Македонија
(Видео) Спасовски: Со улогата на Единицата за интервентна полиција при СВР Скопје, главниот град денес е побезбеден од порано
Денеска, во седиштето на Единицата за интервентна полиција во Полицискиот центар Ѓорче Петров се одржа Свечена церемонија по повод 4 години од формирањето на Единицата за интервентна полиција при СВР Скопје, на која свои обраќања имаа министерот за внатрешни работи Оливер Спасовски и началникот на Единицата за интервентна полиција Дејан Несторовски, во присуство на раководството на МВР и соработниците на Единицата.
Истакнувајќи дека преку својот високо професионален пристап, формирањето на Единицата за интервентна полиција во изминативе 4 години од нејзиното постење, министерот Спасовски во своето обраќање ја потенцираше суштината на работењето на Единицата, која целосно ја оправда својата замислена намена и својата цел, а тоа е мобилност во оперативните постапувања, со широк опфат, одлична координација со другите полициски единици и висока професионалност, со цел поголема функционалност на целиот безбедносно-полициски систем на подрачјето на главниот град.
„Иако секој почеток е тежок, сепак самопрегорот, решителноста, професионалноста и би рекол патриотизмот на многуте полициски службеници дадоа и даваат исклучителни резултати. Скопје е денес побезбеден град од порано и граѓаните слободно и безбедно ја остваруваат својата цел и планови во мирна и безбедна средина. Најпрофесионално уште од самиот почеток Единицата за интервентна полиција брзо и успешно имплементираше свое структурно приспособување според сите стандарди на истородните полициски формации, дефинирајќи ја својата оперативност и функционалност како еден од главните сегменти во организациската структура на СВР Скопје“, рече Спасовски.
Министерот Спасовски особено ја потенцираше активноста на Единицата во справувањето со сите видови на криминал.
„Обемот на разновидните контролни и другите оперативни активности на припадниците на Единицата оваа година досега во опсег на конкретни поединечни постапувања се над 51.000 постапувања. Со ова станува јасно дека Единицата во целост е посветена на исполнување на својот дел од примарната задача на Полицијата и Министерството, а тоа е безбедноста и сигурноста на секој граѓанин и на сите наши граѓани“, истакна Спасовски, со уверување дека и во годините пред нас, припадниците на Единицата ќе бидат на висина на задачата и професионални и посветени како и досега и дека заеднички ќе се вложи дополнителна енергија и ентузијазам во натамошниот раст и развој на оваа Единица, со единствена цел – градење на Полиција сервис на граѓаните и гарант за сигурноста и безбедноста.
Во своето обраќање, началникот на Единицата за интервентна полиција, Дејан Несторовски, истакна дека припадниците на Единицата се фокусирани и посветено работат кон потемелно одржување на јавниот ред и мир, пред сѐ во делот на ефикасно спротивставување на сите облици на уличен криминал, особено кога е во прашање лоцирањето, справувањето и лишувањето од слобода на опасни, вооружени лица.
„Само во 2023 година, делувајќи на територијата на град Скопје како превентивно, така и репресивно, Единицата за интервентна полиција приведе и лиши од слобода 1.591 лице по разни основи. Како резултат на секојдневното работење на терен, многу од кривичните дела се откриени на лице место, токму при извршување на кривичното дело или непосредно потоа, со брза интервенција на нејзините припадници, веднаш по добиена објава од полициските станици“, истакна Несторовски, изразувајќи благодарноста за визијата и поддршката на ова раководство на МВР.
Тој, честитајќи го Денот на Единицата за интервентна полиција на своите колеги, додаде: „Денеска сме непоколебливи и решителни во нашите секојдневни задачи, силно посветени на повисоката цел што ја носиме, посветени на заедницата, на сигурноста и безбедноста на сите наши граѓани“.
На крајот од свеченоста беа доделени благодарници и плакети за успешна соработка со Единицата за интервентна полиција при што беше одржана и тактичко-показна вежба.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Намалена видливост поради магла на Плетвар, Ѓавато и Пресека
Сообраќајот на државните патишта се одвива во зимски услови, по влажни коловози, на некои повисоки места со остатоци од кашест снег на коловозот по интервенција на дежурните екипи на ЈП МакедонијаПат.
Намалена видливост до 100 метри поради магла има на планинскиот превој Плетвар, Ѓавато и Пресека, извести АМСМ.
Од 05:25 часот на патниот правец P1105 Удово-Валандово има излевање на Калковска Река на коловозот, се воведува забрана за сообракајот на тој патен правец и се пренасочува на патниот правец Р1401 село Марвинци-Валандово.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Променливо облачно со повремен слаб дожд и ветер
Времето денеска ќе биде облачно со слаб ветер од променлив правец. Минималната температура ќе биде во интервал од -4 до 2, а максималната ќе достигне од 2 до 9 степени.
Во Скопје, променливо облачно со повремен слаб дожд. Минималната температура ќе се спушти до 2, а максималната ќе достигне до 7 степени.
Времето во наредните денови
Денеска наместа ќе има услови за слаби врнежи од дожд и снег. Потоа во следните два дена времето ќе биде променливо облачно со сончеви периоди. Нови врнежи од дожд, а на планините снег се очекуваат од четврток.
Македонија
(Видео) Безбеден град денес регистрираше 500 казни
Министерот за внатрешни работи Панче Тошковски вечерва преку објава на социјалната мрежа Фејсбук им порача на граѓаните дека треба да бидат горди на себе.
-Први февруари 2026 година, околу 20 часот. Има драстично намалување на бројката на сообраќајни прекршоци споредено со пред 2 месеци кога почнавме со тест периодот. Имаме околу 500 сообраќајни прекршоци констатирани од страна на паметните камери и сакам да укажам огромна благодарност до македонските граѓани и совесните учесници во рамки на сообраќајот зашто вие сте тие кои овозможивте драстично да се намали бројката за период од околу 2 месеци од 120 илјади прекршоци на 500, порача министерот.

