Македонија
(Видео) „Татко ми, обвинител, се пензионира кога станав министер“, им порача Маричиќ на снаите на политичарите во правосудството
![](https://makfax.com.mk/wp-content/uploads/2023/02/Screenshot-2023-02-27-at-08.54.16.jpg)
Мојот татко, кој беше обвинител, се пензионира кога јас станав министер за правда, тоа е етичко постапување. Вака вицепремиерот Бојан Маричиќ го коментира изборот на синови, ќерки и снаи на политичари и ексобвинители за нови судии и обвинители. Тој посочува дека не е спорно оти сите слушатели што го положиле завршниот испит тоа го направиле на законски начин. За себе посочи: „Немам причина да се плашам од кое било судење или обвинение во моментот“.
„Таму има луѓе од разна политичка определба. Има сопруга на потпретседател на ВМРО-ДПМНЕ. Јас сакам да кажам дека нема таков тип на политичка селективност“, рече Маричиќ дополнувајќи дека се познава со сопругата на Тимчо Муцунски, која сега станува судијка, па прокоментира и дали е добар правник.
Тој коментира и за избраните кандидати за кои рече дека со некои од нив и лично се познава, како што е ќерката на ексобвинителка од Обвинителството за гонење организиран криминал. Маричиќ одговараше и на прашањето кому од синовите, снаите, ќерките на политичари и обвинители најмногу би му верувал ако го седне на обвинителна клупа.
На прашањето: „Би сакале ли синот на Талат Џафери да ве обвини (во својство на обвинител)?“, Маричиќ одговори: „Јас не би сакал никој да ме обвини“.
Прашан дали би имал доверба во Џафери ако биде обвинител што ќе го гони, Маричиќ рече: „Важно е кој било кандидат да ја помине обуката. Во секој што ќе ја помине обуката на Академијата за судии и обвинители ќе ја имам довербата“.
„Не сме се запознале со синот на Џафери, но немам проблем да се запознам, како и со кој било од нив“, додаде тој.
Дискусијата со вицепремиерот Бојан Маричиќ за новите судии и обвинители целосно во интервјуто за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
(Видео) Со два хеликоптера на МВР изгаснат пожарот во Крушевско
![](https://makfax.com.mk/wp-content/uploads/2024/07/Screenshot-2024-07-01-215151.jpg)
Денеска, два хеликоптера од Одделот за воздухопловни единици го изгаснаа шумскиот пожар кој попладнево изби во атарот на крушевското село Пуста Река.
„По добиено барање од ЦУК, на пожарот двата хеликоптера исфрлија над 40 тона вода и во координација со пожарникарите, пожарот е целосно изгаснат“, соопшти МВР..
Македонија
Времена забрана за движење на тешки товарни возила на патиштата во државата
![](https://makfax.com.mk/wp-content/uploads/2018/11/kamiondzija.jpg)
Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури.
Термините се следни:
– петок од 17:00 – 22:00 часот,
– сабота од 09:00 до 18:00 часот и
– недела од 09:00 до 22:00 часот.
На магистралниот пат А2 делница: Скопје – Охрид – Скопје се забранува движење на тешки товарни возила чија вкупна маса преминува 7,5 тони за време на викендите, во следните интервали:
– петок од 15:00 – 22:00 часот,
– сабота од 07:00 до 12:00 и од 18:00 до 24:00 часот и
– недела од 07:00 до 22:00 часот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен.
На ГП Табановце се бележи зголемена фреквенција на возила, времето на чекање за влез во Македонија е околу 20 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево
Македонија
Средба Тошковски-Агелер: во фокусот борбата против организираниот криминал и корупцијата
![](https://makfax.com.mk/wp-content/uploads/2024/07/1-9.jpg)
Денеска министерот за внатрешни работи Панче Тошковски, во Министерството за внатрешни работи оствари работна средба со амбасадорката на Соединетите Американски Држави, Анџела Агелер.
Министерот Тошковски изрази благодарност кон амбасадорката на САД за поддршката што Владата на Соединетите Американски Држави постојано и ја дава на Република Северна Македонија, конкретно на Министерството за внатрешни работи во јакнење на капацитетите и сите процеси кои се спроведуваат преку проектите наменети за полицијата, со акцент на обуки на персоналот и набавка на опрема.
Како една од стратешките цели на кои Министерството за внатрешни работи на Република Северна Македонија ќе биде фокусирано во следниот период министерот Тошковски ја посочи борбата против организираниот криминал и корупцијата, како приоритет што е еден од главните столбови на владината програма.
Агелер му се заблагодари на Тошковски за континуираната одлична соработка на Република Северна Македонија со Соединетите Американски Држави во повеќе сфери од општествениот живот, пренесувајќи ја заложбата на американската амбасада и Владата на САД за поддршка и соработка и во наредниот период.