Македонија
(Видео) Спасовски и Филипче во обиколка на новото крило на Општата болница во Струмица

Техничкиот премиер Оливер Спасовски, министерот за здравство Венко Филипче, денеска заедно со директорот на Јавната здравствена установа (ЈЗУ) „Општа болница“- Струмица, Наќе Гогов при посетата на болницата, извршија увид и обиколка на новото крило со вкупна површина од 6.000 м2, каде се сместени повеќе специјалистички амбуланти.
Спасовски, истакнувајќи дека со доаѓањето на оваа Влада и Министерството за здравство е финализирана изградбата и опремувањето на Општата болница во Струмица, чија градба е започната уште пред 33 години, подвлече дека многу скоро над 200.000 жители од Струмица и околните општини, Василево, Босилево, Ново Село ќе добиваат поквалитетни здравствени услуги.
Спасовски подвлече дека во новиот крак на болницата, опремен со модерна медицинска опрема, ќе започне работата на Ургентен центар за тријажа на болни, на специјалистичките амбуланти по општа хирургија, пластична и реконструктивна хирургија, ортопедија и урологија и во завршна фаза е довршувањето на одделите по општа хирургија, гинекологија и акушерство офталмологија, оториноларингологија, неонатологија, ортопедија, како и работата на 8 –те оперативни сали со неопходната опрема за анестезиологија, реанимација и интензивно лекување.
„Минатата година ја најавивме 2020 година, како година на вложување во човечкиот капитал.Затоа ги зголемивме платите на здравствените работници, ги подобривме условите за работа – набавивме нова опрема, но и ги подобривме условите во јавно-здравствените установи.Со тоа создаваме услови граѓаните да имаат пристап до широк спектар на здравствени услуги во своите локални средини, а лекарите и медицинскиот персонал да имаа современи услови за работа за да ја пружат најдобрата здравствена услуга.Покажавме дека сме одговорна влада, која успеа да го рехабилитира цунамито што го затекнавме во здравството и да го зајакнеме здравствениот систем во нашата држава“, рече Спасовски.
Тој рече дека здравствената криза од пандемијата со коронавирусот покажа колку е важно здравствениот систем да биде цврст и со зајакнување на здравствените капацитети, во тек е справувањето со ситуацијата, пред сѐ, за да се спасат животи, но и за да се спречи здравствената криза да прерасне во поширока социо-економска криза што во голема мера ќе ги засегне децата и семејствата.
„Од почетокот на кризата со коронавирусот, на секој јавен настап повторувам една работа – вирусот ќе го победиме со многу дисциплина и безусловно почитување на мерките.Само заедно можеме да ја надминеме оваа состојба. Верувам дека од оваа криза ќе излеземе многу посилни и помудри и ќе разбереме колку се важни граѓанската солидарност, поддршката на институциите и меѓусебното помагање“, порача Спасовски, кој додаде дека темпото и континуитетот за зајакнување на здравствениот систем продолжува.
И министерот за здравство Филипчево своето обраќање истакна дека по три години интензивна работа, Струмица добива нов болнички објект и дека тоа го заслужуваат сите, здравствените работници, пациентите и граѓаните, не само на Струмица, туку и на целиот тој регион.
„Во оваа модерна болница, изградена со најмодерни материјали, со распоред според најразвиените светски болници, пријатно ќе се чувствуваат и ќе може квалитетна здравствена услуга да даваат здравствените работници, но и врвна медицинска услуга пациентите на коишто им е тоа потребно за многу кратко време и се на едно место. Оваа здравствена криза со која сега во овој момент се соочуваме, а тоа е коронавирусот покажа дека е исклучително важно да имаме модерни болници во којшто може за кратко време пациентите без многу лутање и на едно место да добијат здравствена услуга, а не да се препраќаат во околните болници во другите градови“, потенцираше министерот Филипче.
Тој рече дека Владата интензивно инвестираше во здравствениот систем, пред сѐ во луѓето, во платите, во приемот на нови лекари и медицински сестри, како и во младите лекари.
„Се зголемија платите на лекарите и тие сега изнесуваат помеѓу 80 и 160 илјади денари. Се примија на работа огромен број на лекари и медицински сестри. Издадовме над 5.000 согласности за вработување за само две години. Сите млади лекари добија шанса да работат тука, во здравствените установи во нашата земја. Да имаат платен стаж, да не се дискриминирани за прием по ниту една основа. Со овој интензитет и динамика ќе продолжиме и понатаму, заради тоа што нашите граѓани, нашата држава заслужува да има спремен и модерен здравствен систем, а нашите граѓани место кадешто од врвни експерти ќе добијат врвна здравствена услуга“, посочи министерот Филипче.
Директорот на Општата болница во Струмица, Гогов, на владините претставници им ја покажа новата градба, новиот проширен дел, давајќи детали за капацитетот на медицинските и дијагностички услуги, кои тука, на едно место ќе бидат овозможени за граѓаните.
Директорот Гогов информираше детално за капацитетот од 85 кревети, од кои најголем дел електрични опремени со централен довод на медицински гасови, секоја соба е климатизирана и со туш кабини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ДУИ не се Албанците, ДУИ е криминалната коалиција на злото, велат од ВМРО-ДПМНЕ

Бујар Османи продолжува со истата матрица, секоја критика за криминалот на ДУИ да ја претставува како „поттик на поделби“, велат од ВМРО-ДПМНЕ како реакција на изјавите на Бујар Османи од ДУИ.
Вистината, според владејачката партија е сосема спротивна.
„Поделбите и неправдите во државата настанаа токму поради СДСМ и ДУИ и нивната власт заради криминалните тендери, корупцијата и злоупотребата на институциите.
Бујар, Артан, Заев, Али и Филипче се коалиција на злото која ја жртвува Македонија за да ја ограбат државата и народот.
Кога ќе бидат фатени со рацете во медот, Османи и неговите колеги се кријат зад етнички теми. Но Албанците не се ДУИ, ниту пак ДУИ има право да зборува во нивно име“.
Албанците во Македонија, нагласуваат од ВМРО-ДПМНЕ се чесни граѓани кои сакаат ред, правда и развој, а тоа, како што велат е спротивно од она што го нудат Али, Артан, Бујар, Филипче и Заев.
„Затоа, колку и да се обидуваат да ја претворат борбата против криминалот во „етничко прашање“, тие добро знаат дека нема да успеат. Народот кажа јасно: криминалот не се исплати, а ДУИ и СДС се минато“.
Македонија
Марковски како кандидат за градоначалник на Скопје: Градот е во агонија

Граѓанската платформа „Независни заедно“ на денешниот промотивен настан и официјално ја објави кандидатурата на деканот на Градежниот факултет при Универзитетот „Св. Кирил и Методиј“, професор д-р Горан Марковски, за градоначалник на град Скопје на претстојните локални избори.
Промоцијата ја отвори Јана Белчева-Андреевска, кандидатка за советничка за Град Скопје, која истакна дека по години гледање како се нижат проблеми, се губат и запустуваат јавни простори и јавни објекти, како горат и исчезнуваат пред нашите очи објекти со вредност и значење, има шанса за промена.
„Скопје е во агонија. Потребна му е визија ослободена од корупција, култура наместо популизам, стандарди наместо импровизации. Оваа моја кандидатура е повик за заедничка борба за град што ќе им служи на граѓаните, а не на тесни интереси“, истакна Марковски.
Посочи дека Скопје денес се соочува со сериозни предизвици – загаденост, урбан хаос и изгубен идентитет – и нагласи дека потребни се нови решенија, кои ќе донесат надеж, особено за младите.
„Го почнувам овој пат од Камениот мост – симболот на поврзување и заедништво. Убеден сум дека со широка граѓанска поддршка можеме да изградиме град што ќе биде вистински европски дом, место со кое ќе се гордеат сите скопјани“, додаде тој.
Од „Независни заедно“ порачаа дека Марковски е личност со докажан професионален интегритет и долгогодишно искуство, кој зад себе има голем број реализирани проекти и генерации воспитани инженери. „Време е Скопје да го водат стручни лица со храбро лидерство и визија за поубав град по мерка на човекот“, велат од платформата.
Марковски истакна дека Скопје мора повторно да стане симбол на заедништво и поврзување, а вистинската промена може да се постигне единствено преку активни граѓани и независни личности, кои ќе изградат силни институции и здрава демократија.
„Независни заедно“ е широка граѓанска платформа, која ги обединува независните советници и локалните иницијативи од неколку скопски општини -„Шанса за Центар“, „Зелените за Гази Баба“ и „Групација 389“. Покрај град Скопје, платформата веќе објави дека цели на победа и во општина Центар, каде што ќе ја поддржи кандидатурата на истакнатата антикорупционерка Билјана Ивановска. „Независни заедно“ произлезе како одговор на разочараноста од традиционалните политички партии и има цел да ја врати локалната власт во рацете на граѓаните. Платформата ги повикува сите скопјани, поединци и групи, да се приклучат и заеднички да изградат нов модел на управување – чесен, стручен, транспарентен и посветен на јавниот интерес. „Само заедно можеме да му дадеме шанса на Скопје да стане град по мерка на човекот“, појаснуваат од платформата.
Македонија
Лефков до Апасиев: Димче не е тоа што беше, го расипаа кешот и квадратите деловен простор

И Димче не е тоа што беше. Разбирам дека вистината боли, па затоа Апасиев наместо да одговори на фактите – бега во навреди, напиша на социјалните мрежи пратеникот на ВМРО-ДПМНЕ, Миле Лефков, обраќајќи се до лидерот на Левица, Димитар Апасиев.
Суштината е јасна, додава Лефков.
„Не може да си политичар кој јавно е против ЕУ, кој секојдневно зборува дека ‘глобалистите и амбасадите’ ја корумпираат македонската политика, да држиш анти ЕУ став, а истовремено твојата најблиска фамилија да користи европски пари од Еразмус програмите.
Јас сум член на Комисијата за европски прашања и цел претходен мандат активно се спротивставував на злоупотребите на СДСМ и ДУИ со европските фондови. Ама сега ми е јасно зошто еден цел мандат додека Таљо преку Арбер ја злоупотребуваше комисијата Димче го немаше на ниту една комисија-во тоа време активно си користеле ЕУ финансии по дома!
Денес по веста за ЕУ финансирањето, со цел да ме омаловажи, самопрогласениот Енвер Хоџа на интернет подземјето, ја мобилизираше својата троловска армија со лаги и клевети. Но вистината е една – разобличен е до даска.
И нема лутење јавноста има право да праша:
– Кој му го среди станот по цена што обичен граѓанин никогаш не може да ја добие?
– Кој му ги плаќа одморите низ Европа додека глуми анти-ЕУ револуционер?
– Кој друг, освен тој и Артан Груби, успеа да добие дуќан по таква цена во центар“, прашува Лефков.
Такви двојни стандарди, како што оценува, не се политика, туку како што вели, тоа е лицемерие на квадрат.
Не можеш, додава лефков, да ја плукаш Европа да кажуваш приказни за имеријалистички сили, а да живееш од европски пари.
„Не можеш да проповедаш морал, а да бидеш шеф на троловско подземје што фабрикува лаги за политички противници.
Разобличен си лажго кој нарачува најдолни клевети ама нема лутење, толку ти е силна желбата да ме наклеветиш што изгледаш очајно, порано беше по креативен, те расипаа квадратите деловен простор и кешот другар“, пишува Лефков.