека ЕУ не е само територија, туку е концепција на човештвото и правото. Е, од тоа тргнувам и јас кога размилувам за ЕУ. За нејзините темелни вредности и принципи без кои таа не е политине заедница туку е само машинерија. Значи таа не е догма. Што ќе направам јас? Најпрво ќе направам регионални чекори. Штом ќе завршат изборите јас сакам да разговарам со моите соседи и заради регионалната политика и заради очекуваната поддршка од нив. Сакам да објаснам дека и кога има една преговарачка рамка не е логична заканата со вето. И дека може, дури и кога преговарачката рамка е ваква, низ интерпретација поинаква да се примени. Од типот, ако вие речете дека нема да употребувате вето за идентитески прашања, за историските дилеми и слично, протоколите, туку за Копенхагенските критериуми, јас ќе бидам сосема согласна. Значи, мислам дека е време кога ќе се смени власта, да чуе што мислиме и ние. Оти тоа е дијалогот што е нужен за добрососедски односи. Ако некој не го кажувал и ова досега, веројатно и тогаш било се во нивни раце“, рече Силјановска-Давкова.
Понатаму, како што додаде, како никој не се сетил да им каже на оние од Советот и од Европската комисија и сите останати со тоа се рушат темелните вредности на ЕУ? Бидејќи ЕУ гарантира во членот 4 почитување на уставните и политичките структури, немешање во внатрешните работи, почитување на дигнитет и интегритет, различности, неставање на билатерални спорови во рамката. Ако тоа не го кажете, вие ќе останете на прагматичните решенија.
Доаде и дека ниту еден од темелите на кои почивала програмата на Пендаровски во 2019 година не останале. Сите се урнале и ништо не е остварено.
Македонија
СДСМ за Димитриевски: Ароганција е кога човек-партија одработува против своите довчерашни сопартијци
Ароганција е кога човек-партија одработува против своите довчерашни сопартијци и во тоа нема ништо социјалдемократски ниту вредносно туку единствено и само личен интерес, реагира СДСМ по обвинувањата кои ги упати Максим Димитриевски од ЗНАМ, дека дозволиле отварање на бугарски клубови во Македонија и нивната ароганција е ненадминлива.
„За тоа кој ги отвораше клубовите со имиња како Ванчо Михајлов адресата е Белиот дворец на ДПМНЕ. Многу позната адреса каде ЗНАМ ги договара идните чекори за соработка заедно со поддршката на Гордана Силјановска Давкова.
Освен сликите на Ванчо Михајлов по штабовите на ДПМНЕ доволно говорат сликите на Мицкоски со основачите на тие клубови по манастирите низ државава за кои не слушнавме ниту збор од ЗНАМ.
Дали е тоа поради враќање на стари долгови за локалните избори 2021 година во Куманово или нови долгови јавноста ќе види многу скоро“, се вели во реакцијата на СДСМ.
Македонија
Утревечер и во петок нестабилно време со пороен дожд и грмежи
Времето утре ќе биде променливо облачно.
Од пладневните часови на повеќе места ќе биде нестабилно со пороен дожд и грмежи, локално во форма на краткотрајно невреме со засилен ветер и услови за изолирана појава на град. Услови за пороен дожд ќе има во текот на ноќта. Минималната температура ќе биде во интервал од 6 до 12, а максималната ќе достигне од 18 до 25 степени.
Во Скопје променливо облачно. Од пладневните часови во делови од котлината ќе биде нестабилно со пороен дожд, грмежи, засилен ветер и услови за изолирана појава на краткотрајно невреме. Минималната температура ќе се спушти до 12, а максималната ќе достигне до 23 степени, јавува УХМР.
Во наредните денови, следува период на променливо облачно време со повремени локални врнежи од дожд. Утре, во ноќта кон петок и во петок на повеќе места ќе има развој на нестабилна облачност проследена со пороен дожд и грмежи, локално во форма на краткотрајно невреме со засилен ветер и услови за изолирана појава на град.
Дневната температура од утре до сабота ќе биде во постепено опаѓање, а во недела ќе се покачи за 2 до 4 степени..