Никола Димитров како министер за надворешни работи беше извор на лажна вест кога лани заедно со двајца вицепремиери и со премиерот објави фотографија во чест на лагата дека Македонија добила датум за почеток на евроинтеграцијата на Република Македонија, изјави Наум Стоилковски, портпарол на ВМРО-ДПМНЕ.

Според него, по недобивањето датум за преговори и годинава, Никола Димитров треба да си поднесе оставка, тој нема ниту едно позитивно дело и успех за државата и во секоја нормална демократска држава тоа би се очекувало од министер на таква позиција.

„Недобивањето датум и лани и годинава во јуни е неуспех на македонската дипломатија на чело со Никола Димитров, кој повеќе се посвети на лични прашања отколку на дипломатијата кон навистина добивање датум. Но, тоа е човекот што се колнеше во илинденска Македонија, ја претставуваше Република Македонија, а ја потпиша и се гордее со Северна Македонија!Наместо за напредокот и за датумот на Македонија, името на Никола Димитров ги потсетуваше холандските политичари и холандската јавност за корупциски скандал тежок 20 милиони евра, пари од државни субвенции за институт во Хаг, каде што Димитров имаше висока позиција и како близок до првиот човек на институтот имал несразмерно голема плата. Наместо да се зборува за Македонија, во Холандија се зборуваше за Димитров, за неговата плата и можна вмешаност во корупциски скандал. Да потсетиме, францускиот печат ја посочи Холандија како земја што се противи на почнувањето преговори со Македонија!

Кога зборуваме за Холандија, корупцијата и непотизмот го поврзуваат Никола Димитров и со скандалот со стипендијата за ќерка му и начинот на кој таа стекна стипендија за студии и престој во Хаг иако семејството Димитрови има имот во близина на универзитетот. Но, Димитров не одговори како е можно ваква стипендија да стекне неговата ќерка, а не и редица други што ги исполнуваат критериумите. До сега не одговорил за неговото можно влијание зошто преку ноќ неговата ќерка стекна стипендија два дена пред распишувањето избори од комисија водена од лице блиско до Димитров, а комисијата што ја одобрила стпендијата работела во нецелосен состав? Никола Димитров го претвора МНР во приватна институција на политички истомисленици и со креирање ситуации за лажни вести, непотизам, самоволие, корупциски скандали, политички реваншизам и со навреди кон македонскиот народ, нанесува срам за државата дома и надвор. Во моменти кога власта најавува привид од реконструкција на владата, Никола Димитров треба повторно да ја активира веќе еднаш поднесената оставка, со потпис и печат“, додаде тој.