Претседателот на Владата Христијан Мицкоски, во текот на посетата на Кратово и реновираната спортска сала, одговарајќи на новинарско прашање за тоа дали оваа година ќе има инвестиции во образовната инфраструктура, изјави дека се предвидени повеќе од 160 проекти во областа на образованието.

„Па да. Впрочем, и овој објект е дел од тие инвестиции, би рекол. Инаку, повеќе од 160–170 проекти ширум државата се предвидени за инвестирање во делот на образованието, училишта, студентски домови, итн, нешто што претставува императив за оваа Влада“, рече Мицкоски.

Премиерот истакна дека за година и половина, повеќе од 65 милиони евра се инвестирани во образованието и дека продолжуваат со нови инвестирања во оваа област.

„Инаку чисто за да споменам, последно што го разгледувавме, беше дека за година и половина, повеќе од 65 милиони евра се инвестирани во образованието, а од тие некаде околу 56–57 милиони се дел од програмата АА. Така што образованието е еден од нашите главни приоритети како Влада. Продолжуваме и понатаму да инвестираме, бидејќи без квалитетно и добро образование нема иднина“, изјави тој.

Премиерот Христијан Мицкоски изјави дека очекува наскоро добри вести за македонските граѓани од САД.

Тој појасни дека суспендирањето на визите за 75 земји, меѓу кои и Македонија, не ги опфаќа визите за потребите на студирањето и туристичките посети, туку само оние кои се однесуваат на имиграција.

„Мислам дека во деновите кои следат ќе има добри вести за македонските граѓани кога станува збор за ваквов тип на односи помеѓу нашиот стратешки партнер“, рече Мицкоски.

Во таа насока изрази и разочараност од однесувањето на опозицијата.

„Жалам што опозицијата, по жестоките и рафални критики кон Обединетото Кралство, тоа го прави сега и со САД. Неодамна кога беа наметнати оние трговски тарифи од 30 до 35 отсто, истите тие кои јас ги нареков талог на општеството во политиката поитаа да го навредуваат САД, а ги немаше да се извинуваат кога стапката се намали на 15 проценти“, рече премиерот.

Мицкоски очекува позитивен исход.

„Јас би бил внимателен и трпелив и очекувам добри вести“, додаде.

Одлуката на Соединетите Американски Држави да ја суспендираат обработката на визи за македонските граѓани претставува политички сигнал и предупредување, а не техничка пауза, порача СДСМ на денешната прес-конференција.

Членот на Извршниот одбор на СДСМ, Андреј Жерновски, изјави дека оваа одлука е аларм кој покажува дека политиките на изолација скапо ја чинат државата. Тој посочи дека премиерот Христијан Мицкоски изминатите 24 часа не дал одговор зошто Македонија се нашла на листата на САД.

„Во недостиг на неговото присуство, што би рекле од неговата партија, за уши го извади министерот за надворешни работи, Муцунски. Се случи уште една грешка, уште еден трагикомичен настап на политичар којшто многу зборува а ништо не кажува, персонификација на денешната киндер дипломатија. Мицкоски фактички го надмина својот претходник Груевски, кој заврши на црната листа, Мицкоски за жал ја стави целата држава на црната листа. Одлуката на САД да ја суспендираат обработката на визи за македонските граѓани не е техничка пауза, како што вели министерот Муцунски, туку политички сигнал, предупредување“, рече Жерновски.

Според Жерновски, одлуката на САД не треба да се релативизира, бидејќи, како што рече, станува збор за јасен дипломатски и политички сигнал дека Вашингтон внимателно ја следи состојбата во земјата и дека гледа проблеми во функционирањето на институциите.

Тој оцени дека, наместо најавуваните „одлични и специјални односи“ со САД, Македонија завршила, како што рече, во „периметарот на Сомалија“ и во категорија „трет свет“, што, според него, ја зголемува недовербата на граѓаните и ја влошува економската перспектива, особено за младите.

Жерновски наведе дека САД испраќаат порака дека не се задоволни од капацитетот на државата, дека постои недоверба во институциите, особено во безбедноста и документацијата, како и дека се очекуваат реформи кои не се спроведуваат.

Во продолжение, тој оцени дека надворешната политика на Владата е сведена на активности на најблиските соработници на премиерот, посочувајќи го Иван Стоилковиќ, за кого рече дека има врски со структури блиски до Русија.

СДСМ обвини дека паралелно се води и анти-ЕУ кампања, при што, наместо реформи, намерно се отвораат судири со соседите Грција и Бугарија и повторно се отвораат затворени прашања, со цел да се оправда изолацијата на државата.

Според партијата, мерката на САД е дипломатски сигнал и политички аларм кој укажува каде реално се наоѓа Македонија на меѓународната мапа. Во тој контекст беше спомнат и најавениот Закон за Западен Балкан, насочен кон борбата против криминалот и корупцијата.

Од СДСМ порачаа дека ќе продолжат, како што рекоа, јасно и гласно да ја разоткриваат, според нив, опасната агенда на Владата и политиките кои ја носат државата во изолација и го загрозуваат стратешкото партнерство со САД.