Македонија
(Видео) Цаневска: Кога вложуваме во училиштата, вложуваме во иднината на Скопје
На Денот на просветните работници, носителката на советничката листа за Град Скопје, Катерина Цаневска, порача дека образованието е темелот врз кој се гради напреден град и дека иднината на Скопје се создава преку училиштата, наставниците и младите луѓе.
„Денес не сме тука само да им честитаме на наставниците, туку и да зборуваме за она што е суштината на секое напредно општество – образованието. Скопје ја гради својата иднина преку училиштата, преку наставниците и преку младите кои секојдневно учат и создаваат“, изјави Цаневска.
Во рамки на програмата „Образование и можности“, Цаневска најави повеќе проекти кои го ставаат образованието во центарот на развојот на градот. Еден од клучните приоритети е изградбата на нова гимназија во Општина Аеродром, општина со над 80.000 жители, која засега нема ниту едно средно училиште од тој тип.
„Новата гимназија ќе биде современо, енергетски ефикасно и пристапно училиште, со спортска сала, социјални простори и услови за вистинско образование од 21. век“, рече Цаневска, додавајќи дека тоа ќе биде инвестиција која ќе го поддржи растот на младата популација во овој дел од градот.
Во првата фаза од програмата „Образование и можности“, фокусот ќе биде ставен на:
• реновирање и опремување на постојната училишна инфраструктура,
• модернизација на наставните методи,
• воведување нови наставни содржини,
• поддршка на неформалното образование преку ревитализација на Планетариумот во Младинскиот културен центар.
Цаневска најави и зголемување на поддршката за младинските иницијативи за 300%, потенцирајќи дека младите не се само иднината, туку и сегашноста на градот.
„Во следната етапа ќе воспоставиме мрежа на младински центри во сите општини на Скопје, каде што младите ќе можат да се развиваат, поврзуваат и креираат заеднички проекти. Ќе развиваме партнерства меѓу училиштата и локалниот бизнис сектор, за наставата да се поврзе со реалниот живот преку менторски програми, практична обука и кариерно насочување“, објасни таа.
Во долгорочната рамка на програмата, визијата предвидува дигитална трансформација на наставата, изградба на нови училишта во брзорастечки населби и создавање на програмата „Млад граѓанин“, преку која младите ќе имаат активно учество во процесите на одлучување и креирање на градските политики.
„Кога вложуваме во училиштата, вложуваме во поконкурентна економија, во повисок квалитет на живот, во култура и во заедница што дише подобро и живее подобро“, истакна Цаневска.
Таа додаде дека 5 октомври е ден кога треба да им се оддаде признание на наставниците – „срцето на градот“ – но и ден кога сите треба да се обврзат дека ќе продолжат да создаваат град кој го вреднува нивниот труд и обезбедува еднакви можности за секое дете, без разлика каде живее.
„Скопје што вложува во своите училишта и ученици – вложува во сопствената иднина“, заврши Цаневска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Филипче најави политички и кадровски промени во СДСМ
Претседателот на СДСМ,Венко Филипче, во изјава за медиумите по првиот круг од локалните избори истакна дека партијата бележи раст во повеќе општини, но и дека има места каде резултатите се послаби, што, како што рече, е јасен показател за тоа што треба да се менува.
„Јас лани ја затекнав партијата во навистина тешка и лоша состојба, после еден пораз со разлика од 300.000 гласови. Во изминатата година и пол интензивно работев во сите општински организации, со илјадници членови – преку директни контакти, средби и состаноци“, изјави Филипче.
Тој посочи дека СДСМ има избрани градоначалници во дел од општините, како и 16–17 општини во кои партијата влегува во втор круг, каде е забележан значаен раст на поддршката.
„Во некои општини бројот на гласови е зголемен за 40–50 отсто, а некаде гласовите се дури и дуплирани, што значи дека работата дала ефект. Но, има и општини, особено скопски, каде што тоа не се случи“, рече тој.
Филипче оцени дека овие избори се добар показател за насоката во која треба да се движи партијата во иднина.
„Очигледно е дека во дел од општините е потребна уште поинтензивна работа. Овие избори се јасен сигнал како треба да се поставиме и како да функционираме во следниот период“, додаде тој.
Во завршницата од изјавата, Филипче најави и кадровски и политички промени по завршувањето на изборниот процес.
„Ќе има политички и кадровски промени во раководството на партијата – за што јавноста ќе биде навремено информирана“, истакна претседателот на СДСМ.
Македонија
Повиците за поделба никому не носат добро, Брвеница е мултиетничка средина, рече Илиевски
Јовица Илиевски, кандидат за градоначалник на општина Брвеница од редовите на ВМРО-ДПМНЕ, денес даде изјава за медиуми во која истакна дека без разлика на етничката припадност тој во текот на изминатиот мандат како градоначалник, а со план и во наредниот, е фокусиран на проекти, со што кажа дека и општината ќе продолжи да ја води во тој тренд.
,,Општина Брвеница и јас како градоначалник, без разлика на етничка верска припадност. Фокусирани сме на проекти, и сакаме да продолжиме во тој тренд. Улици патишта, без разлика, на село, на население сите се рамномерно застапени во општината“, вели Илиевски.
Илиевски наброи проекти, кои според него покажуваат дека Општина Брвеница ниту беше водена изминатите година врз база на етничка припадност, ниту ќе биде во иднина, доколку тој освои уште еден мандат да ја води општината. Меѓу проектите кои ги наброи беа спортската сала во Челопек, тетовско, од 800 илјади евра, детска градинка, инвестиција од преку 400 илјади евра, во Гургурница камион за собирање на смет итн.
,,Фокусирани сме на проекти и на зближување. Би го потенцирал примерот за соживот. Додека се реновираше училиштето во Брвеница ,околу 270 ученици секој ден ги носевме во Челопек. Никаков проблем немаше со месното население, овие повици на поделба на никого не носат добро“, рече Илиевски и додаде:
,,Населението докажа и во првиот круг, тогаш имавме албански гласови, и сега ги очекувам. Докажано е и уште еднаш повик до сите, не сме за омраза не сме за поделба, ги повикувам сите заедно да докажеме дека Брвеница е мултиетничка средина и така ќе остане“.
Македонија
Трајановски: Нови игралишта, безбедни улици и пристапни тротоари се визијата за современ Аеродром
Кандидатот за градоначалник на Општина Аеродром од СДСМ, Александар Трајановски, ја претстави својата визија за уредување на јавниот простор и унапредување на квалитетот на животот на граѓаните.
„Нашата визија за јавниот простор е да биде уреден согласно реалните потреби на граѓаните. Тоа значи безбедни улици, достапни тротоари и места за рекреација каде што сите, од најмладите до највозрасните, ќе се чувствуваат пријатно и сигурно“, изјави Трајановски.
Тој најави изградба на нови и безбедни детски игралишта, вклучително и сензорни игралишта за децата со попреченост, како и адаптација на рабниците и поставување тактилни патеки. „Пристапноста не е луксуз, тоа е човеково право“, додаде кандидатот.
Посебен акцент стави и на решавањето на проблемот со кучињата скитници, преку системска соработка со институциите, како и на унапредувањето на инфраструктурата со нови велосипедски патеки, паметни паркиралишта и модерно осветлување.
„Ќе изградиме општина што штеди енергија и време, а нуди квалитетен урбан живот“, рече Трајановски, најавувајќи и изградба на нова противпожарна станица и редовна контрола на противпожарните системи во зградите.
„Ова не се само проекти, ова се мерки за достоинствен живот на секој мој сограѓанин од Аеродром. Затоа на 2 ноември, заедно да се избориме за подобра општина, за општина која се грижи за секого“, порача тој.

