Македонија
(Видео) Скопје денес: зјаат дупки кај подната фонтана од 2,5 милиона евра, галијата стои јагленосана, Вардар ја однесе надежта

Подната фонтана на скопскиот плоштад со години е сува, а ова лето саксии ги штитат граѓаните и туристите за да не пропаднат во дупките што зјаат на неколку места.
На само неколку чекори од плоштадот Македонија, галијата, која трипати беше опожарена, јагленосана стои во водите на Вардар, а покрај неа врбата крстена „Надеж“ исушена, кутната во водата и со месеци служи како брана за ѓубрето во Вардар.
Градоначалничката на Скопје, Данела Арсовска, нема оправдување за очајната состојба на најстрогиот центар на градот. Од нејзиниот кабинет не одговорија на прашањата од „Макфакс“ за плановите на оваа владејачка гарнитура во Градот, ниту за подната фонтана ниту за галиите ниту, пак, за скршената од невреме врба.
Подната фонтана, која е дел од проектот „Скопје 2014“, беше пуштена во употреба во 2015 година и за нејзината изградба беа потрошени 2,5 милиона евра. Дефекти често се случуваа, па имаше периоди кога не работеше, а по посетата на папата Франциско во 2019 година, од безбедносни причини, како што тогаш објаснија градските власти, од фонтаната беа изведени некои елементи, па таа воопшто не се врати во употреба. Во меѓувреме, неколкупати камиони пропаднаа во фонтаната, па за да се спречи возењето на плочникот каде што е таа, сега просторот е ограден со жардиниери со исушена трева и бетонски топки.
Врбата со име „Надеж“ настрада во невреме пред една година. Се скрши, падна во водата на Вардар и така остана. Оваа врба, заедно со другите две, „Вера“ и „Љубов“, се дел од проектот „Три врби во Вардар“ на авторката Искра Димитрова и чинеа 278 илјади евра.
Во близина на врбите амбиентот на запуштен град го надополнува изгорената галија, која поранешниот градоначалник на Скопје, Петре Шилегов, почна да ја урива, но набргу сопреа сите активности, галијата неколкупати беше запалена. За градоначалничка беше избрана Арсовска, која не ги соопшти плановите за оваа и за другите две галии Вардар.
Емре Елез
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дождот ќе се задржи до четврток, стабилизирање дури во петок

Времето утре ќе биде променливо облачно со повремени врнежи од дожд.
Попладне, наместа ќе биде нестабилно со пороен дожд, грмежи и засилен ветер, локално во форма на краткотрајно невреме со пообилен пороен дожд (за кратко време над 15 л/м2). Минималната температура ќе биде во интервал од 4 до 9, а максималната ќе достигне од 11 до 17 степени, јавува УХМР.
Во Скопје, променливо облачно време со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 15 степени.
До четврток ќе се задржи променливо облачно и нестабилно време со повремени врнежи од дожд, особено во попладневните часови. Локално ќе има услови за појава на краткотрајно невреме со пообилен пороен дожд (за кратко време над 15 л/м2), грмежи и засилен ветер. Стабилизирање на времето ќе има во петок.
Македонија
Хуманитарен концерт на Тамара Тодевска – Пееме за Кочани

Со цел поддршка и помош на семејствата на починатите граѓани и повредените во трагедијата во Кочани, Тамара Тодевска организира хуманитарен солистички концерт.
Имено, овој музички настан ќе се одржи на 17. април (четврток), од 20:00 часот, во Младинскиот културен центар (МКЦ).
Средствата од продажбата на билетите ќе бидат наменети за семејствата на починатите граѓани, како и за сите повредени во трагедијата.
Информациите за продажбата на карти ќе бидат објавени претстојните денови, а Тамара ги повикува сите свои фанови и луѓе кои ја почитуваат македонската музика да бидат дел од овој концерт:
– Хуманоста и солидарноста се вредностите кои можат да ја вратат надежта, а се толку потребни за семејствата на починатите и повредените граѓани во трагедијата во Кочани. Во моментите на тага и жалост – да останеме луѓе, да пееме македонска музика, да пееме за Кочани. На 17. април (четврток), во @mkc_skopje, од 20:00 Ве повикувам на хуманитарен концерт за Кочани, посочи Тодевска на своите профили на социјалните мрежи.
Продажните места за картите за овој концерт ќе бидат објавени на офијалните канали на социјалните мрежи на Тамара Тодевска на Instagram и Facebook.
Македонија
Јаневска: Го јакнеме финансиското образование, градиме млади подготвени за управување со финансии и за справување со ризици и измами

Финансиската едукација на младите е исклучително важна бидејќи ги подготвува за управување со финансии и планирање на буџетот, разбирање на економските процеси и препознавање на ризиците и обидите за финансиски измами. Во таа насока, повеќе надлежни институции работат на унапредување на постојниот концепт, процес во кој од клучно значење ќе бидат резултатите од истражувањето за финансиската писменост што го спроведува Бирото за развој на образованието.
Ова го истакна министерката за образование и наука, Весна Јаневска, на денешната панел дискусија на тема „Финансиска писменост во Македонија – состојба, предизвици и решенија“ во рамки на третиот Женски економски форум кој го организираат здруженијата „Јас Сум Жена“ и „Global Shapers Skopje Hub“ заедно со Факултетот за туризам и бизнис логистика при Универзитетот „Гоце Делчев“ – Штип.
Јаневска рече дека финансиската едукација во основното образование кај нас е застапена преку теми во наставните програми по повеќе предмети, а постојат и слободни изборни предмети и воннаставни активности. Станува збор за интегриран пристап воведен по препорака на ОЕЦД. Во средното образование пак, односно во гимназиското и уметничкото има задолжителен предмет, а во стручното – задолжителен и изборни предмети постојат во одредени струки.
„Секој концепт може да биде и подобар и затоа Министерството за образование и наука со Министерството за финансии, Народна Банка, Македонската банкарска асоцијација и други страни тесно соработуваат, разменуваат информации, идеи и искуства за да може постепено финансиската едукација да се надградува –преку проширување на наставната материја, преку повеќе обуки на наставниот кадар и слично. Во оваа насока од особена важност ќе бидат и резултатите од истражувањето за финансиската писменост што го спроведува Бирото за развој на образованието, а кое ќе ни обезбеди податоци за идните политики“, рече министерката.
Осврнувајќи се на подготвеноста на младите да препознаваат финансиски измами, рече дека тоа се глобални предизвици кои бараат постојана адаптација, учење и заедничка регионална и меѓуинституционална соработка.
Покрај панел дискусијата посветена на финансиската писменост на која учествуваше и министерката за финансии, Гордана Димитриеска Кочоска, во рамки на форумот се
одржаа и работилници на тема „Клуч за финансиски успех“ и „Сајбер ризици и заштита на личните податоци“.