Референдум за името ќе се одржи на 23 септември, 30 септември или 7 октомври, вели премиерот Зоран Заев во интервјуто за грчката државна телевизија ЕРТ. Тој откри и како би можело да гласи прашањето за кое граѓаните ќе се изјаснат.

Заев повтори дека референдумот ќе има обврзувачки карактер и дека целта е до 15 јануари да се завршат сите предвидени обврски,

„Ако биде порано, тоа е добро. Дури сакаме да завршиме пред божиќните празници коишто се слават, дури и пред Нова година и во тој аспект затоа оставаме  3 месеци. Согласно со  нашиот Устав и законите, потребни ни се стотина дена. Затоа  е поставен 15 јануари“, вели Заев.

Тој во интервјуто ги открива и можните прашања на референдумот.

„Убеден сум дека народот ќе биде за договорот со Грција заради тоа што прашањето веројатно ќе биде ‘Дали сте за Европската Унија и за НАТО и за поддршка на договорот со Грција?’. Веројатно во тој правец ќе биде заради тоа што едно со друго кај нас е поврзано и од таков аспект граѓаните кога ќе го дадат својот глас, политичарите, владата, парламентот, претседателот на државата сме должни да го почитуваме. Или можеби прашањето ќе биде ‘Дали сте за Европската унија и НАТО поддржувајќи го името Република Северна Македонија?’, заради тоа што тоа е договорот. Верувам дека граѓаните ќе бидат целосно позитивни“, вели Заев.

Со успешниот референдум, додава тој, јас сум убеден дека сите во парламентот ќе го послушаат народот што кажува на референдум и така ќе гласаат. „Тоа денеска го добиваме како порака дури и од претседателот на државата, господинот Ѓорге Иванов дека ако референдумот е успешен, секако и тој ќе ги поддржи и договорот со Грција и сето она што е следна фаза, а и опозицијата исто така“, вели Заев.