Македонија
(Видео) Ѓорѓиевски: Во Струмица се раздавале тендери на луѓе блиски до Заев

СДСМ го користи буџетот на општина Струмица за раздавање тендери на луѓе блиски до Заев, истакна на денешната прес-конференција Орце Ѓорѓиевски од ВМРО-ДПМНЕ.
Како што рече тој, Заев и неговите наследници градоначалници на Струмица само на семејната фирма на Цветанка Иванова, „Дикор“ ЦД ДООЕЛ, дале над 1 милион евра, односно преку 70 тендери од буџетот на општина Струмица.
„Бидејќи бев вчера прозван од градоначалникот на Струмица, ова што денес ќе го приложам пред медиумите се документите извадени од страницата на Бирото за јавни набавки од коишто јасно се гледа дека фирмата ‘Дикор’ ЦД ДООЕЛ, која што е сопственост на синот на Цветанка Иванова, а претходно на нејзиниот сопруг, од општина Струмица, во период од 2009 година до денес испумпала над милион евра“, кажа претставникот на ВМРО-ДПМНЕ.
Тој посочи дека синот на Иванова, Зоран Иванов, кој е сопственик на „Дикор“ ЦД ДООЕЛ, е исто така косопственик на „Омни градба“, заедно со Трајче Заев.
„Додека обичните фирми требало да платат рекет за да добијат каква било работа, државна или општинска, бизнис-партнерите на Заеви нижеле милиони преку јавни набавки, и од обични административци, соработниците на Заев Заев станале милионери со доделување набавки без тендери на нивните семејни фирми“, обвини Ѓорѓиевски и додаде дека времето во кое СДСМ го користел буџетот за полнење на сметките на фирмите на бизнис-партнери на Заеви, наскоро завршува.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Борче Стамов и д-р Ирфан Ахмети ќе ја примат државната награда „Мајка Тереза“

Борче Стамов од „Донирај компјутери“ и доц. д-р Ирфан Ахмети од Универзитетската клиника за ендокринологија, денеска во Собранието ќе ја примат државната награда „Мајка Тереза“.
„На 26 август 2025 година (вторник), во Кристалната сала на Собранието на Република Северна Македонија, во 11:00 часот, Одборот за доделување на државната награда „Мајка Тереза“ ќе ја додели државната награда „Мајка Тереза“ за 2025 година за особено значајни остварувања од интерес на државата во областа на хуманоста и човечката солидарност и за потикнување, унапредување на меѓусебното разбирање и развој на соработката, како меѓу народите, така и меѓу припадниците на различните заедници, култури и вери“, соопштија од Собранието.
Македонија
Без струја делови од Центар и Карпош

Без струја денеска ќе останат делови од Центар и Карпош, извести Регионалниот центар за управување со кризи на Град Скопје.
Поради технички зафати во електродистрибутивната мрежа на ден 26.08.2025 година (вторник), без електрична енергија ќе останат:
· од 08:00 до 15:00 часот, корисниците на бул. Партизански Одреди бр. 15, односно стамбените објекти околу објектот – Луна Бизнис Центар. (Општина Центар )
· од 11.00 до 15.00 часот, корисниците од дел од ул. Козле крак -22. (Општина Карпош)
Македонија
Патот Македонски Брод – Скопје сѐ уште е затворен за сообраќај

Поради пожар во националниот Парк Јасен, регионалниот пат Р1106 Македонски Брод – Скопје сѐ уште е затворен за секаков вид на возила, информира АМСМ.
Сообраќајот на останатите државни патишта се одвива непречено, по суви коловози.
Интензитетот на сообраќај на патните правци надвор од градските средини поради летните одмори е зголемен меѓутоа на граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.