Македонија
(Видео) Спасовски: Земјоделците од Ранковце добиваат модерен систем за наводнување на површина од над 200 хектари

На отпочнувањето на работите на системот за наводнување Славишко Поле во општина Ранковце, денеска присуствуваа премиерот Оливер Спасовски, заедно со министерот за земјоделство, Трајан Димковски и шефот на делегацијата на Европската унија во нашата земја, Самуел Жбогар.
Премиерот Спасовски истакна дека системот за наводнување Славишко Поле е исклучително важен проект за развојот и иднината на општина Ранковце.
„Овој проект е особено значаен затоа што е од непосреден, директен интерес на преку 1500 жители од населените места Псача, Петралица и Гиновци, од кои мнозинството од населението се занимава со земјоделство и сточарство“, подвлече Спасовски.
Тој истакна дека досегашниот застарен систем за наводнување во атарот на Општината Ранковце покрива околу 40 хектари, а со овој, граѓаните на општината ќе добијат модерен систем за наводнување кој ќе обезбедува вода за наводнување за преку 200 хектари.
„Тоа значи дека со изградбата на новиот систем за наводнување, голема површина од обработливо земјиште во општината и околните села, кое во моментов е без вода, конечно ќе биде употребливо и ќе биде ставено на располагање на земјоделците. На овие наши сограѓани ќе им се овозможи да обработуваат 5 пати поголема земјоделска површина со стабилен систем за наводнување, со што ќе се создадат услови за замена на постоечките култури со некои попрофитабилни култури, со поголема додадена вредност“, потенцираше премиерот.
Воедно тој посочи дека дека придобивката од овој нов систем е одржување и развивање на земјоделските активности за кои луѓето имаат традиција, на начин што ќе се почувствува за целото општество.
Министерот за земјоделство, Димковски објасни дека системот за наводнување „Славишко Поле“ е финансиран од „Инструментот за претпристапната помош – ИПА“ на Европската унија, во вредност од близу 1,7 милиони евра.
Амбасадорот на Европската Унија, Самуел Жбогар истакна дека со ова се одбележува почеток на нова серија на инвестициски проекти од страна на Европската Унија во сферата на земјоделството, кој што е вреден 6 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова ќе учествува на Состанокот на лидерите на земјите учеснички од Процесот „Брдо-Бриони“

Претседателката Гордана Сиљановска-Давкова од денеска престојува во работна посета на Драч, Република Албанија, заради учество на Состанокот на лидерите на земјите учеснички од Процесот „Брдо-Бриони“.
Во фокусот на годинашниот состанок ќе бидат неколку теми: Европската интеграција, Планот за раст на ЕУ, младинската политика и одливот на мозоци (brain drain), како и регионалната соработка и безбедност.
Главната цел на процесот е интеграција на сите земји од регионот во Европската Унија, како и стабилизирање на состојбите на Западен Балкан преку јакнење на регионалната соработка. Лидерите на земјите учеснички од Процесот „Брдо-Бриони“ се состануваат најмалку еднаш годишно.
Процесот „Брдо-Бриони“ е заедничка иницијатива на претседателите на Република Словенија и на Република Хрватска. Првиот состанок на лидерите се одржа во 2013 година, во Брдо кај Крањ.
Македонија
(Видео) Петрушевски: Заев своевремено зема куферче од Бојко, што зема сега Филипче за да ги продава националните интереси?

„Заев своевремено зема куферче од Бојко, што зема сега Филипче за да ги продава националните интереси?“, праша денеска на прес-конференција, Бране Петрушевски, пратеник на ВМРО-ДПМНЕ.
„Бојко Борисов своевремено сам кажа дека лично ја помогнал опцијата на Зоран Заев за доаѓање на власт. Од тогаш до сега во СДС ништо не е сменето, тоа што функционирало со Заев, функционира и со Филипче, затоа што првиот е ментор на вториот. Ако тоа го направиле еднаш и знаеме како заврши, тогаш што сега ќе добие СДС за бонбона бизнисот со Бугарија? Таканаречената Резолуција која ја брендираа со таканаречени црвени линии не се ништо друго, туку Тројански коњ за измама на народот. Но едно забораваат, народот нема да падне на нивните лаги, ниту можат повеќе да го лажат. Граѓаните видоа што се вистинските намери на СДС и затоа жестоко ќе ги казнат на овие избори“, истакна Петрушевски.
Македонија
Мециновиќ: Енегријата е очигледна, одиме во втор круг

„Енергијата е очигледна. Луѓе, одиме во втор круг! Таму ќе разговараме за многу нешта затоа што во првиот круг противкандидатите ќе бегаат од дебати. Но, во втор круг нема каде да избегаат и ќе се сретнеме конечно. Ние во мандатот ќе се залагаме за градскиот превоз, за загадувањето на градот, за зајакнување на претпријатијата и преку тоа создавање на функционални јавни претпријатија кои сите услуги ќе ги даваат на задоволително ниво. Утре продолжуваме понатаму, по улиците, онаму каде што патот ќе нè однесе. На улиците ги промовираме нашите спотови кои се цензурирани. Ова движење не е запрено, тоа станува сè поголемо од ден на ден,“ изјави Амар Мециновиќ, пратеник и кандидат за градоначалник на Скопје од редовите на Левица.
Мециновиќ заедно со кандидатот за градоначалник на Аеродром, Марјан Димитриев и советниците за Град Скопје и Општина Аеродром одржаа средба со граѓаните.
„На терен сме, лице в лице со народот – ја слушаме секоја мака и секој предлог. Нашата сила е токму во народот, а нашата визија е чиста, праведна и современа општина и град по мерка на жителите,“ порачаа од партијата.
Димитриев, кој во Аеродром влегува со амбициозна програма, пред граѓаните потенцираше:
„Денес сме тука да ја претставиме нашата програма. Дел од приоритетите се чиста и здрава општина, да ставиме крај на загадувањето и конечно да го решиме паркинг просторот. Аеродромци се спремни за победа, така што морам да кажам – доаѓа нашето време.“
Од Левица нагласуваат дека нивната цел е да го вратат Скопје и Аеродром во рацете на народот – преку транспарентно и одговорно управување во интерес на сите граѓани.