Македонија
(Видео) Стоилковски: Партизација на администрацијата во Струмица, од хигиеничар до министер

Продолжуваме со честитките кон власта за успешниот придонес кон европеизацијата на општинските администрации преку вработувања на семејствата и блиските на видни партиски членови, онака како што тоа за власта не е непотизам, туку квалификации. Во оваа насока очекуваме следниот пат кога партискиот портпарол на СДСМ ќе одржи прес пред централното седиште на опозицијата да донесе и благо, да почести за личниот успех во акцијата „Партизација на администрацијата од хигиеничар до министер“, изјави Наум Стоилковски, портпарол на ВМРО-ДПМНЕ.
Според него, пред да биде вработена во струмичката администрација, без помош од пратеник на владејачката партија, административката мајка со сесрдна помош на семејството успешно водела семејни бизниси, кои речиси сите се избришани поради – стечај.
,,Во својот курикулум, доколку ѝ е побаран и поднесен при аплицирањето по огласот на струмичката администрација, веројатно се запишани и семејните компании, па така во општината се запознаени со одговорите на прашањата: Дали новата административка е запишана како сопственичка и управител во ‘Фани екстра’ ДООЕЛ увоз – извоз Струмица, фирма регистрирана за трговија со пијалаци, основана во 2002 година, а е изгасната со бришење од трговски регистар на 26.09.2013 година? Избришана од регистар, а останува прашањето зошто и поради кои причини.
Дали Фанче Костадинова, новата административка вработена без врски во струмичката администрација како дел од зафатот за европеизација и модернизација на администрацијата, се јавува и како косопственик со своите деца на ДОО ‘Фани логостик’ Струмица, трговија на големо со пијалаци? Фирма за која е поведена стечајна постапка на 27.01.2017 година од Министерство за финансии – Управа за јавни приходи Скопје, а субјектот е уште во постапка на бришење?”, праша тој.
Според Стоилковски, познато е дека стечајна постапка се поведува како последица на ненамирување на обврските спрема добавувачите, значи купување стока, а за неа не плаќале, до период додека не се презадожиле и не можеле редовно да се сервисираат долговите.
,,Дали можеби во администрацијата имале сознанија за ‘Деликатес Фани’ ДООЕЛ Струмица, регистрирана од страна на сопругот и татко на пратеникот Костадинов? Дали и зад бришењето од судски регистар по решение за стечајна постапка и за оваа фирма стои ситуација во која не се намирувани обврски и фирмата е доведена во неликвидна и несолвентна состојба кон доверителите? Или дали новата административка има врска со фирмата ‘Интер метал метан ДООЕЛ Струмица, повторно регистрирана од сопругот и татко Костадинов, за кој што во 2017 година е поведена стечајна постапка и истата е избришана од трговски регистар?
Според Законот за стечај, во делот Услови за отворање стечајна постапка стои дека стечај или реорганизација над стечајниот должник се спроведува кога стечајниот должник е неспособен за плаќање, односно му претстои идна неспособност за плаќање. Оттука по низа вакви фирми избришани од регистарот, прашањето е дали тие намерно се воведувани во стечај? Или дали можеби станува збор на пример за намерно доведување на фирми во неликвидна состојба за лична добивка?”, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.