Македонија
(Видео) Талески до Тошковски: Кој ќе одговара за пропустите на МВР за трагедијата во Кочани
Пратеникот на СДСМ, Миле Талески, на денешната собраниска седница посветена на пратенички прашања упати прашање до министерот за внатрешни работи, Панче Тошковски, кое се однесуваше на одоворност за пропустите на МВР за трагедијата во Кочани, во која животот го загубија 59 луѓе, а над 200 беа повредени.
Toj ги потенцира сите пропусти на МВР и повика на неселективна истрага и утврдување на одговорноста.
Талески вели дека ваква трагедија, со толку многу жртви и повредени, повикува на неселективна истрага и утврдување одговорност.
„Досега нема одговор на најважните прашања: за потфрлањето на безбедносниот систем, кој е одговорен за пожарот во кобната ноќ и кој дозволи таков настан со присуство на толку луѓе и малолетници. Клучната улога за безбедноста на граѓаните, за сигурноста на јавните собири, за превенцијата и спречување потенцијални настани со огромни последици е во Министерството за внатрешни работи. Затоа ќе поставам прашања до министерот за внатрешни работи, кој раководи со ова Министерство и е најодговорен за неговата работа и постапувањето. Господине Тошковски, механизмите за контрола под надлежност на МВР покажуваат алармантни пропусти непосредно пред и за време на кобниот настан на Бирото за јавна безбедност, на ОВР Кочани и СВР Штип.
Факт 1. Законот за јавни собири јасно наведува дека за собири со повеќе стотици лица – како што беше овој настан со 650 присутни – полицијата има обврска да има оперативни сознанија и да преземе мерки за обезбедување, дури и ако собирот не бил формално пријавен.
Стандардните процедури во вакви случаи вклучуваат 1) формирање на оперативен штаб најмалку во ОВР Кочани, 2) Комуникација со сите СВР за можни ризици и присуство на организирани групи и 3) Превентивно зголемување на полициското присуство.
МВР не подготвила официјален план за обезбедување на настанот, што е стандардна процедура при јавни собири со голем број посетители. Овој пропуст значително ја намалил способноста за контрола и управување со ризици, особено во случај на итни ситуации.
Факт 2. МВР, односно БЈБ, СВР Штип и ОВР Кочани, не направиле ниту план за процена на ризик. Без разлика што немало официјално известување, настанот бил јавно објавен и најавен, а покрај тоа немало комплетен безбедносен план.
Значи МВР – конкретно во Кочани – не постапило по закон. Да постапеше, на местото на настанот ќе имало полиција, противпожарна бригада, брза помош и безбедносен план кој можеше да спаси животи.
Факт 3. МВР е директно одговорно за контрола на процесот на употреба и давање дозвола за користење на пиротехника во затворен простор, што е единствена причина за пожарот, а БЈБ е одговорно за обезбедување на јавната безбедност.
Факт 4. МВР не презел никакви активности за прекинување на настанот кобната вечер, иако непосредно пред случување на несреќата во клубот имало полицајци, ама во 2 часот полноќ. Увиделе присуство на малолетници, присуство на пиротехника, затекнале настан кој се случува непријавено, во клуб за кој биле должни да знаат дека не поседува валидна лиценца и не презеле ништо.
И уште еден факт. По смената на началниците, сопственикот првин го реновирал клубот, па го отворил во ноември, исто така со јавна најава. Немал лиценца, полицајците оделе во акциски контроли во диво кабаре, а не спречиле ништо.
Доколку МВР преку своите ОВР и СВР постапеле по кој било од наведените 4 основи, немало да има ваква трагедија.
Ова го покажува директното непостапување на службениците на МВР, особено Бирото за јавна безбедност и службениците во СВР Штип и ОВР Кочани.
Господине Тошковски, мото прво прашање е: Кој ќе одговара за овие институционални и системски пропусти во МВР? Ама не лани, не пред две години, туку на денот на несреќата, 16 март 2025 година?“, додаде Талески.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Обвинителството побара притвор за директорот и за управителот на „Комунална хигиена“
Скопското обвинителство побара притвор за в.д. директорот на ЈП „Комунална хигиена“ – Скопје, Сабахудин Рустеми, и за еден управител за отпад во претпријатието во рамките на истрагата што се води против нив за кривично дело загрозување на животната средина и природата со отпад.
„Осомничените, од кои едниот в.д. директор, а другиот управител за отпад во ЈП ‘Комунална хигиена’ – Скопје, заедно постапиле спротивно на Законот за управување со отпадот и на својата основна дејност за редовно собирање и транспортирање безопасен отпад на подрачјето на град Скопје, како и на обврските предвидени во оперативната програма за собирање и транспортирање на комуналниот отпад и на оперативниот план за одржување на јавната чистота во градот. Со пропуштање на целосниот надзор над собирањето и транспортирањето комунален отпад, како и со непрописното управување со отпадот, тие овозможиле во текот на месецот да се создадат мали депонии на јавни и сообраќајни површини во близина на предвидените садови за собирање комунален отпад со што предизвикале значително оштетување на квалитетот на почвата, воздухот и водата и ги довеле во опасност животот и здравјето на луѓето од предизвикување заразни или други болести“, велат од Обвинителството.
Од таму додаваат дека ваквите сомненија се утврдени и констатирани со вонредните инспекциски надзори од овластените локални инспектори за животна средина кои излегоа на терен по насоки на јавното обвинителство, како и со експертско мислење за влијанието на отпадот врз јавното здравје и можноста за ширење заразни заболувања од ЈЗУ Институт за јавно здравје.
„Поради опасност од влијание врз сведоци и можност за повторување на делото, јавниот обвинител до Основниот кривичен суд Скопје достави предлог за определување мерка притвор за двајцата осомничени“, соопшти Обвинителството.
Македонија
Директорот на „Комунална хигиена“ и раководителот сè уште во полициска станица
Директорот на ЈП „Комунална хигиена“ – Скопје, Сабахудин Рустеми, и уште едно раководно лице сè уште се наоѓаат во полициска станица по приведувањето во врска со проблемот со отпадот во главниот град.
„Лицата се задржани и постапката е во тек“, велат од Јавното обвинителство.
Од тука вчера соопштија дека лицата се приведени во врска со сомненија за кривично дело од член 230 од Кривичниот законик или, како што појаснуваат, станува збор за загрозување на животната средина и природата со отпад.
Владата претходно го задолжи Министерството за внатрешни работи во координација со Државниот комунален инспекторат, Државниот инспекторат за животна средина, Државниот санитарен и здравствен инспекторат и Институтот за јавно здравје да изврши вонреден инспекциски надзор во Град Скопје и во „Комунална хигиена“ со цел да се утврди состојбата со отпадот во главниот град и да се преземат соодветни мерки.
Во врска со приведувањето во текот на вчерашниот ден реагира градоначалничката на Скопје, Данела Арсовска, која на „Фејсбук“ со иронија напиша дека директорот, кој е кадар на ДУИ, бил пуштен од станица кога во полиција по убедување им кажал дека во срцето и душата е „Влен“. Арсовска вината ја лоцира кај претседателката на управниот одбор на претпријатието, Јулијана Спировска, за која исто со доза иронија напиша дека неа не ја апсат оти имала албум со фотографии со сите функционери од ВМРО-ДПМНЕ.
Македонија
Николоски: Ќе работиме да го решиме урбанистичкиот хаос во Центар
Александар Николоски, потпретседател на ВМРО-ДПМНЕ, денеска беше во Маџир Маало, во општина Центар, каде заедно со кандидатот за градоначалник на општината, Мирослав Лабудовиќ, даде изјава за состојбите во овој дел од градот. Тој посочи дека поединци блиски до актуелното раководство на општина Центар го гледаат урбанизмот единствено низ призма на личен финансиски интерес, а поради тоа, граѓаните во Маџир Маало живеат во услови кои не доликуваат на 21 век.
„Денеска ќе се видиме и ќе поразговараме со жителите на Маџир Маало, ова е срцето на главниот град, срцето на Скопје. За жал луѓето живеат во супстандардни услови и овде можете на дело да видите како изгледа урбанистичкиот хаос и создавање на урбанизам само во интерес на поединци“, кажа Николоски и додаде:
„Затоа што поединци кои што се блиски на актуелното раководство на општина Центар, не можат тука да си го најдат финансискиот интерес и не можат тука да најдат бизнис. Затоа луѓето овде живеат во една ситуација која што не приличи на 21 век“.
Николоски укажа и на примерот со новите згради кои се градат во Маџир Маало, каде што тесните улици создаваат проблем и за новите жители, но и за оние кои веќе живеат тука.
„Низ оваа тесна уличка треба да поминуваат сите кои што ќе живеат во овие нови згради кои што се градат тука, а од другата страна зад мене не можат луѓето да си стигнат до куќите. Ова на најдобар начин покажува на кој начин се уништува општина Центар и зошто се потребни промени во општина Центар“, истакна Николоски.
Николоски потсети дека, откако е министер за транспорт и врски, гласно зборува за урбанистичките проблеми и во општина Центар и во општина Карпош.
„Јас многу гласно и за општина Центар и за општина Карпош зборувам откако сум избран за министер. Предложив на двете општини и на двата актуелни градоначалници да донесеме специјални закони за општина Центар и за општина Карпош, кои што би дале развој, но би го заштитиле во исто време урбаното живеење. Двајцата не се согласија, и ги гледаме сега причините зошто“, рече Николоски.
На крај, Николоски истакна дека заедно со кандидатиот за градоначалник на општина центар, како иден градоначалник на општина Центар, ќе работат на решавање на проблемите на жителите од Маџир Маало.
„Ќе работиме да ги решиме овие проблеми и луѓето кои тука денеска разговараат со нас, од Маџир Маало конечно да добијат пристојни услови за живот“, заклучи Николоски.

