Лекарите немаат заштитна опрема, а владата купува луксузни пијалаци, сортни вина, бурбон-виски, вели генералниот секретар на ВМРО-ДПМНЕ, Игор Јанушев.

Тој на прес-конференција истакна дека покрај набавките за морски плодови и риби, документите покажуваат дека Владата дава пари и за набавка на скапи пијалаци – 2 тони сортно вино, 45 литри бурбон-виски, 90 литри шкотско виски, 30 литри шампањ, вотка.

„Октопод пијаната влада на Заев и СДСМ додека народот страда за леб, купува, повторувам, 2 тони сортно вино, 45 литри бурбон-виски, 90 литри шкотско виски, 30 литри шампањ, вотка. Ова не е е само голем скандал, ова е забеганост, ова е лудост, ова се прави додека луѓе умираат и додека има вонредна состојба. Ова е надвор од памет“, вели Јанушев.

Од опозицијата нагласуваат дека во буџетот има дупка од 1.3 милијарди евра, ама нема дупка кога треба да се набават луксузна храна и алкохол. Тој побара итно да се поништи набавката, а овие пари, исто како и парите од набавката за морска храна да се пренаменат за купување заштитна опрема за лекарите и дезинфициенси за болниците.