Македонија
(Видео) Спасовски: Секогаш припадниците на ЕБР демонстрираа силна професионална посветеност во зачувувањето на мирот и безбедноста на татковината
Вечерва, со Свечена церемонија пред Градскиот базен во Куманово беше одбележан 23. август – Денот на Единицата за брзо распоредување и 22 години од формирањето на оваа елитна единица при Министерството за внатрешни работи, во присуство на граѓаните на Куманово, највисокото раководство на МВР, министри, пратеници, претставници на државни институции и локалната самоуправа, раководството на Македонскиот Полициски Синдикат, како и претставници на семејства на загинати и починати припадници на ЕБР.
Во рамки на одбележувањето на 22 години ЕБР, во кругот на СВР Куманово министерот Спасовски заедно со раководството на МВР го откри Спомен обележјето на осумте загинати припадници на македонската полиција кои ги положија животите во 2015 година, во вооружена престрелка со терористичка групација во кумановско „Диво насеље”, а во одбрана на Куманово и татковината. Исто така, од 09:30 до 12:30 часот граѓаните имаа можност да се уверат во концептот „МВР за граѓаните”, со поставена опрема на македонската полиција во Градскиот парк во Куманово.
Во своето обраќање на централната манифестација, министерот Спасовски истакна дека овој ден 23 август претставува датум од исклучителна важност и одлична можност да се направи рекапитулар за она што досега е направено и што се планира да се направи во контекст на реформирање и развој на македонската полиција.
„Влегувајќи во третата деценија од своето постоење, Единицата за брзо распоредување, сите нејзини поранешни, но и сегашни припадници, низ секојдневното работење, демонстрираа силна посветеност и амбиција не само да ги следат зададените стратешки насоки за развој и унапредување на Единицата, туку и да ги надоградуваат своите професионални и стручни капацитети, со препознаена пожртвуваност, изразена преку бројните примери на успешно реализирани активности. Притоа, не штедејќи се себе си, а секогаш кога била доведена во прашање безбедноста на државата и институциите – ставајќи ги на ризик сопствените животи, како гаранти и чувари на безбедноста, спокојот и животот на сите наши граѓани”, истакна министерот Спасовски во своето обраќање на централната манифестација по повод 22 години ЕБР.
Спасовски се осврна на улогата и ангажманот на Единицата за брзо распоредување.
„Преку успешната имплементација на базичните полициски принципи на работа како неселективност во пристапот и нулта толеранција за прекршителите на законите, водени од геслото „Секогаш и секаде“ по кое оваа Единица е препознатлива, но и со концептот на „Полицијата – сервис на граѓаните“, согласно законски предвидените надлежности – постигнавме многу во зацртаното устројување на полицијата во крајно професионална и функционално остручена и оспособена безбедносна институција.
Не можам, а да не ја подвлечам нивната стожерна улога во оперативната акција „Безбеден град“, каде сите ангажирани припадници на Одделот за специјални полициски операции, низ деноноќните активности, покажаа дека нема простор за ниту еден криминалец или криминална група да ги загрози мирот, стабилноста и безбедноста на граѓаните на Република Северна Македонија”, рече Спасовски, додавајќи дека, во контекст на севкупниот напредок на полицискиот систем како цел сама по себе, треба да се гледа и развојот и натамошните перспективи и на Единицата за брзо распоредување, особено затоа што тие се во првите редови на системското спротивставување, заштита и превенција. На крајот од своето обраќање министерот Спасовски на сите припадници на ЕБР им го честиташе Денот на формирањето на Единицата, со желби за здравје и натамошен успех, како на професионален, така и на личен план.
Командантот на Единицата за брзо распоредување, Вице Столески, во своето обраќање пред присутните даде свое видување за работата на Единицата.
„Припадниците на ЕБР, кои се дел од Одделот за специјални полициски операции, се висококвалификувани и обучени за најтешките задачи. Тие се активираат секогаш и секаде каде што е потребно највисоко ниво на оперативна ефикасност. Подготвени во најкус можен рок да извршат задачи со висок ризик и со највисок степен на прецизност, свесни за фактот дека кога се активирани, не постои никој друг што би можел да дејствува освен нив“, истакна командантот Столески.
Притоа, тој ги поздрави семејствата на загинатите и починати припадници на Единицата за Брзо распоредување и им оддаде длабока почит во свое име и во име на припадниците на ЕБР, за жртвата која нивните најмили ја дадоа при извршување на работните задачи во Единицата – Единицата за брзо распоредување никогаш не ги заборава делата на своите херои. Споделувајќи ги спецификите за работата, командантот Столески се осврна и на условите за работа на Единицата.
„Благодарение на актуелното раководство на Министерството за внатрешни работи во изминатите неколку години, со нивната континуирана подршка и разбирањето за нашите потреби и барања, Единицата за брзо распоредување во голем степен ги подобри условите за работа на своите припадници. Во текот на изминатата година, припадниците на ЕБР добија нов и квалитетен концепт на исхрана, се подобрија условите за спорт и физичка подготовка со нови и реконструирани игралишта, а извршена е и набавка на наменски возила за одржување на јавниот ред и мир, материјално -технички средства и електронски уреди за извршување на специфичните задачи. Од срце благодарам за досегашната подршка и длабоко верувам дека и во иднина ќе наидеме на разбирање од страна на раководството во Министерството за нашите потреби за успешно справување со сите безбедносни предизвици, со заедничка цел – посигурен и побезбеден живот на сите наши граѓани”, нагласи командантот Столески на крајот од своето обраќање, при што уште еднаш ја истакна посветеноста кон земјата и пошироката заедница, за зачувување на мирот, безбедноста и сигурноста на сите граѓани, согласно мотото на ЕБР – Секогаш и секаде!
На свеченоста беа доделени и плакети од страна на командантот на единицата Вице Столески и министерот за внатрешни работи Оливер Спасовски, за континуирана поддршка во напорите за унапредување и осовременување на капацитетите на Единицата.
Плакети добија Началникот на Одделот за специјални полициски операции г. Митко Даневски за развој и афирмација на Единицата, претседателот на Македонскиот полициски синдикат г. Марјан Кицев за успешна соработка и поддршка во подобрување на правата на припадниците во Единицата. Плакети за 20 години успешна работа во ЕБР добија Командантот Вице Столески, заменик командантот Тони Стојоски, Владимир Стефановски, Беким Кадри, Ивица Величковски, Артан Арифи, Далибор Ѓорѓевски, Лилјана Илиќ и Срѓан Ристовски. Плакета за најдобар припадник во Единицата за брзо распоредување за 2023 година доби Небојша Костоски. Воедно, беа доделени плакети за поддршка во проекти за подобрување на капацитетите на Единицата.
Во чест на Денот на Единицата за брзо Распоредување, свеченоста беше затворена со културно – уметничка точка во изведба на Културно-уметничкото друштво „Панче Пешев“ од Куманово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Зеленски и ја честиташе победата на Гордана Силјановска Давкова
Денеска, 9 мај 2024 година, на социјалната мрежа „Икс“ по повод големата победа на професорката Гордана Сиљановска-Давкова на претседателските избори, се огласи ѝ претседателот на Република Украина, Володимир Зеленски. Во неговата честитка упатена до професорката Гордана Сиљановска-Давкова на англиски и на украински јазик, стои:
„Честитки до Гордана Сиљановска-Давкова за нејзината убедлива изборна победа. И посакувам успешен и плоден мандат. Го цениме нашето силно партнерство и ја цениме поддршката на Скопје за Украина во борбата против руската агресија. Со задоволство очекувам да ја зајакнеме нашата билатерална соработка со цел да ги вратиме мирот и стабилноста во нашата обединета Европа.“
Congratulations to Gordana Siljanovska-Davkova @gogamkd on her convincing election victory. I wish her a successful and fruitful tenure. We value our 🇲🇰🇺🇦 strong partnership and appreciate Skopje's support for Ukraine in countering Russian aggression. I look forward to further…
— Volodymyr Zelenskyy / Володимир Зеленський (@ZelenskyyUa) May 9, 2024
Професорката Гордана Сиљановска-Давкова се заблагодари на честитката на украински, македонски и на англиски јазик истакнувајќи го следново:
„Почитуван претседателе Зеленски, денеска кога го славиме Денот на Европа исто така се потсетуваме дека судбината на украинската нација е под закана. Ние ја поддржуваме Украина и ја нудиме солидарноста на сите македонски граѓански за постигнување на праведен мир и вистинска долгорочна безбедност. Ниту една европска нација, која ги споделува и брани заедничките европски вредности, не смее да биде изоставена од европското единство. Очекувам дополнително да ја зајакнеме билатералната соработка и се надевам на брз прием на нашите две земји во ЕУ.“
Македонија
Честитки за победата на Силјановска-Давкова пристигнуваат од региониот и Европа
Честитки за победата до професорката Гордана Сиљановска-Давкова, денеска упати претседателката на Република Словенија, Наташа Пирц Мусар која го напиша следново: „Честитки професорке Гордана Сиљановска-Давкова на Вашиот избор за прва жена претседателка на Република Македонија, наш пријател и НАТО сојузник. Во духот на Денот на Европа, очекувам заедно да работиме во градењето на европската иднина за вашата земја, народот и целиот Западен Балкан.“
Во одговорот на честитката, професроката Гордана Сиљановска-Давкова ги упати следните зборови: „Драга Наташа, благодарам на честитките и пријателската поддршка. Секогаш особено ми значи женската солидарност. Радува фактот што како жени имаме можност заедно да градиме нова перспектива за нашиот регион. Продолжуваме кон пријателска и уште поголема соработка со Словенија. Денес, славејќи го Денот на Европа, се повикуваме на европските цивилизациски вредности кои се дел од културата нашите две земји и во таа насока истакнувам дека безрезрвно ќе се залагам тие вредности заедно да ги споделуваме и во иднина кога Македонија ќе стане дел од ЕУ“.
Честитка по повод победата на изборите до професорката Гордана Сиљановска-Давкова и лидерот на ВМРО-ДПМНЕ, Христијан Мицкоски беше упатена и од заменик претседателот на пратеничката група ЦДУ/ЦСУ, Јохан Вадефул во која тој ја потенцира убедливата победа на ВМРО-ДПМНЕ. Имено во честитката е наведено: „Убедлива победа на нашата сестринска партија од семејството на ЕПП, ВМРО-ДПМНЕ и нашите македонски пријатели. Од се срце и честитам на новата претседателка, професорката Гордана Сиљановска-Давкова и на лидерот Христијан Мицкоски за нивните победи. Заедно ќе продолжиме да маршираме на патот кон стабилноста и просперитетот на Зaпаден Балкан и брзиот пристап кон ЕУ“.
Професорката Гордана Сиљановска-Давкова упати благодарност на честитката во која истакна: „Почитуван господин Вадефул, ајде да ги продолжиме нашите разговори и да овозможиме брз влез на Македонија и на целиот Западен Балкан во ЕУ, како единствен начин за траен мир, стабилност и просперитет во целиот регион.“
Со честитка се огласи и претседателката на Република Косово, Вјоса Османи која меѓудругото истакна: „Честитки до професорката Гордана Сиљановска-Давкова за нејзината победа на претседателските избори во Македонија, како и на нејзиниот избор за прва жена претседателка на државата. Косово и Македонија негуваат одлични соседски односи и споделуваат силна посветеност кон евро-атланаската интеграција. Очекувам соработка со претседателката во насока на остварување на заедничката цел и понатамошно продлабочување на косовско-македонските односи.“
Со одговор на честитката се јави и професорката Гордана Сиљановска-Давкова која напиша: „Почитувана Вјоса, ме радува Вашата искрена честитка. Среќна сум поради фактот дека жените во нашиот регион испишуваат политичка историја застанувајќи храбро на клучни позиции. Очекувам и понатаму да продолжиме со соработката за конечно да ја постигнеме клучната стратешка цел, евроинтеграција на целиот регион, како и да ги зацврстиме нашите односи преку една „женска“ синергија.“
Честитки по повод победата беа упатени и од страна на претседателот на Република Латвија, Едгар Ринкевич. Во неговата честитка се вели: „Честитки до Гордана Сиљановска-Давкова на нејзиниот избор за претседателка на Македонија. Со задовлство очекувам да продолжиме со развој на соработката помеѓу нашите две земји.“
Во одговорот на честитката, професорката Сиљановска-Давкова наведе: „Ви благодарам многу претседателе Ринкевич. Ајде зедно да работиме за зацврстување на македонско-латвиската соработка во НАТО и на заокружување на европската интеграција“.
Со своја честитка се огласи и претседалот на Република Црна Гора, Јаков Милатовиќ кој наведе: „Честитки до првата претседателка на Македонија, Гордана Сиљановска-Давкова на изборната победа. Пријателските односи помеѓу Македонија и Црна Гора се темелат на меѓусебната довера на нашите два народи. Со желба успешно да ја извршувате функцијата на претседател, се радувам на заедничката соработка на зацврствување на добрососедските односи и европската перспектива на целиот регион.“
Благодарност за честитката упати професорката Гордана Сиљановска-Давкова истакнувајќи: „Почитуван претседателе Милатовиќ, македонско-црногорските односи се редок пример на совршена соработка меѓу два балкански народи. Регионалната кооперација е еден од столбовите на мојата програма и се надевам дека заедно ќе го довршиме патот на нашите држави кон ЕУ.“
До професорката Гордана Сиљановска-Давкова пристигнаа честитки и од претседателот на Република Албанија, Бајрам Бегај кој наведе: „Честитки до професорката Гордана Сиљановска-Давкова за нејзиниот избор за прва жена претседател на Македонија. Уверен сум дека заедно ќе продолжиме да ги јакнеме нашите одлични односи помеѓу нашите пријателски земји, двете како членки на НАТО и идни членки на ЕУ, идеја на која останува посветена и албанската заедница во Македонија.“
Во одговор на честитката, професорката Сиљановска-Давкова истакна: „Почитуван претседателе Бегај, клучот за европската интеграција на Балканот се наоѓа во развојот на нашата регионална соработка. Ве повикувам заедно да работиме на унапредувањето на македонско-албанските односи, како и на нашата европска интеграција.“
Честитки на македонски, албански и англиски јазик упати и поранешниот претседател на Република Албанија, Илир Мета. Во неговите честитки стои: „Изразувам најсрдечни честитки до госпоѓата Гордана Сиљановска-Давкова по повод нејзиното успешно преземање на високата функција како прва жена претседателка избрана во Македонија. Со голема доверба верувам дека таа ќе одигра значајна улога во продлабочувањето на веќе одличните соседски односи помеѓу нашите две земји и народи, како и во унапредувањето на меѓуетничкиот соживот во Македонија. Уверен сум дека претседателката ќе придонесе кон импулс на билатералните односи во насока кон заедничките аспирации за што поскоро интегрирање во Европската Унија.“
Благодарност за честитките упати и професорката Гордана Сиљановска-Давкова, во нејзиниот одговор е наведено: „Почитуван претседателе Мета, Ви благодарам на честитките и на Вашите искрени напори за подобрување на македонско-албанските односи. Очекувам дека со истиот силен ентузијазам ќе го продолжиме и чекорењето на нашите две држави кон целосната европска интеграција.“
На социјалната мрежа Х, честитки по повод победата на претседателските избори до проф. д-р Гордана Сиљановска-Давкова, упати амбасадорката на Соединетите Америкнски Држави во Република Македонија, Анџела Агелер.
Во честитката на Агелер стои: „Моите срдечни честитки до Гордана Сиљановска-Давкова за нејзиниот историски избор за прва жена претседателка на Македонија. Честитки и сите граѓани кои го искористија нивното право на глас вчера, на претседателските и парламентарните избори. Соединетите Американски Држави ќе продолжат да ги поддржуваат вашите цели за безбедност, просперитет и целосна евро-атланска интеграција на државата.“
Благодарност за честитката упати професорката Гордана Сиљановска-Давкова истакнувајќи: „Почитувана амбасадорке Агелер, Ви благодарам на честитките. Очекувам да го обновиме духот на македонско-американските односи, да ја прошириме рамката на нашето стратегиско партнерство и соработка, како и евро-атланската димензија, така и билатерално.“
Честитка на македонски јазик упати и амбасадорот на Велика Британија во Република Македонија, Метју Лосон во која се истакнува: „Честитки до професорката Гордана Сиљановска-Давкова, првата избрана жена претседател на Македонија. Продолжуваме да ги зацврстуваме британско-македонските односи, да ги зближуваме нашите култури и народи и да работиме заедно како блиски сојузници и партнери во НАТО“.
По повод честитката се огласи и професорката Гордана Сиљановска-Давкова која напиша: „Почитуван амбасадоре, дозволете ми да ја изразам мојата благодарност за Вашите убави зборови, посебно додека ги читам на мојот мајчин јазик. Очекувам да го продолжиме патот на јакнење на македонско-британските односи и нашиот сојуз во рамките на НАТО!“
Честитки до професорката Гордана Сиљановска-Давкова пристигнаа и од Мисијата на ОБСЕ во Скопје. Во нив се вели: „Мисијата на ОБСЕ во Скопје и ја честита победата на претседателските избори на професорката Гордана Сиљановска-Давкова! Се радуваме на идната блиска соработка во иднина.“
Во одговорот на честитката професорката Гордана Сиљновска-Давкова наведе: „ОБСЕ беше секогаш составен дел од на приказната на македонската демократизација, работејќи со нашите институции за подобрување на владеењето на правото, правата на малцинствата, полициската реформа, инклузивното образование и другите клучни реформски процеси. Продолжуваме.“
Честитки за изборната победа упати и Постојаниот координатор на ООН во Македонија, Росана Дуџак: „Честитки за Гордана Сиљановска-Давкова на нејзиниот избор за претседателка на Македонија. Обединетите Нации со задоволство очекуваат продолжување на соработката за унапредување на човековите права, родовата еднаквост и одржливиот развој под Ваше лидерство.“
Професорката Гордана Сиљановска-Давкова се одговори на честитката потенцирајќи: „Драга Росана, благодарам на Вашите честитки. Мојата програма има силен фокус на продлабочување на македонската димензија во сите мултилатерални форуми и агендата на ООН во однос човековите права, родовата еднаквост и одржливиот развој, како на локално, така и на глобално ниво.“
Со своја честитка се огласи и поранешниот министер и пратеник во Парламентот на Република Албанија, Генц Поло. Во неговата честитка стои: „Честитки за професорката Гордана Сиљановска-Давкова на нејзината убедлива изборна победа во вториот круг. Посакувам нејзиното водство на народот да биде кон домашна и меѓународна хармонија.“
Во својот одговор професорката Гордана Сиљановска-Давкова наведе: „Почитуван господине Генц Поло, Ви благодарам за охрабрувачките пораки и се надевам декаи натаму ќе работиме на неопходните реформи за европската интеграција на нашите држави.“
Честитки за професорката Гордана Сиљановска-Давкова и ВМРО-ДПМНЕ, стигнуваат и од организациите во кои членува партијата, а кои се во фокус на поддршка за идното владеење.
Интересно е што професорката Гордана Сиљановска-Давкова оддаде почит кон сите што упатија свои честитки одговарајќи на нивните јазици покрај одговорите на англиски јазик.
Македонија
Можни се излевања на Крива Река по нејзиниот слив, ако продолжи водостојот да расте, предупреди ЦУК
Центарот за управување со кризи информира дека од УХМР известуваат дека водостојот на Крива Река на хидролошката станица во Крива Паланка е значително висок. Ако продолжи водостојот да расте можни се излевања на Крива Река по нејзиниот слив.
Од УХМР предупредуваат за внимателност при движење покрај сливот на Крива Река.
Истовремено, ЦУК, потсетува за голема внимателност при појавата на локалните нагли метео промени и особена внимателност при грмежите и молњите, односно при силните електрични празнења: да не се престојува на отворен простор и под осамени дрвја.
Инаку, според днената хидролошка информација и очекуваната тенденција за водостојот на реките и езерата на УХМР, нивото на водостоите е во покачување, додаваат од ЦУК.