Македонија
(Видео) Ѓорѓиевски: Зошто три дена се криело насилство во кафе бар во Драчево?

Безбедносната состојба е драматично нарушена, не поминува ден без посериозен инцидент во кој жртви често се и недолжни граѓани. Власта која не може да воспостави контрола и да ја гарантира безбедноста на граѓаните се обидува преку медиумски мрак да ги сокрие случаите од пошироката јавност, изјави Орце Ѓорѓиевски, член на ИК на ВМРО-ДПМНЕ.
Според него, медиумите информираат дека пред недела дена во кафе бар во Драчево од страна на лице блиско до власта како последица на банална расправија се избодени со нож две лица. Дополнително информираат дека едното лице со тешки телесени повреди на дишните патишта се бори за живот. Оваа информација со јавноста е споделена по 5 дена од случајот и тоа не од извори од МВР, туку од информации преку социјалните мрежи, бидејќи и МВР и ЈО молчат.
,,Имено настанот кој се случил на 7 октомври, во билтен на МВР е објавен на 10 октомври. Цели 3 дена подоцна. Нападнатите кои се здобиле со тешки телесни повреди по настанот се пренесени во Комплексот клиники „Мајка Тереза“, каде им била укажана лекарска помош.
Едно од лицата кое што се борело за живот и има тешки телесни повреди, кои се животно загрозувачки. МВР под контрола на Спасовски реагирала цели 3 дена по случајот, при што до ЈО поднело кривична пријава за насилство, а не за обид за убиство. Оливер Спасовски мора да одговори. Кој и зошто го криел настанот цели 3 дена? Кое е лицето напаѓач и дали неговата блискост со СДСМ е причината за односот на полицијата кон овој случај?”, вели Ѓорѓиевски.
Според него, неодговорниот однос на Спасовски и неговата неспособност се главна причина за нарушената безбедност во Република Македонија. Ниту еден 9 – те случаи на убиство кои се случија во негов мандат не е расветлен. Исто како што не се расветлени ниту палењето на коли, ниту грабежите, тепачките и другите деликти кои што станаа наше секојдневие на жалост.
,,Нереагирањето на МВР и непрофесионалниот однос кон случаите ќе бидат предмет на истрага со враќањето на правната држава во Република Македонија. Одговорност и правда ќе има”, додава тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП: Прифатена уште една наша предлог мерка – до 15 септември таблички во различна боја за државните службени возила

По намалувањето на банкарските трошоци, уште една мерка предложена од Либерално-демократската партија (ЛДП), се наоѓа пред сама реализација. Директорот на Службата за општи и заеднички работи најави дека до 15 септември сите државни институции и јавни правни лица мора да ги заменат табличките на службените возила со нови, посебни регистарски таблички, соопшти ЛДП.
„Сведоци сме на разни злоупотреби на службените возила од страна на избраните државни и јавни функционери за приватни потреби во минатото и затоа ја поздравуваме одлучноста на Владата за прифаќање на нашиот предлог. За ЛДП, овој чекор претставува позитивен пример за тоа како добрите предлози и идеи кои се во интерес на граѓаните и државата треба да бидат прифатени и имплементирани од сите релевантни чинители“, велат од партијата.
Од таму потсетуваат дека барањето на ЛДП минатото лето за бележење на сите службени возила во сопственост на државата дојде по излетот на претседателот на Собранието, Африм Гаши, кој тогаш со колона службени возила отиде на свадба во соседно Косово, без службен налог и задолжителна проверка на граница, по што од страна на Министерството за внатрешни работи беа покренати дисциплински постапки за 6 службеници.
Од ЛДП велат дека ова е нивен петти предлог кој Владата само во изминатата година го препозна и прифати. Претходно, државните претставници ги прифатија и почнуваат да ги имплементираат законската можност за граѓански референдум за отповикување на градоначалници; креативното толкување на заклучоците од ЕУ и одложеното дејство на уставните измени, намалувањето и укинување на банкарските провизии и предлогот за поголеми инвестиции во домашното одбранбено производство.
„Упатуваме апел до сите државни институции час поскоро да ја завршат постапката за воведување на нови регистарски таблички, која кога ќе се спроведе и реализира, веруваме дека ќе доведе до значително намалување на злоупотребата и поголема совесност на оние функционери кои имаат право на користење на возилата, но и на другите државни и јавни ресурси. Со воведувањето на ваквите мерки за зголемување на транспарентноста во работата на јавните и државни функционери спречуваме нивна злоупотреба на ресурсите за приватни цели на сметка на зголемената доверба на граѓаните и јавноста, преку видливост и отчетност на јавните ресурси, усогласеност на институциите во однос на транспарентноста и рационализацијата на трошоците на јавните средства“, велат од ЛДП.
Македонија
„Влен“ бара оставки од ДУИ за споменикот на Андон Ќосето

ВЛЕН бара одговорност на ДУИ за поставување на споменикот на Андон Ќосето во Автокоманда. Според нив, поставувањето на споменикот на Андон Ќосето не е случајна, ниту изолирана грешка туку е продолжение на политиките кои го разделуваат, навредуваат и понижуваат Скопје како мултиетнички и модерен град.
„Данела Арсовска не е сама. Таа не е изолиран феномен, туку производ и продолжение на стар систем, на еден режим кој сè уште дише преку своите сенки, преку своите директори, советници и сојузници. Функционерите на ДУИ се дел од тој систем. ДУИ е дел од градската власт на сите нивоа. ДУИ има одговорност зошто дозволила и по втор пат поставување на споменикот на Андон Ќосето. Поставувањето на споменикот на Андон Ќосето не е случајна, ниту изолирана грешка — тоа е продолжение на политиките кои го разделуваат, навредуваат и понижуваат Скопје како мултиетнички и модерен град“, изјави Мухамед Елмази – претснавник на ВЛЕН.
Тој потсети дека првото поставување на овој споменик било во време кога Никола Груевски беше премиер, а Блерим Беџети и Бујар Османи негови министри
„Вчера, Никола Груевски не издржа и јавно се пофали со споменикот и си ја честиташе сопствената политичка визија. Тоа не е случајно. Тоа е доказ дека денешната градска власт, предводена од Данела Арсовска, е продолжена рака на истата идеолошка линија, на истиот режим, во кој режим ДУИ секогаш е дел и секогаш молчи. Во град Скопје, Данела Арсовска не владее сама. Таа има кабинет, директори и функционери. Голем дел од тие функционери се кадри на ДУИ. Тие не се неми набљудувачи, туку активни чинители во системот кој дозволи повторно поставување на споменик кој го навредува духот на соживотот“, рече Елмази.
Тој бара ДУИ да ги повика нивните директори во град Скопје да поднесат морална оставка како знак на целосно неприфаќање на поставување на споменикот на Ќосето и да ја прекие поддршката кон Данела Арсовска која, како што вели, продолжува да прави обиди за меѓуетнички провокации и обиди за дестабилизација.
„Јавно ги повикуваме сите директори и функционери на ДУИ во Град Скопје да поднесат оставка. Тоа е единствениот морален потег што можат да го направат – во знак на солидарност со сите граѓани кои се чувствуваат повредени, меѓу кои Албанци, Турци, Бошњаци, па и Македонци кои веруваат во соживот, почит и заедничка иднина“, рече Елмази.
Македонија
(Видео) Петрушевски: Негласањето на СДС за интерпелација на Коцевски дава одговор на прашањето зошто никој од СДС не е во затвор

Од вчерашното гласање на СДС во Собранието, каде не ја поддржаа интерпелацијата за главниот обвинител Љупчо Коцевски, се е јасно. СДС го штити Коцевски, а Коцевски за возврат го штити СДС и нивните кадри потонати до гуша во криминал за да не одговараат, изјави Бране Петрушевски, пратеник на ВМРО-ДПМНЕ.
Според него, негласањето на СДС за интерпелација на главниот обвинител Љупчо Коцевски е одговор на прашањето, зошто никој од СДС не е во затвор, а има низа постапки.
„Сега е јасно и кој ја мати водата за Кочани. Истите тие кои претпладне правеа пресови за Кочани, сега сметаат дека Коцевски добро ја работел работата. Очигледно е кој свири, а кој игра во обвинителството. СДС силно удира на тапани, а Коцевски игра како ќе му кажат. Заради овој однос на СДС и начинот на кој ја киднапирале цела судска власт довербата во правосудството е помало од 2%. СДС гледа на нивниот обвинител Љупчо Коцевски како на последно упориште. Во тоа им се приклучува и ДУИ, кои заедно со Коцевски бараат спас за криминалот на Филипче, Заев и Али. Тоа е всушност и пораката од СДС до Коцевски, или е со штитот или на него, кој во периодот кој доаѓа ќе треба да извршува се повеќе насоки“, рече Петрушевски.
Тој го повика Коцевски да покаже, како што вели, грам доблест и да не чека ниту час, туку веднаш да ја прими пораката на Собранието, и волјата на народот преку гласањето во Собранието и да си поднесе оставка.
„Секое понатамошно седење на функцијата спонзорирано од СДС и ДУИ ќе му го руши и онака слабиот углед и целосно ќе го стави во функција на измеќар и метлар на мафијата“, рече Петрушевски.