Македонија
(Видео) Шахпаска: Добра вест за најзагрозените граѓани, усвоени се законите од социјалната реформа

Пратеничка од СДСМ и коалицијата Јагода Шахпаска одржа прес-конференција по повод изгласувањето на Законот за социјална заштита, кој, како што кажа, е од особено значење за граѓаните.
Како што нагласи таа, со Законот се воведува „семеен пакет на права“ со кој значително ќе се зголеми паричната поддршка за семејствата во социјален ризик.
„Овој пакет обезбедува гарантирана минимална помош, додаток за попреченост, енергетски додаток, детски додаток и образовен додаток. Социјалната помош од сегашните 3.900 денари ќе порасне на нешто повеќе од 11 илјади денари, односно речиси за 300 отсто“, посочи пратеничката.
Додаде дека се олеснува и пристапот до надоместокот на 24.000 домаќинства кои во моментот добиваат социјална помош, а се отвора можност да бидат опфатени и дополнителни 11.000 домаќинства.
„Освен зголемувањето на висината на социјалната помош, со новиот Закон се зголемува опфатот на лица кои добиваат детски и образовен додаток. За разлика од 3.200 деца кои досега добиваа детски додаток, со новиот детски и образовен додаток опфатени ќе бидат над 60.000 деца. Оваa мерка има за цел да извлекува од детска сиромаштија“, нагласи Шахпаска додавајќи дека ова се само дел од мерките во новиот Закон за социјална заштита.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Забрана за тешки товарни возила на неколку патни правци

Од 19:45 часот на магистралниот пат Маврово – Дебар воведена е забрана за тешки товарни возила поради задржување на снег на коловоз, извести АМСМ.
Од 19.55 часот воведена е забрана за тешки товарни возила и за патниот правец Гостивар – Стража, додаваат од АМСМ.
Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.
Македонија
Судијата за врски на Франција за балканскиот регион во посета на Јавното обвинителство

Јавниот обвинител на Република Северна Македонија Љупчо Коцевски денеска се сретна со францускиот амбасадор Кристоф Ле Риголер, на средба за претставување на новоназначениот судија за врски на Република Франција за регионот Сирил Лакомб.
Тој е еден од вкупно 20 судии за врски на Франција во светот, а од државниот обвинител Коцевски се информираше директно за состојбите во обвинителството. Притоа, судијата за врски Лакомб понуди поддршка со оперативна и техничка помош, но и експертиза преку француските правосудни органи.
Бидејќи и самиот бил јавен обвинител и лице за врски на Република Франција со Европравда, Лакомб се интересираше и за постапката за делегирање на обвинителот за врски на Република Северна Македонија во оваа меѓународна институција.
Јавниот обвинител Коцевски, од своја страна, изрази благодарност за континуираната француска поддршка за работата на Јавното обвинителство.