Убиства, пукање, брутални ликвидации, исчезнати, киднапирани, крвави бегства од затвор, Македонија се претвори во мафијашки терен затоа што институциите, наместо да го гонат криминалот, тие шуруваат со него. Полицијата со Оливер Спасовски и со Сашо Тасевски се претвори во разгранок на мафијата. Десната рака на директорот на БЈБ, Сашо Тасевски, началникот на крим-полицијата, Музафер Каришиќ, е и член и претседател на комисијата за издавање одобрение за набавување оружје, изјави Наум Стоилковски, портпарол на ВМРО-ДПМНЕ.

Стоилковски постави неколку прашања, на кои треба да одговорат Спасовски и Тасевски:

„Дали е можно одобрение за оружје полицијата да издаде на лицето Шукри Асани, според полицијата, осомничен за транспорт на кокаин, член на криминалната група од Грчец, меѓу првите десет за проверка на листата ‘безбеден град’? Дали Шукри Асани, лице од листата за проверка, може да има одобрение за оружје од комисијата водена од Каришиќ? Одобрил ли Каришиќ од МВР дозвола за оружје на криминалец од листата ‘безбедносен ризик’? Дали одобрението за оружје по брза и скратена постапка може да го добиено лице што не ги исполнува условите предвидени со закон, да добие одобрение за носење оружје?“

Како што истакнува Стоилковски, Каришиќ е човек близок на Тасевски и на Спасовски, началник на крим-полицијата, едно време и началник на СВР Скопје.

Сè додека институциите, наместо да го гонат криминалот, тие шуруваат со него, Македонија ќе биде територија на мафијата и ќе ја потресуваат убиства, насилства, киднапирања и трговија со дрога, додаде Стоилковски.