Македонија
(Видео) Привршува конзервацијата на црквата „Св. Ѓорѓи“ во Курбиново

Премиерот Димитар Ковачевски, заедно со министерката за култура, Бисера Костадиновска-Стојчевска, денеска, како дел од посетата на Преспанскиот Регион, ја посети и црквата „Св. Ѓорѓи“ во селото Курбиново. Притоа на премиерот Ковачевски му беа презентирани тековните градежни активности за заштита на црквата „Св. Ѓорѓи“ во селото Курбиново, која претставува несекојдневен пример на византиската уметност од XII век.
Црквата „Св. Ѓорѓи“ во Курбиново е позната по најстарото сочувано ѕидно сликарство, кое претставува несекојдневен пример на византиската уметност од крајот на XII век (1191 година), особено по оригиналните фрески, меѓу кои и фреската на ангелот Гаврил од Курбиново (како дел од композицијата Благовештение), која е отпечатена и на банкнотата од 50 денари.
Почнувајќи од 2013 година, реализирани се неколку проекти за заштита и конзервација на црквата „Св. Ѓорѓи“ во Курбиново, како што се конзерваторски истражувања, анализи, реконструкција и активности за конзервација на црквата, за што досега се исплатени над 360.000 евра буџетски средства.
„Заштитата на културното наследство и натаму претставува еден од приоритетите на Владата на Република Северна Македонија и на Министерството за култура. За таа цел, Владата континуирано вложува во заштита на културните добра, меѓу кои е и црквата ‘Св. Ѓорѓи’ во Курбиново, која веќе е впишана на тентативната листа на УНЕСКО (44. сесија на Комитетот на УНЕСКО за светско наследство – Фуџу, НР Кина, јули 2021 година), што е прв чекор во процесот на впишувањето едно добро на листата на УНЕСКО на светско наследство. Изработката на досието за впишување на оваа листа беше извршено од страна на надлежната институција, НУ Завод за заштита на спомениците на културата и Музеј – Битола, и се одвиваше во согласност со оперативниот водич на УНЕСКО за имплементација на Конвенцијата за светско наследство“, велат од Владата.
Претходно, во втората половина на 2019 година, беше изработен основниот проект за архитектурата и за статиката на црквата „Св. Ѓорѓи“ во Курбиново, чија реализација, поради глобалната здравствена криза, почна во 2021 година. Најголем дел од конзерваторските работи е завршен до крајот на 2022 година. За 2023 година, останува да се завршат изведбата на потпорниот ѕид на северната страна и соодветни дренажни канали, како и конзервацијата на ѕидното сликарство во ентериерот и екстериерот на црквата. Целосната реализација на сите сегменти на црквата „Св. Ѓорѓи“ во Курбиново вклучува и изведба на натстрешници за заштита на ѕидното сликарство на фасадата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Македонија годинава ќе биде со најнизок економски раст во регионот

Претседателот на СДСМ, Венко Филипче, денеска беше во посета на Радовиш, каде што се сретна со граѓаните и разговараше за предизвиците со кои се соочуваат во секојдневниот живот.
„По десет месеци од новата власт, разочарувањето е големо. Цените продолжуваат да растат, платите стагнираат, а граѓаните сè потешко врзуваат крај со крај“, истакна претседателот на СДСМ, Венко Филипче.
Филипче нагласи дека СДСМ со месеци дава конкретни предлози и закони за раздвижување на економијата и зголемување на платите, но дека власта останува глува.
„СДСМ со месеци дава конкретни предлози и закони со кои ќе се раздвижи економијата и ќе се зголемат платите, но власта е глува. Со месеци предупредувавме дека економијата тоне, а денес таа потврда стигна и од проекциите на Светската банка. Македонија, за жал, оваа година ќе биде со најмал економски раст во регионот. Владата ветуваше дека ќе бидеме лидери во регионот, но очигледно ќе бидеме последни. Ова е резултат на погрешни економски политики, но и целосна негрижа за граѓаните“, изјави Филипче.
Во своето обраќање, тој подвлече дека СДСМ останува на страната на граѓаните и ќе продолжи да работи за подобар живот за сите
„СДСМ ќе продолжи да работи и нуди решенија, силно верувам дека граѓаните ќе ја препознаат искрената намера и чесните политики кои се наменети за подобар живот“, додаде претседателот на СДСМ.
Македонија
СДСМ: Тошковски мораше да го признае скандалот со братот на Стефковски – треба да си даде оставка

Откако СДСМ денеска го објави скандалот со братот на градоначалникот Стефковски со видео докази, Тошковски беше принуден јавно да го признае. Ниту ќе го признаел, ниту ќе бил било кој санкциониран за ова, иако јавна тајна е дека функционерите на ДПМНЕ се однесуваат како шерифи, а Тошковски тоа добро го знае, велат од СДСМ.
„Денешното признание на Тошковски потврдува две работи: прво, дека СДСМ изнесува вистини и, второ, дека функционерите на ДПМНЕ, нивните браќа, сестри и роднини не ги почитуваат законите, а Тошковски тоа го овозможува. Граѓаните не се наивни — да не објавеше СДСМ, Тошковски ќе го криеше и натаму скандалот“, велат од СДСМ.
Според нив, веќе не се ни бројат скандалите кои го тресат МВР.
„Владее хаос, своеволие кои допрва ќе излегуваат на виделина. Уште што треба да се случи за Тошковски да поднесе оставка? СДСМ ќе продолжи гласно да ја брани правдата, законитоста и интересите на граѓаните“, велат од СДСМ.
Македонија
Гаши засега ќе се воздржи од коментари за претседателката на Антикорупциска

Во врска со актуелните настани поврзани со претседателката на Државната комисија за спречување на корупцијата, Татјана Димитровска, од кабинетот на Претседателот на Собранието, Африм Гаши, велат дека тој засега ќе се воздржи од коментари, а ако наводите се потврдат во судска постапка, тој ќе иницира постапка за разрешување.
„Почитувајќи го начелото на презумпција на невиност и независноста на судските органи, Претседателот на Собранието се воздржува од какви било прерани коментари. Основен приоритет е да им се овозможи на надлежните институции да ја завршат својата работа без било какви притисоци или влијанија. Сепак, доколку наводите бидат потврдени низ судска постапка, Претседателот на Собранието ќе постапи без двоумење и ќе иницира соодветна собраниска процедура за разрешување“, се наведува во соопштението од Кабинетот на Африм Гаши.
Одговорноста за зачувување на кредибилитетот и интегритетот на институциите, велат од таму, е врвен приоритет и обврска која не трпи компромис.
Претседателката на антикорупциската комисија, Татјана Димитровска, е осомничена во дополнетата истрага за предметот „Адитив“. Таа се сомничи дека преку апликациите за пораки „Вибер“ и „Воцап“ му одавала службени тајни на друг обвинет за поведени постапки за отворање предмети и одлуки против сега обвинетите фирми и лица во предметот „Адитив“, како и податоци за проверка на имотот и на неговото семејство.
Покрај тоа што ѝ e одземен пасошот, Кривичниот суд определи и забрана за преземање одредени работни активности поврзани со кривичното дело, што подразбира дека осомничената не смее да има контакт со предмети, пошта и друга документација поврзана со работењето на ДКСК, а воедно не може да гласа и да распределува предмети.