„Влегуваме во важен период во кој очекуваме сериозни исчекори напред кон реализација на една од нашите суштински стратешки цели – членството во Европската Унија, во кој со право очекуваме одлука за почеток на пристапните преговори во претстојните месеци по 15 години во чекалницата со статус држава кандидат за членство“, истакна техничкиот премиер, Оливер Спасовски, на денешната заедничка прес-конференција со еврокомесарот за соседска политика и проширување, Оливер Вархеи, кој е во еднодневна работна посета на нашата земја.

Спасовски и еврокомесарот Вархеи во Владата имаа тет-а-тет средба по што ги предводеа разговорите на билатералната средба на делегациите на Владата на Северна Македонија и на Европската комисија.

„Со ништо нема да го загрозиме постигнатото поради што добивме и признание од Европската комисија минатата година кога на Европскиот совет му беше препорачано итно и безусловно почнување на пристапните преговорите. Препораката дојде како резултат на успешно спроведените темелни реформи и како резултат на храбрите одлуки за решавање на недоразбирањата со нашите соседи, кои нашите аспирации за членство во ЕУ ги направија реалност. Ја очекувавме најавената одлука во октомври минатата година по сѐ она што се очекуваше од нашата земја за да ги почнеме преговорите“, рече Спасовски.

„Иако доживеавме разочарување, нагласи Спасовски, прифативме дека стратегиската грешка ќе биде поправена бргу и дека нашите резултати ќе бидат валоризирани според заслуженото иако со одложување“.

Тој изрази благодарност за јавните изјави на претседателката на Европската комисија, Урсула фон дер Леен, и на комесарот Вархеи дека одлуката за почеток на пристапните преговори треба да се донесе што побргу и дека програмата на новата Европска комисија претставува нова, голема надеж за државите од Западен Балкан и зајакнување на нашите позиции како идни членки на ЕУ.

„Европската комисија отсекогаш била и останува наш прв, искрен и чесен сојузник во нашите настојувања за приближување кон ЕУ. Го сметаме процесот за постигнување на стандардите на ЕУ за особено значаен и токму затоа влеговме со уште посилна мотивација за спроведување на реформите. За нас е од особено значење што Европската комисија, по Европскиот совет во октомври 2019 година, ја презеде обврската до крајот на овој месец да биде презентиран документ со предлог за изменета на методологијата за водење на пристапните преговори“, потенцира Спасовски.

Тој истакна дека нашата земја е заинтересирана што побргу да се објави методологијата и да се постигне консензус за отворање на преговорите што побргу. Спасовски на прес-конференцијата рече дека го информирал еврокомесарот Вархеи за подготовките за фер, демократски и успешни парламентарни избори.

„Нашата држава се наоѓа во исклучително значаен период кога се очекува непречено функционирање на сите институции на државната власт. Ова е период во кој до максимален израз треба да дојде личната и институционалната политичка и професионална одговорност и да се даде најдобриот придонес за доброто на граѓаните и за развојот и напредокот на Северна Македонија, како и внимателно да се следат одлуките на Европскиот совет поврзани со почетокот на преговорите за членство во Европската Унија за да не се доведат во ризик“, нагласи Спасовски и додаде дека сите политички фактори што учествуваат во Владата треба да бидат на висина на задачата и одговорноста што ја имаат во преодната Влада до предвремените парламентарни избори на 12 април 2020 година.