Македонија
(Видео) СДСМ: Нов скандал во Националната агенција „Еразмус“, Ана Михајлов, осомничена од ОЛАФ, назначена за в.д. директорка?

„Денеска објавуваме нов скандал на власта. Како пред очите на целата јавност, Владата на ВМРО-ДПМНЕ и Христијан Мицкоски повторно ја враќа вмровската партиска мафија во Националната агенција за европски образовни програми? Која патем управува со милионски фондови од Европската унија преку Еразмус +. Пред десетина дена, поточно на 1 август, на местото в.д. директор на Агенцијата, без транспарентност и без консултација со Европската унија, е назначена Ана Михајлов“, рече Јовица Јанковиќ, потпретседател на СДММ.
„Клучното прашање е што се крие зад назначувањето на Ана Михајлов на чело на Агенцијата која во минатото беше во самиот центар на најголемиот скандал во оваа институција?
Огласот беше поништен а причините за поништувањето останаа мистерија.
Ниту начинот ниту времето на назначувањето воопшто не е случајно.
Сега започнуваат локалните избори и најважно завршува истрагата за предметите што ОЛАФ, Европската канцеларија за борба против измами, ги достави до македонското обвинителство.
Токму во овие документи, според нашите информации од свиркачи осомничена е новата директорка, Ана Михајлов.
Ова е официјалниот извештај на ОЛАФ од 2023 година, каде јасно е наведено дека постои основано сомневање за злоупотреба на над 2 милиони евра во периодот на претходната влада на режимот на Груески, за период кој започнува во 2016 година.
Како што е наведено, идентификувани се повеќе од 50 физички и правни лица во Македонија и пет земји-членки на ЕУ, сите дел од вмровската шема. Преку вмровските внатрешни кадри, вработени во агенцијата, протекувале информации за апликанти и евалуатори.
Надворешна фирма управувала со проекти на над 15 училишта, што претставува флагрантно кршење на грант-договорите.
ЈО се уште нема процесуирано обвинителен акт по овој целосно документиран предмет доставен на јавното обвинителство во 2023 г одина и повторно актуелизиран во 2024 година.
Од свиркачи внатре во Агенцијата СДСМ дознава дека власта прави силен притисок да се спречи истрагата на Јавното обвинителство.
Дали затоа што води токму до Ана Михајлов и нејзините најблиски фамилијарни и пријателски ангажирани евалуатори од ВМРО-ДПМНЕ?
Прашуваме:
Дали ова е причината да биде поништен претходниот конкурс за директор?
По кој критериум е назначена токму Ана Михајлов и зошто токму сега?
Дали зад назначувањето на Михајлов се крие вистинската намера на власта да ја блокира истрагата на ОЈО и ОЛАФ?
Ова е враќање на вморвската мафија во Агенцијата и јавноста очекува одговори.
СДСМ ќе ја продолжи оваа тема и ќе ја информира јавноста за сите детали и информации со кои располагаме за овој скандал“, изјави Јовица Јанковиќ, потпретседател на СДММ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ: „Вреди“ вети Европа, донесе „Српски свет“

„Вреди“ дојде на власт со големи ветувања и со строги рокови за уставните измени. Прво ветија дека тоа ќе се случи пред формирање на Владата. Потоа рекоа во првите 100 дена. Потоа во три месеци. На крај, во шест месеци. Денес, по една година, Албанците слушаат само оправдувања од Изет Меџити и неговите соработници дека „времето не било доволно“, велат од ДУИ.
Вистината како што додаваат од оваа партија е едноставна: немаат ниту визија, ниту храброст, ниту политичка волја. Наместо уставни измени и европска интеграција, „Вреди“ ја отвори вратата за опасни влијанија од Белград и Москва, ја поткопа Охридската рамковна спогодба, ја ослаби позицијата на Албанците и ја блокира европската иднина на државата.
„Оваа власт стана симбол на неуспеси и секојдневни скандали. Изборните измами станаа нивната единствена владејачка практика:
• Ветија 2.500 работни места – граѓаните добија разочарување.
• Ветија финансиска поддршка за младите – граѓаните добија нула.
• Ветија национални проекти – го донесоа Иван Стоилковиќ како вицепремиер за имплементација на Охридскиот мировен договор.
• Ветија уставни измени и интеграција во ЕУ – донесоа партнерства со политичари што го пропагираат „Српскиот свет“.
Како што нагласи поранешниот министер за надворешни работи Бујар Османи, избегнувањето на дебатата за ЕУ и одбивањето на мониторинг-механизмите не се случајни – тоа е стратегија за прикривање на корупцијата и неуспесите на оваа влада и за спречување на еднаквоста на Албанците“.
„Вреди“ оценуваат во ДУИ, се покажа како голема политичка измама и национален срам кој ја изолира државата и ги исклучува Албанците од одлучувачките процеси.
Октомври, според нив, ќе биде моментот кога граѓаните ќе кажат „доста“ на измамите, неуспесите и слепата послушност кон антизападните интереси.
„Граѓаните заслужуваат достоинствено претставување и јасна европска визија, а не празни ветувања и смешни оправдувања. Во октомври, тие ќе ја манифестираат својата волја на народниот референдум. Никој нема да може да избегне од политичката и правната одговорност“.
Македонија
Мециновиќ: Партијата Левица обезбеди конкретни придобивки за скопските средношколци – следуваат нови проекти

Кандидатот за градоначалник на Скопје од редовите на Левица, Амар Мециновиќ, преку објава на социјалните мрежи се осврна на досегашните иницијативи на советничката група на партијата во Советот на Град Скопје, со посебен акцент на мерките кои се однесуваат на средношколците.
Како што посочи Мециновиќ, благодарение на Левица денес средношколците од социјално ранливи категории имаат бесплатни екскурзии, во училиштата се воведени сензорни соби за деца со попреченост, а надоместокот за образовните асистенти е зголемен од 9.000 на 18.000 денари. Дополнително, организирани се и едукации за самозаштита при пожари.
Од друга страна, тој нагласи дека дел од иницијативите не биле поддржани од мнозинството во Советот, предводено од ВМРО-ДПМНЕ. Меѓу нив се наоѓаат вработување на училишни чувари наместо користење на приватни обезбедителни фирми, бесплатни часови по странски јазици, спорт и информатика, забрана за отворање угостителски објекти во училишни дворови, како и транспарентна супервизија на тендерите за ученички екскурзии.
„Ова е насоката во која ќе се движиме и понатаму, а во кампањата ќе претставиме и поголеми замисли за училиштата под градската управа. Скопје, младост – ти ќе бидеш!“, порача Мециновиќ.
Македонија
Чулев: Кога службите стануваат политичко оружје, страда демократијата

Кога службите стануваат политичко оружје, страда демократијата. Внатрешните истраги во Агенцијата за разузнавање и Агенцијата за национална безбедност, како и известувањата поднесени до ОЈО за грубо кршење на законот од страна на раководители и вработени во нив, недвосмислено укажуваат на системска злоупотреба на безбедносно-разузнавачките служби, објави на социјалните мрежи поранешниот директор на Агенцијата за разузнавање Наќе Чулев.
Според него, злоупотребата на државни ресурси за следење и прислушување на лидер на опозицијата и истакнати опозициски претставници, новинари, бизнисмени, обвинители, министер и кој ли уште не, не е изолиран инцидент и удар врз поединци, туку удар врз демократијата, слободата, владеењето на правото и довербата во институциите.
„На виделина излегоа и причините за мојата професионална дискредитација, но и дискредитацијата на други колеги, незаконското следење, клевети и координирана манипулативна кампања со цел елиминација на професионални кадри од безбедносниот систем, само поради идеолошки разлики.
Уште од 2020 година, и покрај сите притисоци, измислени оперативни обработки и закани, во континуитет јавно предупредував и укажував на ризиците од незаконското постапување и злоупотребата на службите со цел демонизирање на опозицијата. Тука е и латентната колатерална штета, бидејќи манипулативните и лажни белешки не застануваат кај таргетираната личност, туку отруеното досие со години фрла сенка врз сопружници, браќа/сестри и деца – блокира работни места и сертификати, комплицира визи, работни дозволи и го лимитира пристапот до граѓански права, лепи стигма, го нарушува угледот и достоинството и на тој начин станува колективна казна“.
Денес, како што истакнува, кога е евидентно дека ресурсите на службите брутално се злоупотребувале за политички, бизнис и лични интереси, апелира дека е неопходно да има целосна истрага, декласификација на дел од фабрикуваните материјали и санкционирање на нарачателите и извршителите.
„Ова е битка, но и можност да изградиме модерен, транспарентен и одговорен безбедносно-разузнавачки систем кој ќе ја штити државата и граѓаните, а не ќе се користи за прогон на политички неистомисленици“, нагласува Чулев.