Македонија
(Видео) Филипче: Стратегијата на широко и интензивно тестирање дава резултати
Министерот за здравство, доц. д-р Венко Филипче, на денешната прес-конференција информираше за најновата состојба со вирусот Ковид-19 во нашата земја. Тој информираше и за статистиката во врска со пациентите, состојбата во болниците, подготвеноста на капацитетите за следниот период, се осврна на анализите од Институтот за јавно здравје за изминатите недели, како и на состојбата во регионот.
„Во изминатите десет дена кризата со коронавирусот повторно ескалираше насекаде на Балканот, во соседните земји. Светската здравствена организација извести дека 60% од случаите од 10 милиони инфицирани со Ковид-19 ширум светот се регистрирани во месец јуни. Ова потврдува дека насекаде има нов бран, кај нас дојде нешто порано и мислам дека многу рано го детектиравме. Сега се јавува во сите земји од нашето опкружување и тоа е директна последица на попуштањето на рестриктивните мерки и на непочитувањето на мерките за лична заштита“, потенцираше министерот Филипче.
Состојбата во светот, исто така, потврдува дека првичните предвидувања на светските здравствени авторитети дека вирусот во текот на летото ќе исчезне – практично не се остварија.
„Во последните денови светската статистика говори дека има пикови на новозаразени и починати и тоа е уште една потврда дека вирусот е тука. Ќе остане очигледно подолго време, а ние мора да бидеме подготвени. Мора да го подготвуваме здравствениот систем, да ги почитуваме мерките за лична заштита, да се навикнеме на новата реалност, што значи продолжување на сите нормални активности, но со почитување на мерките за лична заштита. Исто така, мора да прифатиме дека оваа реалност можеби ќе трае и подолго од тоа што првично сите земји во светот го очекуваа“, изјави министерот Филипче.
Во последниот извештај на Институтот за јавно здравје од 20 до 28 јуни споредено со претходната недела, во нашата земја регистрирани се 303 помалку нови случаи со КОВИД-19, со помалку смртни случаи, 216 повеќе оздравени пациенти. Изминатата недела има вкупно околу 860 случаи, што е значајно помалку од 1.000 случаи во просек претходните три недели, што значи и минатата недела инциденцата е нешто пониска. Р0 Факторот на преносливост во изминатите десет дена, два до три дена е само над единица – 1,1, целиот останат период е околу 0.9.
„Во наведениот период регистрирани се заболени лица од сите возрасни групи, а најзастапена е возрасната група на лица над 60 години – 26%. Апелирам уште еднаш возрасните и хронично болните да бидат исклучително внимателни, покрај тоа што најчесто заболуваат, а и смртноста во оваа група е висока. Во последниот извештај на ИЈЗ има 57 смртни случаи од десет града, што е осум смртни случаи помалку од претходната недела. Најголем број од случаите на возраст над 60 години, а 44 од нив се лица со претходни хронични заболувања. Во однос на дистрибуцијата по градови, најголем број од регистрираните случаи се во Скопје – 46%, Тетово – 13%. Овие градови и натаму остануваат најголемите жаришта во нашата земја. Во 15 града во земјата, за истиот период бројот на новопотврдени случаи е под 20. Спорадични случаи има во повеќе градови, бројките варираат секаде, но она што може да се заклучи од изминативе повеќе недели дека нема знаци дека постои друго потенцијално жариште освен Скопје, Тетово и нешто повеќе случаи во Гостивар“, рече министерот Филипче.
Во наведениот период оздравени се водат 447 лица кои биле хоспитализирани или на домашно лекување што е за 216 повеќе од претходната недела на известување и тој е важен и позитивен индикатор кој влијае на намалување на растот на активните случаи.
„Во земјата досега се направени 68.059 тестирања. Стратегијата на широко и интензивно тестирање, вклучувајќи ги и контактите на позитивните по индикација дава резултати, како што може да се забележи во просек имаме околу 8.000 тестови неделно. Овој пристап ни овозможува да имаме еден широк увид во состојбата во однос на ширењето на вирусот. Овој систем помага да ја стабилизираме ситуацијата во двете жаришта, пред сè во Скопје и во Тетовскиот регион, да се задржиме на овој линеарен раст на случаи. Како резултат на оваа стратегија имаме рана детекција на асимптоматски случаи и секако нивно изолирање, нешто на што интензивно работат сите центри за јавно здравје, посебно Центарот за јавно здравје во Скопје во чијашто работа се вклучени сите колеги од центарот, не само епидемиолозите и со такво интензивно следење на контактите практично се спречува ширење на заразата“, истакна министерот Филипче.
Тој посочи дека и во следниот период се продолжува со истата стратегија и упати апел до граѓаните да соработуваат со здравствените работници, да даваат точни податоци за епидемиолошките анкети, заради тоа што тоа е еден многу битен сегмент за раната детекција на нови случаи.
„Анализата во однос на процентот на позитивни од тестирани случаи укажува на тоа дека имаме просек од 13% од вкупниот број на направени тестови и во изминатиот период оваа бројка не се менува значително. Во последните 24 часа направени се 894 тестирања, регистрирани се 78 нови случаи. Институтот за јавно здравје регистрира 172 оздравени лица, починати се 5 пациенти. Вкупната бројка на дијагностицирани во нашата земја од почетокот на епидемијата е 7.124, на оздравени е 3.199, на починати е 346 и во моментот број на активни случаи 3.579. Во однос на хоспитализацијата во изминатиот период целиот тим на Министерството за здравство и менаџерите на болниците беа посветени на менаџирање на капацитетите и ресурсите, како и организација на системот на ротација“, информираше Филипче.
Во моментот вкупно хоспитализирани се 421 пациент, суспектни и позитивни на КОВИД-19, или 11,4 % од вкупниот број на активни случаи. Бројот на хоспитализирани од активни случаи е речиси ист изминатиот период и се движи од 11 до 12%, останатите 88% се на домашно лекување со лесна клиничка слика или асимптоматски. Во изминатиот период евидентен е и број на повеќе оздравени и повеќе исписи од болниците и тој е практично еднаков со бројот на нови приеми.
Анализата на хоспитализираните пациенти при нивното доаѓање во болница, упатува на заклучокот дека има процент на пациенти кои доаѓаат во болница откако состојбата им е значително влошена.
„Во однос на состојбата со болничките капацитети и слободните места на Инфективната клиника во изминатите 24 часа, примени се 5 пациенти, а вкупно се хоспитализирани 90, на кислородна поддршка 53 пациенти, има околу 20-тина кревети во самата клиника кои што се на располагање. Овој тренд на помал број на примени пациенти од испишани трае повеќе денови споредено со периодот од пред една недела до десет дена. Во болницата во Козле се хоспитализирани 29 возрасни пациенти и четири деца. Во ГОБ „8-ми Септември“ примени се шест нови пациенти, вкупно хоспитализирани се 122 пациенти, на респираторна машина се три лица. Во болницата во Битола хоспитализирани се 37, во Штип 45 пациенти и во двете болници има слободни кревети за следните денови, а секако со план за испис на пациенти. На инфективните одделенија во Тетово, Охрид, Велес, Куманово , Прилеп и Гостивар хоспитализирани се вкупно 94 пациенти и нема одделение во коешто нема слободни кревети во овој момент“, рече министерот Филипче.
„Сакам да апелирам до граѓаните, апсолутно и безусловно да ги почитуваат мерките за заштита – маска, дистанца, редовна хигиена, дезинфекција на рацете. Ова се универзални мерки кои се базираат на истите принципи, како и другите мерки во светот. Нема друг начин да се заштитиме од ковид вирусот. Живееме со вирусот, мора да го прифатиме тоа како реалност, да функционираме нормално, да работиме па дури и да се дружиме. Само со почитување на мерките ќе се заштитиме себеси, нашите семејства, пријателите и нашите сограѓани. Така ќе ги заштитиме и ќе им помогнеме на здравствените работници кои пет месеци пожртвувано, деноноќно работат и се борат за секој човечки живот. Да ги почитуваме сите мерките за да го зачуваме и нашиот здравствен систем да остане стабилен“, истакна Филипче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Стевчо Јакимовски да каже како неговото семејство се стекнало со градежни парцели во Жданец и луксузна хациенда во Грција“, прашува ВМРО-ДПМНЕ
„Стевчо Јакимовски, кој постојано зборува за јавниот интерес, треба конечно да објасни како парцели што според деталниот урбанистички план биле означени како зеленило, одеднаш станале градежни парцели. И како се купува хациенда во Грција“, прашува ВМРО-ДПМНЕ преку соопштение.
„Јакимовски одамна се обидува да го претстави своето владеење како пример за ‘транспарентност’, но во реалноста би можел да послужи како пример за тоа како личниот интерес може да се сокрие зад службен печат и јавна должност.
Во рок од една година, членови на неговото семејство се појавуваат како сопственици на имоти во најскапата зона на општина Карпош, Жданец, токму во делот каде што живее и самиот Јакимовски.
Сосема легитимно прашање е јавноста да знае како од парцели за зеленило станаа градежни парцели.
Семејството на Стевчо Јакимовски во истиот период од таа една година се стекнало и со луксузна вила во Грција.
Доволно е од приказните за ‘искусен градоначалник’, искуството што го покажа е искуство претворање на јавен интерес во имотен лист.
Карпошани не се должни да слугуваат во процесот на енормно богатење на Стевчо Јакимовски“, се додава во соопштението на ВМРО-ДПМНЕ.
Македонија
Избрани се 50 најдобри средношколски идеи – започна трката за милион денари!
Со изборот на 50-те најдобри од вкупно пристигнатите 438 пријави, започнува втората фаза на натпреварот „Средношколец Милионер“ со онлајн гласање на платформата milioner.mk.
Од вкупно 438 пристигнати бизнис идеи од средношколци низ цела Македонија, избрани се топ 50 најиновативни и најперспективни бизнис идеи кои влегуваат во втората фаза на натпреварот „Средношколец Милионер“, организиран од Бреинстер Некст Колеџот и НУ Академиите за талентирани средношколци.

Во првата фаза учениците имаа можност да се пријават и да ја опишат својата идеја и нејзиниот потенцијал за решавање реален проблем. Во следната фаза кандидатите ќе ги изложат своите идеи пред јавноста, која ќе гласа за најдобрите 20 кои ќе ја продолжат битката за големата награда – еден милион денари.
„Оваа генерација средношколци не само што има идеи – тие размислуваат зрело, креативно и амбициозно. Нашата мисија е да им помогнеме да го претворат потенцијалот во реални решенија,“ – велат од Бреинстер Некст Колеџ.
Од денес започнува и втората фаза, во која ќе има официјално гласање за идеите на платформата milioner.mk каде што секој еден може да дознае повеќе детали за секоја од 50-те најдобри идеи и да гласа по еднаш за максимум 10 бизнис идеи предложени од амбициозните средношколци од цела Македонија. Гласањето ќе биде затворено на 16 ноември.
Најдобрите 20 идеи ќе влезат во последните две фази, во кои со поддршка од ментори ќе се подготвуваат за големото финале и борбата за освојување на 1.000.000 денари.
Целта на натпреварот „Средношколец Милионер“ е да ги поттикне младите во Македонија да размислуваат претприемнички, креативно и иновативно, да препознаваат реални проблеми во својата околина и да предлагаат одржливи решенија со потенцијал за развој во вистински бизнис.

„Кога бев средношколец, и јас имав многу идеи – но немаше каде и како да ги претворам во нешто реално. Пред 10 години кога го започнав Бреинстер, наидов токму на ваква поддршка каква што нудиме денес за оние со најдобрите идеи, односно даваме шанса каква што ни била дадена нас од луѓе кои веруваа во визијата за Бреинстер. Затоа верувам дека „Средношколец Милионер“ е многу повеќе од натпревар – тоа е шанса младите денес да направат нешто што нашата генерација немаше шанса да го направи додека учеше во средно школо. И да видат дека идејата вреди само ако се обидеш да ја спроведеш,“ вели Петар Ниновски, основач на Бреинстер, додавајќи дека токму ваквите иницијативи создаваат нова генерација млади луѓе кои не чекаат приликата – туку самите ја создаваат.
Преку натпреварот, Бреинстер Некст Колеџот и НУ Академиите за талентирани средношколци создаваат најголема платформа за младинско претприемништво во земјата, со мисија да ги подготват средношколците за идни професии и да им покажат дека идеите можат да станат реалност – со вистинска поддршка, знаење и труд.
Натпреварот не е само трка за награда од 1.000.000 денари, туку патување на учење, развој и инспирација, кое им овозможува на младите да изградат самодоверба, лидерски способности и вистински бизнис-дух.
(ПР)
Македонија
Здружението на пензионери на oпштина Центар: Се надеваме дека соработката со Герасимовски ќе продолжи во иднина
Здружението на пензионери на Општина Центар на средбата со кандидатот за нов мандат, Горан Герасимовски, ја потврди својата поддршка за него во вториот круг од локалните избори. Герасимовски, заблагодарувајќи им се на пензионерите, истакна дека нивната поддршка многу му значи.
„Тоа е генерација која заслужува внимание, почит и помош, а јас како градоначалник, заедно со мојот тим, секогаш сме излегувале во пресрет. Им благодарам што го препознаа сето она што го правиме за нив, преку разни проекти и иницијативи. На средбата разговаравме и за идните планови, како и за можностите за унапредување на квалитетот на нивниот живот“, истакна Герасимовски.

На средбата се разговараше и за новата програма во која се предвидува изградба на дом за стари лица, во кој највозрасните ќе можат да домуваат по субвенционирана цена, извести Герасимовски.
Здружението изрази надеж дека одличната соработка со општина Центар, а особено со градоначалникот Герасимовски ќе продолжи и во иднина.

Пензионерите изразија задоволство од проектот „Сервис за стари лица“, како и од континуираната соработка со општината и нивната вклученост во креирање на политиките на локалната самоуправа, се додава во соопштението од Герасимовски.

