Македонија
(Видео) Kузеска: Еве ја вистината, Милошоски на бугарски го фали Тодор Александров, потонати се лагите на ВМРО-ДПМНЕ

Целата јавност, вчера, во македонското Собрание виде дека пратениците од антиевропската коалиција на ВМРО-ДПМНЕ и Левицата се плашат од вистината. Покажуваат огромна нервоза во Собранието затоа што се разобличени сите нивни лаги, измислици. Ги видоа заклучоците на пратениците од владејачкото мнозинство за последниот европски предлог и продолжување на европскиот пат. Сето она што лажно им го сервираа на граѓаните потона во вода, изјави на денешната прес-конференција, Богданка Кузеска, портапролка на СДСМ.
Таа додаде дека имаме целосна заштита на јазичните, идентитетските, културните и на историските посебности на македонскиот народ и спроведување на процесот на преговори со ЕУ. Ги слушнаа силните пораки од претседателката на Европската комисија, Урсула фон дер Лаен. Македонци, со чист македонски јазик во ЕУ, со заштитен македонски идентитет и почитуван од Унијата.
Според Кузеска, оттука е нервозата на овие лажни ликови, кои свесно ги лажат граѓаните, манипулираат, со единствена цел – да ѝ наштетат на државата, да не продолжи европскиот пат.
На прес-конференцијата беше пуштено видео како Антонијо Милошоски беседи на гробот на Тодор Александров на бугарски јазик, под бугарски знамиња.
Кузеска истакна дека ова е вистината за Милошоски и ВМРО-ДПМНЕ – на бугарски јазик зборуваат за заедничка историја со Бугарија додека ја плашат јавноста со непостојна бугаризација. Тоа е истиот тој Милошоски, кој кодификаторот на современиот македонски јазик Блаже Конески го нарекуваше „џуџето и плагијатор од Небрегово“.
Нема да бараме Милошоски да им се извини на граѓаните затоа што тој нема никаква доблест, нема образ, нема буквално ништо. ВМРО ДПМНЕ, Мицкоски, Милошоски, Николовски, тоа се едни големи лажговци, ништо повеќе, додаде Кузеска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес ги разбуди струмичани, епицентарот бил во Валандово

Телеметриската сеизмолошка мрежа на Македонија ноќеска во 02:13 часот регистрираше земјотрес со локална магнитуда 2,2 степени според Рихтеровата скала, со епицентар во епицентралното подрачје Валандово, на околу 116 километри југоисточно од Скопје.
Според Сеизмолошката опсерваторија при Природно-математичкиот факултет во Скопје, потресот бил почувствуван во Струмица и околните места со интензитет од III степени според Европската макросеизмичка скала.
„Се работи за послаб земјотрес кој нема потенцијал да предизвика материјални штети, но поради блискоста на епицентарот, граѓаните во дел од југоисточниот регион го почувствуваа потресот“, велат од Сеизмолошката опсерваторија.
Надлежните апелираат дека ваквите земјотреси се вообичаени за нашето подрачје и дека нема простор за паника.
Македонија
Македонци заминуваат кон грчките плажи, продолжениот викенд предизвика хаос на „Богородица“

Сообраќајот на државните патишта се одвива непречено и по суви коловози, но зголемената фреквенција на возила поради летните одмори и продолжениот викенд во Македонија предизвикува гужви на граничните премини.
Најголеми задржувања моментално се бележат на ГП Богородица, каде за излез од државата се чека околу 40 минути до 1 час. На ГП Табановце, пак, времето на чекање за влез и излез изнесува околу 30 минути. Од другите гранични премини од македонска страна не се евидентирани подолги задржувања.
АМСМ ги потсетува возачите да возат со прилагодена брзина, да ја почитуваат сигнализацијата и да бидат особено внимателни на делниците низ котлини, речни долини и клисури каде е можна појава на одрони. Како критични делници се наведуваат Катланово – Велес, Маврово – Дебар – Струга, Виница – Берово и Кочани – Делчево.
Воедно, возачите треба да бидат подготвени за времен режим на сообраќај. Од 3 септември започнуваат градежни истражувачки работи на делницата Гостивар – Тетово, што ќе траат две недели и ќе се одвиваат под изменет режим. Дополнително, во тек е и санација на мостот Здуње на државниот пат А2 (Гостивар – Стража), каде е воспоставена семафоризација и наизменично пропуштање на возилата во период од шест месеци.
Македонија
Летни температури во септември, Скопје до 35 степени

Граѓаните на Македонија денеска ќе уживаат во сончево и топло време со слаба до умерена облачност, соопшти Управата за хидрометеоролошки работи (УХМР).
Очекуваната максимална температура во земјата ќе достигне од 28 до дури 36 степени, додека утринските минимални ќе се движат меѓу 7 и 18 степени.
Ќе дува слаб до умерен ветер, а долж Повардарието повремено засилен од северен правец.
Во Скопје времето ќе биде претежно сончево и топло, со слаб до умерен северен ветер, кој во делови од котлината ќе биде повремено засилен. Температурите ќе се движат од минимални 15 до максимални 35 степени.
Според најавите на УХМР, во наредните денови под влијание на висок воздушен притисок ќе преовладува стабилно, претежно сончево и топло време со мала до умерена облачност.