Македонија
Владина делегација положи цвеќе пред спомениците на депортираните Евреи и на паднатите борци во НОБ

Со пораката „11-ти март 1943 – Никогаш повеќе“ и со положување на свежо цвеќе пред спомениците на депортираните Евреи и на паднатите борци во НОБ, на градските гробишта во Бутел, министерката за животна средина и просторно планирање, Каја Шукова и министерот за транспорт и врски, Благој Бочварски во име на Владата на Република Северна Македонија, оддадоа почит на 7.144 македонски Евреи што на овој ден пред 80 години беа депортирани во Треблинка, логорот на смртта.
Почит оддадоа и претставници од Собранието, од кабинетот на Претседателот на државата, од Армијата, претставници од дипломатскиот кор, од Еврејска заедница, од Сојуз на борци, претставници од парламентарни политички партии, делегација на Кнесетот на Израел, од Фондот на холокаустот, од Светски еврејски конгрес, од БНЕИ БРИД Бугарија како и од Сојуз на еврејски општини на Србија, Еврејска општина Белград, Еврејска општина Нови Сад и од Еврејската заедница на Босна и Херцеговина.
Пред споменикот на депортираните Евреи се обрати потпретседателката на Еврејската заедница во Северна Македонија Радојка Хелман Денковска која порача:
„Ние потомците, а и сите луѓе во светот треба да бидеме чувари на сеќавањето. Имаме морална обврска да се сеќаваме на страдањата на жртвите на холокаустот, имаме обврска да ја сочуваме вистината и да не дозволиме оваа трагедијата никогаш и никому да се повтори“. Таа додаде дека нашите генерациите простуваат, но не забораваат и дека, иако злото ја одзема светлината на животот, сепак не ја одзема вербата во човечноста, хуманоста, почитувањето на различностите и вербата во подобро утре.
Свежо цвеќе на споменикот на депортираните Евреи положија и Цега Мелаху, пратеничка во Кнесетот на државата Израел и неговиот колега Хамад Амар член на Кнесетот.
„Вистинска чест ми е да положам венец во име на Кнесетот, Парламентот на државата Израел, во спомен на 7.144 членови на Македонската еврејска заедница – деца, жени, мажи, цели семејства- кои беа убиени во холокаустот од страна на нацистичкиот режим. Тука сум за да го негувам споменот на жртвите, да ја изразам мојата поддршка и солидарност со Еврејската заедница и да го изразам моето вистинско пријателство со народот на Република Северна Македонија“, истакна Цега Мелаху во своето обраќање, додавајќи дека споменот на Македонската еврејска заедница се негува и во Ерусалим, главниот град на државата Израел каде пред само неколку месеци, во еден од најпопуларните булевари во градот беше свечено отворен споменик, украсен со имињата на еврејските семејства кои живееле во Македонија пред холокаустот.
По обраќањата, според еврејските обичаи, рабинот Лучијано Прелевиќ одржа молитва (кадиш).
Дел од делегациите полижија свежо цвеќе и пред споменикот на паднатите борци во НОБ.
Со одбележувањето на овој црн ден од историјата кога Северна Македонија во Холокаустот ја загуби речиси целата своја еврејска заедница и оддавањето на почит на жртвите се потсетуваме за лекцијата од историјата никогаш да не се повтори.
Настаните за одбележување на 80 години од депортацијата на македонските Евреи во Треблинка се под покровителство на Владата на Република Северна Македонија, а во организација на Еврејската заедница на Република Македонија и Фондот на Музејот Холокаустот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Повеќе од 45 тони вода исфрли полицискиот хеликоптер во гаснењето на пожарот во Чучер Сандево

Полициски хеликоптер Бел-412 денеска повторно се вклучи во гаснење на пожарот во општина Чучер Сандево, соопшти МВР.
„И покрај тешките услови за гаснење непристапен терен и непрегледност поради чад, полицискиот хрликоптер исфли над 45 тони вода во подршка на екипите на терен за ставање под контрола на истиот“.
Македонија
(Видео) Сè уште активен и надвор од контрола пожарот кај Чучер Сандево, со интервенција од воздух ќе се продолжи во утринските часови

Пожарот кој е активен на територија на Чучер Сандево и покрај интервенциите од воздух, за жал сè уште е надвор од контрола, информираат од ЦУК.
Во текот на денешниот ден, на терен, како што појаснуваат надлежните, интервенирале сите расположливи сили и средства — општински служби, физички и правни лица, како и екипи од БППЗ, ДЗС, МВР и ЦУК.
„Сите капацитети се ангажирани, но условите на теренот се исклучително тешки.
Голема е вознемиреноста кај населението, бидејќи чадот се проширува низ целата општина и селата Чучер, Мирковци, Глуво, Бразда, сè до Бутел. Истовремено, регистриран е и нов пожар во атарот на село Кучевиште, кој зафаќа голема површина и се наоѓа во близина на куќи“, според објавеното на социјалните мрежи.
Во раните утрински часови, како што појаснуваат, беше пружена воздухопловна поддршка со три летала, а попладнето со уште еден воздухоплов.
Поради временските услови, се очекува пожарот во текот на ноќта делумно да се стиши, што би овозможило поефикасно дејствување на теренот утре.
За утре е планирано акциите да започнат уште во 5:00 часот, со ангажирање на сите институционални и општински сили на целата зафатена површина, со поддршка од два воздухоплова на МВР. Во вечерните часови, екипите ќе останат на терен и ќе интервенираат согласно приоритетите и потребите, соопштија надлежните.
Македонија
(Видео) „Зошто досега не се употребени хермелините“, прашува градоначалникот на Чучер Сандево, општината прогласи вонредна состојба

Општината Чучер Сандево прогласи вонредна состојба поради пожарите, објави градоначалникот појаснувајќи дека одлуката била донесена на денешната седница на општината.
Како што истакна градоначалникот Сашко Комненовиќ ситуацијата се уште е загрижувачка и опасна поради пожарот кој избувна помеѓу селата Блаце и Чучер Сандево, се до село Кучевиште.
„Ситуацијата е сериозна, динамична и бара постојано вклучување на сите расположиви ресурси. Пожарот зафати густа, нискостеблеста и мешана шума на многу непристапен терен“, вели тој.
Појаснува дека и силниот ветер го отежнува гаснењето на пожарот.
„Она што ме загрижува и што сакам да го алармирам е тоа дека забележувам спора реакција од надлежните институции во однос на гаснењето на пожарот. Во вакви моменти секоја минута е важна и пресудна”, рече тој.
Градоначалникот потсети дека вчера Владата презентираше некаква подготвеност за справување со пожарите со хермелините.
„Зошто досега не се употребени. Јас забележав само еден. Од вчера до сега се уште да не се стави под контрола пожарот кај Блаце и цело Чучер Сандево. Во моментов имаме три активни пожари. Аалрмирам на итна мобилизација. Како градоначалник на општината имам должност да се грижам за безбедноста на жителите“, потенцира тој.