Македонија
(Видео) Стоилковски: Директорот на „Водовод“ за 9 месеци потрошил 22.000 евра на кафе и кафеани

Душко Весковски, директорот на ЈП „Водовод“, од парите на претпријатието за девет месеци на кафе и кафеани има потрошено 1.323.419 денари, речиси 22 илјади евра, обвини портпаролот на ВМРО-ДПМНЕ, Наум Стоилковски.
„На кафе и кафеани само во ресторани Душко Весковски има потрошено 17 илјади евра. Толку пари од ЈП ‘Водовод’ се потрошени за репрезентација според извештајот што беше презентиран пред јавноста на седницата на Советот на Град Скопје“, посочи партискиот портпарол.
Стоилковски обвини дека ваквите неосновани трошења се случуваат во услови на ужасна економска криза.
„За спонзорства и донации, според извештајот, биле дадени 2.308.593 денари или речиси 38 илјади евра, пари од ЈП ‘Водовод’. Во споредба со минатата година за овие две ставки, за репрезентација се потрошени речиси петпати повеќе. Истата слика е и за донации и спонзорства, 450 % повеќе.
Наместо да седи во кафеани, Весковски требало да се загрижи зошто компанијата оди во минус со наплата што е речиси половина, само 57 %, но и како е можно дури 40 % од неплаќачите да се фирми. Наместо да троши на репрезентации, Весковски требало да мисли зошто имало потреба од речиси 50 вработувања во услови кога не може да ја реализира наплатата што привремено што постојано“, нагласи портпаролот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Осомничен за трговија со дрога ја искинал наредбата за претрес во неговиот дом

Oбвинителството поведе истрага против едно лице за неовластено производство и пуштање во промет наркотични дроги. Тој е осомничен и за одземање или уништување службен печат или спис.
Осомничениот, во својот дом во Гевгелија, неовластено заради продажба држел 26,42 грама наркотична дрога кокаин. Дрогата и повеќе други предмети со траги од кокаин биле пронајдени на 1 август, при претрес во неговата јакна закачена во ходникот од семејната куќа.
При претресот, полициските службеници на осомничениот му ја предале и прочитале издадената наредба за претрес од судијата на претходна постапка при Основниот суд Гевгелија. Наредбата примена во МВР и со службен печат на МВР, тој ја зел и ја искинал пред службените лица и на тој начин оштетил спис кој припаѓа на државен орган, односно наредба издадена од Основен суд Гевгелија и примена од МВР ОВР Гевгелија.
Бидејќи постојат законски основи, надлежниот јавен обвинител до судијата на претходна постапка достави предлог за определување мерка притвор за осомничениот.
Македонија
Цела ноќ борба со огнот во велешката фабрика – изгореа магацин со фрижидери и канцеларии со документи

Пожарот што синоќа избувна во фабриката за прехранбени производи „Мирана“ во Велес бил целосно локализиран рано утрово, околу 4 часот. Според информациите од надлежните, огнот зафатил магацински простор и канцеларии, а на неколку места сè уште се забележува слабо чадење.
Пожарот бил пријавен околу 22 часот. Горел магацин каде што имало пластична амбалажа, фрижидери и друг материјал, како и канцелариски простории со документација.
Во гаснењето учествувале три противпожарни возила од ТППЕ Велес со екипи од три смени, возило од ЈКП „Дервен“, како и две специјални возила на Дирекцијата за заштита и спасување. На терен биле и шестмина полициски службеници од Велес.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.
Причините за избувнувањето на пожарот сè уште се испитуваат.
Македонија
Голем пожар во фабрика во Велес

Синоќа избувна голем пожар во фабриката за храна „Мирана“, лоцирана во индустрискиот блок на Велес, потврдија надлежните.
На барање на Територијалната противпожарна единица Велес, привремено беше исклучена електричната енергија во фабриката.
„Во Велес, кај индустрискиот блок, опожарена е фабриката ‘Мирана’. По барање на ТППЕ Велес, исклучена е струјата во фабриката. Единиците за гаснење на пожарот се на терен“, информираше директорот на ЦУК, Мухамед Али.
Директорот на ДЗС, Стојанче Ангелов, информираше доцна синоќа дека нема информации за повредени лица при пожарот.
Причините за избувнувањето сè уште не се познати.