Македонија
(Видео) Прием на нови 125 професионални војници во АРМ

Од денеска, Армијата на Република Северна Македонија во своите редови има нови 125 професионални војници, прва од двете планирани класи за оваа година по приемот на 375 професионални војници минатата, 2018 година.
На свеченоста во велешката касарна „Алексо Демниевски – Бауман“, министерката за одбрана, Радмила Шекеринска, истакна дека со приемот на овие 125 професионални војници, се подмладува армискиот состав, а се создаваат и идни армиски генерации коишто ќе ја претставуваат нашата земја како дел од најмоќниот воено-политички сојуз на денешницата, стратешка цел која нашата држава ќе ја достигне по цели три декади.
„Изминатите две години, од една страна го сработивме членството во НАТО, но од друга страна не ја заборавивме нашата армија и затоа успеавме да обезбедиме поголеми буџети, успеавме да обезбедиме зголемување на платите две години по ред и успеавме да примиме нови припадници на армијата и минатата и оваа година“, рече министерката Шекеринска.
Во однос на идните чекори, министерката посочи дека фокусот е ставен на подобрување на законските решенија, за кои, рече дека наскоро ќе влезат во собраниска процедура, како и фазата на приоритетните проекти за модернизација.
„По 16 години армијата доби нови инженериски машини коишто ни се многу важни, како за армиските потреби, така и за потребите на граѓаните. Во вториот дел од 2019 година, фокусот ни е ставен на набавка на борбени возила и набавка на заштитна опрема за сите војници“, истакна министерката. Заклучи дека Владата и Министерството покажаа дека не треба да се избира помеѓу членството во НАТО или постоењето на силна армија и дека изминатите две години беше вложено и во двете цели, и дека резултатите се евидентни и по двете важни прашања.
На новопримените професионални војници министерката им порача дека армиската средина е една од најдобрите средини за континуирано растење и развивање, за учење и постојна обука.
„Ова е средина во која вратите кон усовршување и дома и кај нашите партнери и сојузници во странство се навистина широко отворени. Во текот и на обуката и првите денови како професионални војници ќе видите дека дел од вашите колеги се на обука во САД, или Велика Британија, дел од старешините се на високи школи во Турција, Италија, Бугарија, Германија, дел се на вежби во Црна Гора, Германија, Словенија, Хрватска, а некои се дел од нашите мисии во Авганистан, Босна и Херцеговина и Либан. Ние ќе направиме сè што е во наша моќ, отворените врати кон светот да бидат уште поотворени“, истакна министерката.
На свеченоста, освен министерката Шекеринска, на новопримените професионални војници, договорите за работа им ги врачија и началникот на Генералштабот, генералот Васко Ѓурчиновски, заменик-министерот Беким Максути, директорот на Генералштабот, генералот Зоран Миле Милевски, и командантот на Здружената оперативна команда, генералот Павле Арсоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
32-годишен скопјанец осомничен за разбојништво во Бучимци: маскиран и со ловечки нож ограбил соселанец

Јавен обвинител од Основното јавно обвинителство Скопје поведе постапка против едно лице осомничено за кривично дело – Разбојништво од член 237 став 4 во врска со став 1 од Кривичниот законик.
Осомничениот 32-годишен скопјанец, на 18 август, маскиран со маица со која си го покрил лицето и капа, преку незаклучена влезна врата влегол во домот на негов соселанец во селото Бучимци. Во рацете држел ловечки нож и кога во една од собите го затекнал сопственикот, му се заканил дека ќе го убие ако не му даде пари.
Оштетениот, исплашен за својот живот, извадил 4.000 денари од комодата, но го замолил разбојникот да му дозволи да задржи барем 1.000 денари, бидејќи му се неопходни.
Осомничениот се согласил и го напуштил местото со 3.000 денари кои противправно ги одзел од сопственикот.
Јавниот обвинител до судијата на претходна постапка достави предлог за определување мерка притвор за осомничениот, бидејќи постојат околности кои укажуваат на опасност од бегство, можност за влијание врз сведокот/оштетен со заплашување и уценување, како и можност да го повтори делото.
Македонија
Зголемена фреквенција на возила на граничните премини Табановце и Богородица

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП „Табановце“ времето на чекање за влез е околу 20 минути, за излез е околу 40 минути.
На ГП „Богородица“ времето на чекање за излез знесува околу 20 минути, додека на останатите гранични премини од македонска страна нема подолги задржувања при влез или излез од државата.
Македонија
Вицепремиерот Николоски во Будимпешта на прослава на Националниот ден на Унгарија

Вицепремиерот Александар Николоски на покана на премиерот на Унгарија, Виктор Орбан, присуствува на Националниот ден кој се слави во чест на Свети Стефан основачот на унгарската држава и христијанството во Унгарија.
Покрај учеството на прославата на националниот ден, предвидени се повеќе средби со високи претставници на владата на Унгарија, неколку министри и потенцијални инвестиции. На средбите е предвидено да се разговара за динамиката на проектите во Македонија како и за идната засилена економска соработка помеѓу двете држави.
Посетата на вицепремиерот е уште една потврда за одличното пријателство и соработката помеѓу Македонија и Унгарија, се додава во соопштението на Министерството за транспорт.