Министерот за здравство Арбен Таравари, најави дека зголемувањето на платите за здравствените работници во наредните четири години ќе биде помеѓу 40 и 50 проценти.

„Изворедна вест. Платите во здравството ќе бидат највисоки во историјата на оваа држава. Благодарност до Владата и синдикатите кои се согласија на овој договор, кој ќе влезе во светлите страници на оваа земја“, соопшти Таравари.

Претходно, и премиерот Христијан Мицкоски им се заблагодари на синдикалните организации и синдикатите кои конструктивно учествуваа со нивните идеи за време на целиот процес, заедно со претставниците на синдикатите, Министерството за финансии, Министерството за здравство, Фондот за здравствено осигурување, како и другите кои беа вклучени.

Со овој постигнат договор, според соопштеното од страна на надлежните, веќе следната година во март ќе има дополнително зголемување од 5 проценти на сумата наменета за плати за здравствените работници, додека во 2026 година тоа ќе биде од 5 до 7 проценти. Истото зголемување од 5 до 7 проценти ќе се реализира и во 2027 година, а во 2028 година ќе биде од 7 до 10 проценти.

Или, како што е истакнато во соопштението на Таравари ако се земеме целиот период последователно, се добива зголемување на износот на средствата потребни за исплата на платите на здравствените работници за целиот период помеѓу 40 и 50 проценти.

Претседателот на Демократската унија за интеграција, Али Ахмети денеска во Тетово го прими амбасадорот на Италија во нашата земја Андреа Силвестри.

Ахмети и амбасадорот Силвестри разговараа за Охридскиот договор, изборите, реформите и владеењето на правото, како и за евроинтеграциите.

Ахмети нагласи дека ДУИ и Европскиот фронт победија на претседателските и парламентарните избори, но оваа волја на граѓаните неправедно била игнорирана од мандатарот.

„Охридскиот договор е гарант за мирот, безбедноста, стабилноста и меѓуетничките односи во земјата.

Нарушувањето на изборниот легитимитет, тенденциозниот упад врз албанскиот јазик, етничката припадност и правичната и соодветна застапеност директно влијае на меѓуетничките односи и на стабилноста на државата.

Охридскиот договор го гарантираа ЕУ и САД, а дел од имплементацијата беа и НАТО и ОБСЕ“, е нагласено во соопштението.

Според информацијата од канцеларијата на Ахмети и отстапувањето од европската перспектива ги вознемирува граѓаните и ја влошува политичката состојба во државата.

„Политичкиот дијалог преку почитување на изборниот легитимитет на легитимните претставници на етничките заедници треба да се воспостават со заедничките парламентарни и локални избори во октомври 2025 година“, е наведено во дописот.

Претседателот на СДСМ, Венко Филипче, ѝ го честита изборот на Радмила Шекеринска за заменик-генерален секретар на НАТО.

„Честитки, Радмила! Убеден сум дека Радмила Шекеринска е вистинскиот избор за втор човек на НАТО – најмоќниот воено-политички сојуз во светот. Со нејзиното долгогодишно искуство, посветеност и професионалност успешно ќе се справи со најголемите предизвици што ѝ претстојат. Ова назначување е доказ дека нејзиниот труд и професионалност се ценети на глобално ниво. Преку нејзиниот успех Северна Македонија уште еднаш ги потврдува својата вредност и капацитетот да биде дел од најзначајните меѓународни процеси. Ние сме рамноправна членка на НАТО, која има што да понуди за глобалната безбедност и стабилност“, порача Филипче.

Според него, назначувањето на Шекеринска е уште еден потврда за исправноста на политиките и, како што вели, историскиот успех на СДСМ и владата, кои со посветена работа успеаја да ја внесат Северна Македонија во НАТО.

Претходно денес, генералниот секретар на НАТО, Марк Руте, ја назначи Радмила Шекеринска за следен заменик-генерален секретар.

„Среќен сум што можам да го објавам именувањето на Радмила Шекеринска за следен заменик-генерален секретар. Таа е вистински верник во НАТО, ја знае работата која е потребна за да се приклучи на алијансата и што значи да се биде полноправна членка. Со нетрпение очекувам да работам со неа додека ја презема оваа витална улога“, истакна Руте.

Шекеринска беше министер за одбрана на Северна Македонија пред влезот на земјата во НАТО во 2020 година.