Македонија
(Видео) Спречени обиди за шверцување кокаин, цигари, офталмолошки производи, облека и друга стока

Во текот на изминатата недела, царинските службеници на граничните премини и мобилни тимови при Одделението за оперативни работи, Сектор за контрола и истраги спречија обиди за криумчарење кокаин, цигари, офталмолошки производи, облека и друга стока, а спречен е и нелегален изнес на девизи. При контрола на стока наменета за увозник од Гостивар, пријавена за увозно царинење откриени се и производи што не биле опфатени со царинските документи.
Спречен обид за криумчарење на околу два килограми кокаин, што граѓанин од Бразил имал намера да го прошверцува по воздушен пат и преку Меѓународен Аеродром Скопје нелегално да го внесе во државава. Дрогата е пронајдена при претрес на лицето и тоа во внатрешноста на еден од двата куфери што ги носел бразилскиот државјанин. Претресот е извршен од страна на Мобилен тим со царинско куче во соработка со полициски службеници од Одделот за криминалистичка полиција – Сектор за недозволена трговија со дрога, оружје и опасни материи, СВР Скопје – единица за недозволена трговија со дрога оружје и опасни материи, СВР Скопје – единица за недозволена трговија и Полициската станица за граничен надзор „Меѓународен аеродром- Скопје“. Дрогата е запленета, а од страна на СВР Скопје до Основното јавно обвинителство за гонење на организиран криминал и корупција ќе биде поднесена кривична пријава против четири лица инволвирани во организирањето и вршење на транспорт на околу два килограми кокаин.
· Спречени обиди за криумчарење на 85 штеки цигари по извршени контроли на гранични премини Меѓународен Аеродром Скопје, Богородица и Меџитлија.
– На излез од државата на Меѓународен Аеродром Скопје, царински службеници спречија криумчарење на 60 штеки цигари, што косовски државјанин сакал нелегално да ги изнесе од државата и по воздушен пат да ги внесе нелегално во Лондон. Штеките цигари се откриени при контрола на багажот на патникот. Цигарите се привремено задржани, а против патникот е поведена прекршочна постапка.
– 19 штеки цигари без акцизни маркички се откриени при контрола на камион со македонски регистарски таблички, управуван од македонски државјанин, пријавен за влез во државата на граничниот премин Богородица. Непријавените цигари пронајдени под креветот во кабината на камионот, се привремено задржани, а против возачот ќе биде поведена прекршочна постапка.
– 6 штеки цигари без акцизни маркички, се откриени при контрола на камион со македонски регистарски таблички, управуван од македонски државјанин, пријавен за влез во државата на граничниот премин Меџитлија. Непријавените цигари, пронајдени во кеси сместени во кабината и во надворешни прегради на влекачот, се привремено задржани, а против возачот ќе биде поведена прекршочна постапка.
· Царински службеници на граничен премин Богородица спречија нелегален изнес на девизи. Девизите се откриени при претрес на тројца патници, македонски државјани, коишто патувале со автомобил. При контролата во чантата на еден од сопатниците, како и во џебот од панталоните на возачот биле пронајдени непријавени 10.990 евра, 3.200 американски долари и 500 швајцарски франци, за кои патниците не поседувале ниту документ за потекло. Согласно Законот за девизно работење, на лицата им се вратени средства во противвредност од 2.000 евра, а останатите се задржани. За сторениот девизен прекршок е поведена прекршочна постапка.
· Мобилен тим спречи обид за криумчарење на офталмолошки производи, меѓу коишто 16 леќи, 48 пакувања 360 мл раствор за дезинфекција на леќи, но и 137 делови за моторни пили. Непријавените производи се откриени при контрола на стока наменета за увозник од Гостивар, пријавена за увозно царинење во царинската испостава Тетово. Производите, што не биле опфатени со царинските документи, се запленети, а против увозникот ќе биде поведена прекршочна постапка.
55 парчиња облека се откриени при контрола автомобил со македонски регистарски таблички, управуван од македонски државјанин, пријавен за влез во државата на граничниот премин Меџитлија. Непријавените производи, пронајдени во 4 куфери и торби сместени во багажникот на возилото се запленети, а против возачот ќе биде поведена прекршочна постапка.
228 пара женски обувки се откриени при контрола на камион со српски регистарски таблички управуван од македонски државјанин, пријавен за влез во државата на граничниот премин Богородица. Во товарниот дел на камионот, кој бил натоварен со стока наменета за фирма од Србија, покрај пријавената стока биле откриени 19 кутии со женски обувки кои не биле опфатени со царинските документи. Истите се запленети, а против возачот е поведена прекршочна постапка.
289 разни производи како часовници, чанти, обувки, парфеми и козметика, при што дел се со потпис на познати модни брендови, се откриени при контрола на автомобил со чешки регистарски таблички, управуван од македонски државјанин пријавен на влез во државата на граничниот премин Табановце. Непријавените производи биле пронајдени во повеќе големи торби сместени во багажникот и на задното седиште. Производите се запленети, а против возачот ќе биде поведена соодветна постапка.
498 литри маслиново масло, 30 шишиња од по 750 мл вино и 450 парчиња женска облека, се откриени при контрола на патничко комбе со германски регистарски таблички, управувано од германски државјанин на граничниот премин Богородица. Непријавените производи, пронајдени во повеќе картонски кутии сместени во багажникот и во внатрешноста на возилото, се запленети, а против возачот ќе биде поведена соодветна постапка.
· 71 водни пумпи за автомобили се откриени при контрола на автомбил со хрватски регистарски таблички, управуван од македонски државјанин, пријавен за влез во државата на граничниот премин Табановце автопат. Производите, пронајдени во кутија сместена во багажникот на возилото и во кеса сместена на задното седиште, се запленети, а против возачот ќе биде поведена прекршочна постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Потпишани договори за 40 научно – истражувачки проекти на универзитетите, научните институти и МАНУ

Министерството за образование и наука потпиша договори за финансирање на 40 научно-истражувачки проекти со државни факултети, научни институти и МАНУ.
Од нив, 15 проекти се од природно-математичките науки, инженерството и технологијата, медицинските и здравствените науки како и од земјоделските и ветеринарните науки.
Исто толку проекти се од општествените и хуманистичките науки.
За прв пат оваа година, се финансираат 10 проекти од областите кои со Стратегијата за паметна специјализација се утврдени дека имаат висок иновациски, истражувачки и економски потенцијал: паметното земјоделство и храна со повисока додадена вредност, ИКТ технологиите, електромашинската индустрија и одржливите материјали и паметни згради.
Проектите беа одбрани на јавен конкурс, вкупниот износ за финансирање по проект изнесува до 8 милиони денари, а истражувачките тимови треба да ги завршат до крајот на октомври 2026 година.
Министерската за образование и наука Весна Јаневска рече дека ова е трет конкурс по кој се одобруваат средства за финансирање на научно-истражувачки проекти, што јасно ја покажува насоката кон која сакаме да ја придвижиме државата.
„За оваа Влада науката е стратешки ресурс за развој. Затоа ги интензивираме вложувањата во научно-истражувачки проекти, врз основа на прецизни критериуми за селекција: поттикнуваме оригинални и иновативни идеи, поддржуваме млади истражувачи и меѓународно конкурентни и релевантни проекти. Наша цел е да создадеме услови за квалитетна наука која носи реални резултати и има потенцијал да го забрза општествено-економскиот развој на државата“, нагласи Јаневска.
Претходно, Министерството за образование и наука одобри и средства за пет научно-истражувачки проекти од посебен научен и јавен интерес кои се резултат на соработката помеѓу академскиот и бизнис секторот во рамки на паметната специјализација на државата, во вкупен износ од 30,4 милиони денари.
Минатата недела беа склучени договори со осум јавни научни установи за финансирање на научно-истражувачки проекти, во вкупен износ од 23,7 милиони денари.
Оваа година Министерството за образование и наука издвои буџет од 680 милиони денари за финансирање на наука, што е речиси двојно зголемување во споредба со Буџетот од 2024 година.
Македонија
Германски државјанин протеран од државата: на натпреварот Шкендија-Карабаг во Скопје веел знаме „Голема Албанија“

По извршена идентификација и поднесена кривична пријава, Основното јавно обвинителство Скопје по итна постапка процесуираше државјанин на Германија за кривично дело – Предизвикување омраза, раздор или нетрпеливост врз национална, расна, верска и друга дискриминаторска основа.
Против него беше поднесено обвинение, бидејќи на 5 август, непосредно пред фудбалскиот натпревар помеѓу ФК „Шкендија“ и ФК „Карабаг“ што се одигра на градскиот стадион во Скопје, со истакнување и веење знаме на „Голема Албанија“ и со натпис „Автохтона“, предизвикал чувство на омраза, раздор и нетрпеливост врз основа на етничка припадност. Тоа го забележале полициски службеници, кои го лишиле од слобода.
Врз основа на обезбедените докази во координација меѓу полицијата и надлежното обвинителство, Основниот кривичен суд Скопје веднаш изрече пресуда со која обвинетиот го огласи за виновен и го осуди на условна казна затвор од две години, која нема да се изврши доколку осудениот не стори ново кривично дело во следните 5 години.
Во исто време, бидејќи станува збор за странски државјанин, Судот донесе одлука да го протера и да му забрани влез во државава во следните пет години.
Од Обвинителството најавија дека тие и МВР продолжуваат да преземаат координирани активности за откривање и идентификување на сторители на кривични дела на ширење на омраза и нетрпеливост поврзани со спортски натпревари. Веднаш по идентификацијата на сторителите, тие ќе бидат процесуирани во согласност со надлежностите на јавното обвинителство.
Македонија
Одложени активности на отворено: Министерството за здравство со препораки поради најавите за високи температури

Министерството за здравство информира дека во согласност со најновата прогноза од Управата за хидрометеоролошки работи (УХМР) во периодот од 8 до 13 август 2025 година се очекува значително зголемување на дневните температури, кои во одделни региони може да достигнат до 39°C.
Поради тоа, потсетуваат на почитување на општите препораки за заштита на населението од високи температури:
„Престојувајте во затворени, разладени простории, особено во периодот од 11 до 17 часот;
Внесувајте доволно течности избегнувајќи алкохол и засладени пијалаци;
Носете лесна, светла облека и користете заштита за главата и за очите;
Избегнувајте физичка активност во најтоплите часови од денот;
Посветете внимание на децата, старите лица, лицата со хронични заболувања и на бремените жени – овие групи се особено чувствителни на високи температури;
Во случај на симптоми, како вртоглавица, главоболка, гадење или забрзан пулс, веднаш побарајте медицинска помош;
Одложете активности на отворено во најтоплиот дел од денот;
Обезбедете микроклиматски услови (разладени простории со температура до 25°C) на работното место и во домот“.
Министерството, како што велат, внимателно ја следи состојбата на дневна основа и ќе постапува во согласност со процените и потребите.